Amos 2:4 - Mbeti ti Nzapa - Tënë so amu fini

⁴ Tënë so KOTA GBIA atene ayeke so: “Mbi yeke na tënë na azo ti Juda ndali ti asioni ye ota, wala osio so ala sara: ala baa ndia ti mbi KOTA GBIA tongana mbumbuse ye, ala ke ti sara ye alingbi na ambela ti mbi; ala mu peko ti anzapa ti mvene tongana ti so akotara ti ala asara ando. Ndani laa, ngbanga so mbi fâ na li ti ala, mbi yeke kiri na ndö ni oko pepe.

Amos 2:4 ပူးပေါင်းရင်းမြစ်များ

2 Agbia 17:19

Me azo ti Juda nga ake ti sara ye alingbi na andia ti KOTA GBIA, Nzapa ti ala. Ala sara ye alingbi gi na atënë ti ndia so azo ti Israel wani azia na sese.

2 Mbai 25:14

So Amasia akiri na kodro na peko ti so lo kinda azo ti Edom awe, lo mu ayanda ti azo ti Edom ni, lo ga na ala. Lo baa ayanda ni tongana anzapa ti lo, lo yeke voro ala si lo yeke zö dukani ndali ti ala.

2 Mbai 30:7

Ala sara ye tongana ti ababâ ti ala na ti a-ita ti ala pepe so asara sioni ye mingi ti ke KOTA GBIA, Nzapa ti akotara ti ala. Nzapa asara si ababâ na a-ita ti ala ni aga ye so a buba ni kue; ye ni laa ala yeke baa so.

Néhémie 1:7

E sara ye so ayeke sioni mingi ti ke mo; e ke ti sara ye alingbi na atënë ti ndia ti mo, andia ti mo nga na aye so mo fa na e na lege ti Moïse, zo ti kua ti mo.

Néhémie 9:26

Me akotara ti e asara ngangu li na mo, ala tomboka na tere ti mo, ala bi atënë ti ndia ti mo na peko ti ala; ala fâ awayanga ti mo so ayeke mu wango na ala titene ala kiri na mbage ti mo. Na sarango ye tongaso, ala zonga mo mingi.

Ésaïe 28:15

“Ala yeke tene: E na kuâ e ga *ambuki awe, e na ndo ti akuâ, e leke tënë awe. Tongana ye ti ngangu ayeke si ande, ye ni ayeke wara e pepe. Biani, tenengo mvene aga ndo so e yeke kpe daa ti bata tere ti e, handango azo ayeke ndo ti hondengo tere ti e.”

Ésaïe 44:20

Azo ni so amu tere ti ala gi na senge mburu ti wâ; gbungo-li ti ala ti kirikiri asara si ala girisa lege. Nzapa ti ala ni alingbi ti zi ala pepe. Me azo ni wani ayeke tene pepe: “Ye so ayeke na ya ti maboko ti mbi so, ayeke gi ye ti mvene.”

Jérémie 16:11

Tongaso, fade mo yeke kiri tënë: ‘So tënë ti yanga ti KOTA GBIA laa: Kota kpale ni ayeke ti na ndö ti ala, ngbanga ti so akotara ti ala ado mbi, azia, ala mu peko ti anzapa nde ti voro ala, ala ti akpo li ti ala na sese na gbe ti ala. Me mbi, akotara ti ala ni ado mbi, azia, ala ke ti sara ye alingbi na ye so mbi fa na ala.

Jérémie 16:12

Ti ala, ala sara sioni mingi ahon akotara ti ala; zo oko oko ayeke ngba ti sara sioni ye so be ti lo afa na lo, me lo ke ti ma mbi.

Jérémie 17:27

Me tongana ala ma mbi pepe, tongana ala ke ti bata lango ti wungo tere nde ndali ti mbi, tongana ala yo akungba na lango ni so si ali na ni na yanga ti gbagba ti Jérusalem, fade mbi yeke bi wâ na tere ti ayanga ti gbagba ni. Wâ ni ayeke gbi apendere da ti gbata ni si ayeke mingo pepe.’ ”

Jérémie 6:19

Ala ma si, ala azo ti sese kue: mbi yeke sara titene kota kpale ati na ndö ti azo ni, so ayeke futa ti asioni gbungo-li ti ala laa. Ala dingi mê ti ala ti ma atënë ti mbi pepe; ala baa atënë ti ndia ti mbi tongana mbumbuse ye.

Jérémie 8:2

A yeke gbara abio ni na gbe ti lâ, na gbe ti nze nga na gbe ti gba ti atongoro. Aye le ti nduzu ni so, azo aye ala ando mingi; azo ni ayeke sara kua na ala, ala mu tere ti ala na ala, ala yeke kpe na peko ti ala; ala yeke voro ala. Abio ni so, a yeke ro ni pepe; a yeke lu nga ni pepe. Fade alango na ndö ti sese ti ga tongana puru na ndö ti sese.

Jérémie 8:9

So ye ti kamene ti nyen na azo ti ndara! Li ti ala aga kirikiri awe; ala ti na ya ti gbanda ti ala wani. So ala baa tënë ti KOTA GBIA tongana buba ye na le ti ala so, ndara ti nyen laa ala yeke na ni?

Jérémie 9:14

Ndani laa, tënë so KOTA GBIA so ayeke na ndö ti dunia kue, Nzapa ti Israel, atene ayeke so: Mbi yeke mu na azo ti kodro ni sengo kugbe titene aga kobe ti ala ti tengo ni, mbi yeke mu na ala ngu so sioni yoro ayeke na ya ni titene ala nyon.

Ezekiel 13:22

Na lege ti mvene ti ala, awali ni, ala sara si be ti azo ti mbirimbiri awoko, ataa so mbi laa mbi zia vundu na be ti azo ti mbirimbiri ni pepe. Ala mu ngangu na be ti azo ti sioni si ala lingbi ti zia lege ti sioni ti ala pepe ti ngba na fini.

Ezekiel 20:13

Me na benyama, azo ti Israel atomboka na tere ti mbi; ala sara ye alingbi na andia ti mbi pepe nga na lege ti asarango ye so mbi fa na ala. Andaa aye ni ayeke sara titene zo aduti na fini tongana lo sara ye alingbi na ni. Ala sara si lango ti wungo tere aga sioni ahon ndoni. Tongaso mbi tene: Mbi yeke kiri ti tuku ngonzo ti mbi ti wâ na ndö ti ala na benyama si mbi yeke fâ ala ti hunzi ala.

Ezekiel 20:16

Mbi deba yanga ti mbi na ala, ngbanga ti so aye so mbi fa na ala, ala baa ni tongana mbumbuse ye, ala sara ye alingbi na andia ti mbi pepe, ala sara si lango ti wungo tere aga sioni. Biani, be ti ala angba gi na ndö ti ayanda ti ala.

Ezekiel 20:18

“Na benyama, mbi tene na amolenge ti akotara ti ala, mbi tene: ‘Ala sara ye alingbi na andia ti ababâ ti ala pepe, ala mu peko ti asarango ye ti ala pepe, ala ga *sioni pepe na lege ti vorongo ayanda ti ala.

Ezekiel 20:24

Mbi deba yanga ti mbi na ala, ngbanga ti so ala sara ye pepe alingbi na lege ti asarango ye so mbi fa, ala baa andia ti mbi tongana mbumbuse ye, ala sara si lango ti wungo tere aga sioni, le ti ala angba gi na peko ti ayanda ti ababâ ti ala.

Ezekiel 20:30

Ndani laa, mo tene na azo ti Israel, mo tene: Tënë so Kota Gbia NZAPA atene ayeke so: Ye ni nyen! Ala ga *sioni tongana akotara ti ala, ala sara ye ti ndumba na vorongo ayanda ti ala so zo alingbi ti baa na le ti lo fani use pepe so!

Ezekiel 22:28

Awayanga-Nzapa ti ala ayeke kanga ndö ti aye so kue tongana ti so a yeke leke potopoto na tere ti dere. Aye so ala baa na ya ti mbeni ye tongana bango-li ayeke mvene si bango nda ti aye ti ala ayeke ti handa na azo. Ala yeke tene: ‘Tënë so Kota Gbia NZAPA atene ayeke so’; andaa mbi laa mbi tene tënë ni pepe.

Ezekiel 22:8

Aye so a zia nde ndali ti mbi, mo baa ni tongana mbumbuse ye; mo sara si *lango ti wungo tere so a zia nde ndali ti mbi aga sioni.

Osée 12:2

Pupu aga kobe ti azo ti Efraim, ala yeke tumba peko ti pupu ti To, ti londo na ndaperere ngbii asi na lakui; ala yeke tene mvene mingi mingi si ala yeke sara ngangu na azo. Ala na azo ti Asirii aleke tënë ti ga *ambuki, ala yeke tokua mafuta na azo ti Ezipte.

Osée 12:3

KOTA GBIA ayeke na ngbanga na azo ti Juda; lo yeke ga ti kiri peko ti sioni na Jacob ndali ti dutingo ti lo, lo yeke futa lo alingbi na sioni sarango ye ti lo.

Osée 6:11

“Juda, mo nga, a leke lango ti fango ale ti kobe ndali ti mo awe.” “Na ndembe so mbi yeke sara si gigi ti azo ti mbi akiri aga nzoni

Amos 1:3

Tënë so *KOTA GBIA atene ayeke so: “Mbi yeke na tënë na azo ti Damas ndali ti asioni ye ota, wala osio so ala sara: ala fâ ya ti azo ti Galaad na wen ti dengo ya ti sese. Ndani laa, ngbanga so mbi fâ na li ti ala, mbi yeke kiri na ndö ni oko pepe.

Amos 3:2

“Na popo ti asewa kue ti sese so, gi ala oko laa mbi soro ala. Ndani laa fade mbi yeke hunda na ala titene ala fa na mbi peko ti asioni ye so kue ala sara.”

Mishe 6:12

Azo ti mosoro ti gbata ni ayeke sara gi ngangu na zo; azo ti gbata ni ayeke tene gi mvene. Tënë so ayeke sigigi na yanga ti ala ayeke gi tënë ti handango zo.

Habakuk 2:18

Yanda so zo amu keke si aleke na ni, kua ti lo ayeke nyen? Wen so zo akporo na wâ si lo leke na limo ti yanda ni so, limo ni ayeke fa tënë ti mvene. Wakode-kua laa aleke aye ni so, ala yeke tene tënë pepe; lo zia be ti lo na ndö ti ayanda ni ngbanga ti nyen?

Rome 1:25

Ala zia taa-tënë na ndö ti Nzapa awe si ala mu peko ti mvene; ala voro aye so Nzapa asara si ala sara kua na aye ni, me ala zia ti voro Nzapa so asara si aye kue abaa gigi. Ayeke nzoni azo agonda lo kpu na kpu! Amen.

1 Tesalonike 4:8

Ndani laa, zo so ake ti sara ye alingbi na atënë so, zo laa lo ke lo pepe, me lo ke Nzapa so ayeke mu Yingo-Vuru ti lo na ala.

1 Pierre 1:18

Ala wara nzoni ye oko pepe na lege ti sarango ye so ala mu na peko ti akotara ti ala. Me ala hinga awe ye so azi ala na ya ti sarango ye ni so, ye ni alingbi ti buba tongana nginza wala lôro pepe;

Awafango-ngbanga 10:6

Azo ti Israel akiri asara ye so ayeke sioni na le ti *KOTA GBIA: ala voro anzapa *Baal na *Astarte. Ala voro nga anzapa ti azo ti Sirii, ti Sidon, ti Moab, ti Amon na ti azo ti Filistii. Ala do KOTA GBIA azia si ala kiri avoro lo pepe.