Amos 1:2 - Mbeti ti Nzapa - Tënë so amu fini

² Amos atene: “Ti londo na hoto ti *Sion, KOTA GBIA ayeke toto tongana bamara; ti londo na Jérusalem, lo dekongo ngangu. Apere ti awabatango-nyama ahole kue awe, ndö ti hoto ti Karmel ahole kasakasa.”

Amos 1:2 ပူးပေါင်းရင်းမြစ်များ

Abia (Psaumes) 29:4

Go ti KOTA GBIA ayeke toto ngangu mingi; go ti KOTA GBIA ayeke fa nengo ti lo ti gbia.

Abia (Psaumes) 46:6

Nzapa ayeke na ya ti gbata ni; mbeni ye alingbi ti kinda ni oko pepe. Na ndaperere, kozoni si lâ asigigi, Nzapa ayeke ga ti mu maboko na azo ti gbata ni.

Amato 20:2

Ngonzo ti wâ ti gbia ayeke tongana toto ti bamara so ayeke zia kota mbeto na be ti zo; zo so asara si ngonzo ti gbia alondo, lo gi kuâ na tere ti lo wani.

Ésaïe 33:9

Sese ni ayeke na mua, ayeke hole holengo. Agbako ti Liban ahole kue si kamene ahon ndö ti ala. Lando ti Saron ahole kasakasa. Ahoto ti Bashan na ti Karmel, akeke ayeke daa mbeni pepe.

Ésaïe 35:2

Ayeke nzoni akongo ni amu ndö ti sese ni. Ayeke nzoni sese ni ahuru na ngia, lo dodo na ngia si lo dekongo na ngia! *KOTA GBIA amu na lo pendere ti hoto ti Liban awe, zango ti hoto ti Karmel na ti lando ti Saron. Tongaso, azo ayeke baa gonda ti KOTA GBIA, ala yeke baa nga zango ti Nzapa ti e.

Ésaïe 42:13

KOTA GBIA ayeke sigigi tongana kpengba turugu; lo yeke tongana zo ti tiringo bira so nzara ti tiringo bira ayeke kporo kporongo na be ti lo. Lo dekongo ti bira, lo dekongo ngangu si lo hon ndö ti awato ti lo.

Jérémie 12:4

Kodro ni ayeke ngba na mua ngbii asi lawa? Apere ti ayaka kue ayeke ngba ti hole ngbii asi lawa? Ndali ti sioni ti azo ti kodro ni, anyama na andeke ayeke kui kue. Azo ni ayeke tene: “Jérémie ayeke hunzi kozo ti e.”

Jérémie 14:2

“Kodro ti Juda ayeke na mua, agbata ti lo ayeke ti tingo. Azo ni ayeke sara mua, ala duti na sese. Demango tere ti Jérusalem ague ngbii asi na yayu.

Jérémie 25:30

KOTA GBIA akiri atene na mbi: “Mo tene peko ti atënë ti yanga ti mbi so kue na ala, mo tene: Na nduzu kâ, KOTA GBIA atoto ngangu tongana bamara; na ya ti da so a zia nde ndali ti lo, lo sara si azo ama go ti lo. Lo yeke toto tongana bamara na ndö ti sese so ayeke ti lo. Lo yeke dekongo na ndö ti azo ti kodro ni kue tongana azo so ayeke ko ale ti *vinye ti sara na vin.

Jérémie 28:8

Awayanga-Nzapa ayeke daa ngbene ye ngu na ngu kozoni na mbi nga kozoni na mo. Ala tene peko ti atënë ti yanga ti KOTA GBIA na ndö ti akodro mingi nga na ndö ti akota kodro-gbia. Ala tene tënë ti bira, ti sioni kpale na ti sioni kobela ti bubango kodro.

Jérémie 50:19

Me ti Israel, mbi yeke sara titene lo kiri na ndo ti tengo pere ti lo. Fade lo yeke wara kobe ti lo ti tengo ni na ndö ti hoto ti Karmel nga na ti Bashan; na sese ti ahoto ti Efraim nga na sese ti Galaad, lo yeke te ye, ya ti lo asi.

Osée 11:10

Azo so a gbu ala ague na ala na kodro wande, fade ala yeke tambula na peko ti KOTA GBIA. Fade lo yeke toto tongana bamara; tongana lo yeke toto, fade amolenge ti lo ayeke londo na mbage ti Do ti ga na dongo tere.

Osée 13:8

Mbi yeke ti na ndö ti ala tongana mama ti *urse so azo agbu amolenge ti lo ahon na ala; mbi yeke suru ya ti kate ti ala. Na ndo so mbi yeke daa, mbi yeke mene ala tongana ti mama ti bamara; anyama ti ngonda ayeke suru ya ti ala kete kete.

Joël 1:19

*KOTA GBIA, mbi dekongo na mo! Wâ agbi apere kue ti ngonda; menga ti wâ agbi akeke kue ti yaka.

Joël 2:11

Na dawa ti aturugu ti lo, KOTA GBIA asara si azo ama go ti lo. Aturugu so ayeke ma yanga ti lo ayeke gbani gbani si ala yeke na ngangu. Biani, lango ti KOTA GBIA ayeke kota lango mingi, lango so ayeke zia kota mbeto na be ti zo. Zo wa laa alingbi ti kanga be ti lo na ni, zo wa?

Amos 9:3

Tongana ala gue, ahonde tere ti ala na li ti hoto ti Karmel, mbi yeke gue ti gi ala si mbi yeke gboto ala kâ. Tongana ala linda na gbe ti kota ngu-ingo titene le ti mbi abaa ala pepe, mbi yeke tokua sioni ngbo ti gue ti te ala kâ.

Nahum 1:4

Lo suku na kota ngu-ingo si kota ngu-ingo ni ahole; lo sara titene *abale kue ahole. Tongaso apere so ayeke na sese ti Bashan na akeke ti hoto ti Karmel ahole; akongo ti pere ti hoto ti Liban ahole.

1 Samuel 25:2

Mbeni koli ayeke na kodro ti Maon. Lo yeke bata anyama ti lo na Karmel; lo yeke na amosoro mingi. Lo yeke na ataba saki ota na angasa saki oko. Lo yeke lani na Karmel titene a fâ kua ti tere ti anyama ti lo.