Amato 19:11 - Mbeti ti Nzapa - Tënë so amu fini

¹¹ Zo ti hingango ndo ayeke sara ngonzo hio hio pepe; tongana azo asara sioni na lo si lo baa ni tongana ye pepe, tongaso laa lo yeke ne tere ti lo.

Amato 19:11 ပူးပေါင်းရင်းမြစ်များ

2 Agbia 5:12

*Abale ti sese ti Damas, Abana na Parpar ayeke nzoni ahon ngu ti Israel pepe? Mbi lingbi fade ti sukula tere ti mbi kâ si tere ti mbi aga *nzoni pepe?” Naaman aturne tere ti lo si lo londo na ngonzo na be ti lo ti gue.

Amato 11:13

Zo so ayeke fono ti du mvene na li ti azo, lo yeke sigigi na atënë so ahonde. Me zo so mo lingbi ti zia be ti mo na ndö ti lo, lo yeke sigigi na tënë ni oko pepe.

Amato 12:16

Zo ti buba ayeke sara si azo ahinga ngonzo ti lo hio; me zo ti hango le ayeke honde ngonzo ti be ti lo.

Amato 14:29

Zo so asara ngonzo hio hio pepe, lo hinga ndo mingi; me zo so be ti lo ayeke wâ wâ, lo yeke fa buba ti lo na le ti azo.

Amato 15:18

Zo so be ti lo wâ wâ asara si papa alondo; me zo so ayeke kanga be ti lo asara si tiri akai.

Amato 16:32

Zo so ayeke sara ngonzo hio hio pepe, lo yeke nzoni lo hon mbeni ngangu zo ti bira. Zo so akanga anzara ti be ti lo, lo yeke nzoni lo hon zo so amu mbeni gbata na bira.

Amato 17:14

Tongo nda ti papa ayeke tongana zingo lege na kota ngu ti buba ndo; kozo titene tiri aga ngangu, mo zia lege ni!

Amato 20:22

Mo tene na be ti mo pepe, mo tene: “Sioni so a sara na mbi so, fade mbi yeke kiri peko ni si!” Me mo zia be ti mo na ndö ti KOTA GBIA, fade lo yeke soo mo.

Amato 20:3

Zo so ayoro tere ti lo na ya ti tiri pepe, lo yeke ne tere ti lo; me ti azo ti buba, tere ti ala ayeke do dongo ti li na ya ti tiri.

Amato 25:21

Tongana nzara asara wato ti mo, mo mu na lo kobe lo te; tongana nzara ti ngu asara lo, mo mu na lo ngu, lo nyon.

Amato 29:11

Zo ti buba ayeke fa polele ngonzo ti lo kue; me zo ti ndara ayeke kanga ngonzo ti lo, lo yeke sara nga si ngonzo ni ade.

Efeze 4:32

Ala sara nzoni na popo ti ala, ala baa mawa ti amba ti ala; ala zi tënë na li ti amba ti ala na popo ti ala tongana ti so Nzapa azi tënë na li ti ala, ngbanga ti gango so ala ga oko na Christ.

Jacques 1:19

A-ita ti mbi so mbi ye ala mingi, ala dabe ti ala na tënë so: alingbi zo oko oko azi mê ti lo hio ti ma na tënë, me alingbi lo tene tënë hio hio pepe, lo sara ngonzo hio hio pepe.