Ahebro 8:1 - Mbeti ti Nzapa - Tënë so amu fini

¹ Kota tënë so e ye ti luti na ndö ni ayeke so: e yeke na mara ti kota wayango-sandaga so, lo yeke duti na yayu na tere ti mbata ti Gbia Nzapa na mbage ti maboko ti lo ti koli, Nzapa so ngangu ti lo ahon ndoni.

Ahebro 8:1 ပူးပေါင်းရင်းမြစ်များ

1 Mbai 29:11

KOTA GBIA, mo yeke kota, mo yeke ngangu, mo lingbi na gonda, iri ti mo awu mingi, mo yeke gbia! Biani, aye so kue ayeke na yayu nga na ndö ti sese ayeke ti mo. KOTA GBIA, lengo-gbia ayeke ti mo si mo yeke na li ti aye kue.

Mbeti ti Job 37:22

Mbeni zango ndo tongana lôro alondo na mbage ti Banga aga; mbeni zango ndo so ayeke zia mbeto na be ti zo, angoro tere ti Nzapa.

Abia (Psaumes) 104:1

Mbi ye ti mu singila na *KOTA GBIA! *KOTA GBIA Nzapa ti mbi, mo yeke kota mingi! Mo yu gonda na nengo tongana bongo;

Abia (Psaumes) 110:1

Bia ti David. So tënë ti yanga ti *KOTA GBIA so lo tene na Kota Gbia ti mbi laa: “Duti na mbage ti maboko ti mbi ti koli, mbi yeke sara titene awato ti mo aga tongana mbata ti gbe ti gere ti mo si.”

Abia (Psaumes) 145:12

Ala yeke sara si azo ahinga akota ye so mo sara nga na lengo-gbia ti mo so ayeke na gonda si ayeke za zango so.

Abia (Psaumes) 21:5

Lo hunda na mo fini, mo mu ni na lo awe: fini so ayeke ninga si angba kpu na kpu.

Ésaïe 24:14

Tanga ti azo so angba na fini amu go ti ala na nduzu ti he bia, ala yeke fa gonda ti *KOTA GBIA; ala londo na ya ti akodro ti mbage ti Do si ayeke ga, ala yeke dekongo na ngia, ala tene:

Mishe 5:4

Lo wani laa lo yeke mu siriri na azo. “Tongana azo ti Asirii aga ti mu kodro ti e si ala li na ya ti ayangbo ti agbia ti e, fade e yeke tokua azo ti li ni mbarambara na amakonzi miombe ti tiri bira na ala.

Marc 16:19

Na peko ti so *Kota Gbia Jésus atene tënë so na ala awe, a mu lo, a gue na lo na yayu si lo duti na tere ti Nzapa na mbage ti maboko ti lo ti koli.

Efeze 6:20

Ataa so mbi yeke na da ti kanga, mbi yeke sara kua ti lembe ndali ti Nzoni Tënë. Ala sambela si mbi lingbi ti fa tënë ni na legeni, na mbeto pepe.

Kolose 3:1

So ala na Christ azingo na kuâ awe, ala gi lege ti wara aye so ayeke na yayu, ndo so Christ aduti na tere ti Nzapa na mbage ti maboko ti lo ti koli.

Ahebro 1:13

Laoko Nzapa atene nga na mbeni ange pepe, atene: “Ga mo duti na mbage ti maboko ti mbi ti koli, ngbii asi na ndembe so mbi yeke sara titene awato ti mo aga tongana mbata ti gbe ti gere ti mo si!”

Ahebro 1:3

Gonda ti Nzapa ayeke za na lege ti Molenge ni. Lo yeke taa tongana ti so Nzapa ayeke, lo yeke bata dunia so na ngangu ti tënë ti yanga ti lo. So lo sukula asiokpari ti azo awe, lo gue, lo duti na yayu, na tere ti Nzapa so ngangu ti lo ahon ndoni, na mbage ti maboko ti lo ti koli.

Ahebro 10:12

Me ti Christ, lo mu sandaga ni gi fani oko ti zi asiokpari ti azo si na pekoni, lo duti na tere ti Nzapa kpu na kpu, na mbage ti maboko ti lo ti koli.

Ahebro 12:2

Le ti e angba na ndö ti Jésus. Lo laa lo zi lege ti mabe na e si lo sara titene e ngba na lege ti mabe ni ngbii asi na ndani. Lo yeda si azo afâ lo na ndö ti keke ti kroa, lo sara kamene ti kuâ so lo kui na ndö ti keke ti kroa pepe. Lo yeda ndali ti so lo hinga kozoni so fade lo yeke duti na ngia. Fadeso, lo yeke duti na tere ti mbata ti Gbia Nzapa, na mbage ti maboko ti lo ti koli.

Ahebro 2:17

Ndani laa, alingbi fade lo ga tongana a-ita ti lo na ya ti aye kue. Tongaso, lo ga kota wayango-sandaga so ayeke baa mawa ti azo si lo yeke sara kua ti Nzapa na legeni, titene lo zi asiokpari ti azo.

Ahebro 3:1

Tongaso, a-ita azo ti Nzapa, ala so lo iri ala ti ga azo ti lo, ayeke nzoni ala baa ndo na Jésus, lo so Nzapa atokua lo titene lo ga kota wayango-sandaga ti mabe so e yeke fa tënë ni.

Ahebro 4:14

E yeke na kota wayango-sandaga so ahon atanga ni kue, lo gue ngbii lo si na le ti Nzapa kâ na yayu: ayeke Jésus, Molenge ti Nzapa. Nilaa, ayeke nzoni e gbu mabe ti e ngangu, mabe so e yeke fa tënë ni.

Aye so Nzapa afa 3:21

“Zo so aso benda, fade mbi yeke mu na lo lege ti duti na tere ti mbi, na ndö ti mbata ti mbi ti gbia, tongana ti so mbi so benda si mbi duti na tere ti Babâ ti mbi na ndö ti mbata ti lo ti gbia so.