Aggée 1:8 - Mbeti ti Nzapa - Tënë so amu fini

⁸ KOTA GBIA atene: “Ala gue na ndö ti hoto, ala de akeke aga na ni, ala sara na kota da ti mbi. Tongaso fade be ti mbi ayeke nzere si azo abaa nengo ti mbi.

Aggée 1:8 ပူးပေါင်းရင်းမြစ်များ

1 Agbia 6:1

Salomon ato nda ti sara kota da ti *KOTA GBIA na ngu ngbangbo osio na balemiombe na peko ti so azo ti Israel asigigi na sese ti Ezipte. Na ngoi so Salomon ato nda ti akua ni so, andaa lo to nda ti le-gbia na Israel asara ngu osio awe. Akua ti sarango kota da ni ato nda ni na nze ti Ziv, so ti tene na use nze ti ngu ni.

1 Agbia 9:3

KOTA GBIA atene na lo: “Mbi ma sambela ti mo na vorongo tere ti mo awe. Kota da so mo sara so, mbi zia ni nde ndali ti mbi titene mbi duti daa kpu na kpu na popo ti ala. Fade le ti mbi na nzoni be ti mbi ayeke ngba daa lakue.

1 Mbai 22:19

Tongaso, ala mu be ti ala na fini ti ala kue ti gi KOTA GBIA Nzapa ti ala. Ala londo, ala sara da so a zia ni nde ndali ti KOTA GBIA Nzapa; fade ala yeke mu sanduku ti *mbuki ti KOTA GBIA na aye so a zia nde ndali ti Nzapa ti zia na ya ti da so ala sara ndali ti lo.”

2 Mbai 7:16

Mbi soro da so si mbi zia ni nde ndali ti mbi titene iri ti mbi angba na ndö ni kpu na kpu. Fade le ti mbi na nzoni be ti mbi ayeke ngba na ndö ni lakue.

Esdras 3:7

Ala mu nginza na azo ti dengo tere ti têne nga na asarapande. Ala mu kobe ti tengo ni, ye ti nyongo ni nga na mafuta na azo ti Sidon na ti Tir titene ala tokua ndo si a mu akeke ti sedre ti Liban aga na ni na le ti kota ngu-ingo ngbii asi na Zafa. Ala sara tongaso, ngbanga ti so Sirus, gbia ti Perse amu lege na ala.

Esdras 6:4

A yeke leke ni na akota têne so a de tere ni dengo; a yeke zia molongo ti atêne ni ota; na peko ni, a yeke zia molongo ti yongoro keke oko. Ala yeke futa akua ni na nginza ti da ti mosoro ti gbia.

Sigingo 29:43

“Mbi yeke wara azo ti Israel na ndo so; gonda ti mbi ayeke sara si ndo ni ayeke duti nde si aduti nzoni kue.

Ésaïe 60:13

Apendere keke so ayeke mu gonda na gbako ti Liban, akeke nde nde ti sarango na da a yeke ga na ndo ti mo; ayeke sara si ya ti kota da ti mbi so ayeke nde si ayeke nzoni kue aga pendere. Mbi yeke sara si ndo so mbi zia gere ti mbi daa awara gonda.

Ésaïe 60:7

Angasa na ataba ti Kedar ayeke bongbi na ndo ti mo. Akoli-taba ti Nebayot ayeke ga ye ti kua ti mo. A yeke zia ala na ndö ti gbalaka ti KOTA GBIA, *sandaga tongaso laa ayeke nzere na lo. Sandaga ni ayeke mu nengo na kota da ti lo.

Ésaïe 66:11

Tongaso, fade lo yeke mu na ala ye so ayeke de be ti ala. Ala yeke duti tongana kete molenge so anyon me ti mama ti lo, ya ti lo asi, tongana kete molenge so agboto ngu ti me ti mama ti lo na ngia.

Aggée 1:7

Tënë so KOTA GBIA so ayeke na ndö ti dunia kue atene ayeke so: Ala gbu li ti ala nzoni na ndö ti aye so ayeke si na ala.”

Aggée 2:7

Fade mbi yeke yingi amara kue si apendere ye ti ala ayeke ga ge gbani gbani. Fade mbi yeke sara titene gonda asi singo na ya ti kota da so; tënë so KOTA GBIA atene laa.

Aggée 2:9

Tongaso, fade gonda ti kota da so ayeke hon gonda ti kozo da ni. Na ndo so, mbi yeke sara titene siriri aduti daa; so tënë ti yanga ti KOTA GBIA so ayeke na ndö ti dunia kue laa.”