2 Tesalonike 2:3 - Mbeti ti Nzapa - Tënë so amu fini

³ Ala zia zo oko ahanda ala na mbeni tënë pepe. Biani, kozoni si lango so alingbi, fade ambeni ye ayeke si: gba ti azo ayeke zia lege ti Nzapa, Zo ti sioni ayeke si, lo so a yeke buba ande lo na ndo so wâ ayeke gbi daa lakue.

2 Tesalonike 2:3 ပူးပေါင်းရင်းမြစ်များ

Daniel 11:36

‘Fade gbia ni ayeke sara gi ye so be ti lo aye; lo yeke gonda tere ti lo mingi si lo yeke baa tere ti lo kota ahon anzapa. Lo yeke tene atënë so akpa titene zo atene pepe na tere ti Nzapa so ahon anzapa kue. Aye so kue gbia ni ayeke sara ayeke ga nzoni na lo ngbii asi na ngoi so ngonzo ti Nzapa ayeke si na ndani. Tongaso, fade Nzapa ayeke sara ye so lo leke na be ti lo ti sara.

Daniel 7:25

lo yeke tene asioni tënë na tere ti Nzapa so ayeke na yayu kâ na ndö ti aye kue si lo yeke sara ngangu na azo so Nzapa asoro ala. Lo yeke leke na be ti lo ti sanze alango ti nze nga na andia ti azo ti Nzapa. Fade a yeke zia azo ti Nzapa na maboko ti gbia ni na ya ti ngu ota na ndambo.

Daniel 8:25

Ndali ti so lo yeke na mayere mingi, lo yeke wara lege ti handa azo. Ndali ti baba so asi be ti lo singo, lo yeke fâ gba ti azo so aduti si ala hinga atene, mbeni sioni ye ayeke ga na ndö ti ala pepe so. Lo yeke londo ti sara bira na Makonzi ti amakonzi. Na ndembe ni so, fade a yeke fâ lo, me zo laa ayeke fâ lo pepe.

Jean 17:12

So mbi yeke lani na tere ti ala, mbi bata ala na lege ti ngangu ti iri ti mo so mo mu na mbi. Mbi bata ala si zo oko na popo ti ala agirisa pepe, gi lo so a yeke buba ande lo biani biani so, tongaso si tënë ti Mbeti ti Nzapa aga taa-tënë.

1 Korente 6:9

Ala hinga pepe? Azo ti sarango sioni, fade *Kodro-gbia ti Nzapa ayeke ga ti ala pepe. Ala handa tere ti ala pepe: azo ti gingo wali wala gingo koli kirikiri, azo ti vorongo anzapa nde, azo ti gingo wali wala koli ti amba ti ala, akoli so ayeke lango na amba ti ala akoli,

Efeze 5:6

Ala zia mbeni zo ahanda ala na asenge senge tënë pepe. Asioni ye tongaso asara si ngonzo ti Nzapa ayeke ga na ndö ti azo so ake yanga ti lo.

1 Jean 2:18

Amolenge ti mbi, ngbonga ti ndani alingbi awe! Ala ma ando atene, Wato ti Christ ayeke ga. Andaa awato ti Christ asi singo fadeso. Tongaso e hinga, e tene, ngbonga ti ndani alingbi awe.

1 Jean 4:3

Me zo so kue abere tënë so, lo yeke na yingo so alondo na Nzapa pepe; yingo ni ayeke yingo ti Wato ti Christ. Ala ma a tene, fade yingo ni ayeke ga; fadeso, lo yeke na dunia so awe.

Aye so Nzapa afa 17:11

Nyama so ayeke ando na fini si lo de na fini mbeni pepe so, ayeke nga mbeni gbia ti miombe ni. Lo yeke oko ti agbia mbarambara so, lo yeke gue ti lo titene a buba lo biani.

Aye so Nzapa afa 17:8

Nyama so mo baa lo so ayeke ando na fini, me lo yeke na fini mbeni pepe. Lo yeke londo ande na ya ti *kota du so alinda mingi si lo yeke sigigi titene a buba lo biani biani. Fade li ti azo ti sese ayeke kpe na bango nyama ni, so ti tene azo so, ngbene ye so dunia abaa gigi, iri ti ala ayeke na ya ti mbeti pepe, mbeti so a su iri ti azo so ayeke na taa fini daa. Biani, nyama ni ayeke ando na fini, me fadeso lo yeke na fini mbeni pepe; fade lo yeke kiri ti ga.