2 Samuel 16:21 - Mbeti ti Nzapa - Tënë so amu fini

²¹ Ahitofel akiri tënë na Absalom: “Ambeni wali so babâ ti mo azia ala ti bata yangbo so, ayeke nzoni mo gue, mo lango na ala. Tongaso si azo ti Israel ahinga atene, mo ga sioni na le ti babâ ti mo awe si be ti azo so amu peko ti mo so akpengba.”

2 Samuel 16:21 ပူးပေါင်းရင်းမြစ်များ

Tongo nda ti aye 34:30

Tongaso Jacob atene na Siméon nga na Lévi: “Ala ga na tënë na tere ti mbi, ngbanga ti so ala sara si mbi ga sioni na le ti azo ti kodro ti Kanaan na ti Perizi. E yeke mingi pepe. Fade azo ni ayeke bongbi na ndö ti e si ala yeke fâ mbi, ala yeke hunzi mbi na azo ti sewa ti mbi kue.”

Tongo nda ti aye 35:22

Na ndembe so Israel ayeke duti na sese so, Ruben ague, alango na Bila, mbeni wali ti babâ ti lo. Israel ama tënë ni. Amolenge ti Jacob ti koli kue ayeke baleoko na use.

Tongo nda ti aye 38:16

Juda ahinga ti lo atene so wali ti molenge ti lo pepe, lo gue na mbage ti lo na tere ti lege si lo tene na lo: “Mo ga, mbi ye ti duti na mo.” Wali ni ahunda lo, atene: “Nyen laa mo yeke mu na mbi titene mo duti na mbi?”

Tongo nda ti aye 6:4

Ayongoro yongoro zo ayeke na ngoi ni na ndö ti sese. Na ndembe so amolenge-koli ti Nzapa ague, amu amolenge-wali ti azo si adu na ala so, andaa ayongoro zo ni angba; ala laa asara akota ye ando si iri ti ala awu mingi.

2 Samuel 10:6

Azo ti Amon ahinga atene, ala ga sioni na le ti David awe. Ala futa aturugu 20 000 ti Sirii ti Bet-Rehob nga na ala ti Soba; aturugu ti gbia Maaka 1 000 na ala ti Tob 12 000.

2 Samuel 12:11

Tënë so KOTA GBIA atene ayeke so: Mbi yeke sara titene mbeni ye ti sioni alondo na da ti mo wani si awara mo. Fade mbi yeke mu awali ti mo na le ti mo ti mu na mbeni koli so mo hinga lo nzoni; koli ni ayeke lango na awali ti mo na kota lâ.

2 Samuel 13:5

Yonadab atene na lo: “Lango na ndö ti gbogbo ti mo, sara tongana zo so tere ti lo aso. Tongana babâ ti mo aga ti baa mo, fade mo tene na lo: ‘Zia lege na ita ti mbi ti wali Tamar aga ato na mbi kobe. Fade lo to kobe ni na le ti mbi; lo wani, lo mu kobe ni na mbi si mbi te.’ ”

2 Samuel 15:16

Tongaso, gbia na asongo ti lo kue asigigi na yangbo ti gbia na gere si ala hon. Gbia azia gi ambeni wali ti lo baleoko ti bata yangbo ni.

2 Samuel 16:20

Absalom atene na Ahitofel: “Ala gbu li ti ala na ndö ti ye so e lingbi ti sara.”

2 Samuel 17:7

Hushai akiri tënë na Absalom, atene: “Ti so ni, wango so Ahitofel amu so ayeke nzoni pepe.

2 Samuel 2:7

Ala gbu ngangu, ala sara ye ti koli! Gbia ti ala Saul akui awe; me mbi laa azo ti Juda atuku mafuta na li ti mbi titene mbi ga gbia ti ala.”

2 Samuel 20:3

So gbia David asi na yangbo ti lo na Jérusalem awe, lo mu ambeni wali ti lo baleoko so lani lo zia ala ti bata yangbo so, lo zia ala na ya ti mbeni da so azo ayeke bata ni nzoni. Lo yeke mu na ala aye so kue alingbi na ala, me lo na ala aduti koli na wali pepe. A kanga ala na ya ti da ni ngbii asi na lango so ala kui na ni. Ala yeke tongana awali-mua, ataa so koli ti ala angba na fini.

1 Agbia 11:25

Na ndö ti sioni so Hadad asara, Rezon ayeke wato ti azo ti Israel na lango so kue Salomon angba na fini. Be ti Rezon ake azo ti Israel na ngoi so kue lo ngba ti le-gbia na sese ti Sirii.

1 Agbia 2:17

Adonia atene: “Mbi gbu gere ti mo, mo gue, mo tene na gbia Salomon, mo tene: ‘Mbi ye titene lo mu na mbi Abishag, zo ti gbata ti Shunem titene lo ga wali ti mbi’ Fade gbia ayeke ke tënë ni na mo pepe.”

1 Agbia 2:22

Gbia Salomon akiri tënë na mama ti lo, atene: “Mo hunda ti mu Abishag, zo ti gbata ti Shunem na Adonia ti ga wali ti lo ngbanga ti nyen? Tongaso mo hunda fafadeso titene a mu na lo komandema ma, ngbanga ti so lo yeke yaya ti mbi! Hunda komandema ni gi na lo oko pepe, me nga na azo so amu peko ti lo, wayango-sandaga Abiatar na Yoab, makonzi ti aturugu!”

Awayango-sandaga 18:8

“Alingbi mo lango na wali ti babâ ti mo pepe; so ziango kamene na le ti babâ ti mo laa.

Awayango-sandaga 20:11

“Tongana mbeni koli alango na wali ti babâ ti lo, andaa lo zia kamene na le ti babâ ti lo awe. Fade a yeke fâ ala use kue, koli ni na wali ni; ngbanga ti mene ti ala ayeke kiri na li ti ala wani.

Zakarii 8:13

Ala, akodro-gbia ti Juda na ti Israel, na popo ti amara kue, ala yeke lani tapande ti mbeni mara so a deba lo. Me fadeso, mbi soo ala, ala yeke ga tapande ti mbeni mara so a sara tufa na ndö ti lo. Ala sara mbeto pepe, ala gbu ngangu!”

1 Korente 5:1

Na ndo kue, azo ayeke ma a tene, gingo wali wala gingo koli kirikiri ahon ndoni na popo ti ala. Ataa na popo ti azo so ahinga Nzapa pepe, mbeni zo ti sarango mara ti ye tongaso ayeke daa pepe! Azo atene, mbeni zo na popo ti ala ayeke duti na wali ti babâ ti lo!

1 Samuel 13:4

Azo ti Israel kue ama a tene, Saul afâ mbeni govoronere ti azo ti Filistii si azo ti Filistii ni asara ngonzo na tere ti azo ti Israel. Tongaso aturugu kue abongbi ti mu peko ti Saul na kodro ti Gilgal.

1 Samuel 27:12

Akish azia be ti lo kue na ndö ti David si lo tene na be ti lo, lo tene: “Lo kara azo ti Israel, azo ti mara ti lo awe. Fade lo yeke ngba ti sara kua na mbi kpu na kpu.”