2 Pierre 3:7 - Mbeti ti Nzapa - Tënë so amu fini

⁷ Me gi na lege ti oko tënë ti yanga ti Nzapa laa, lo yeke bata yayu na sese so e yeke baa fadeso ti gbi ni na wâ. Lo yeke bata ni ti ku lango ti fango ngbanga na li ti azo ti sioni, lango so ala yeke kui biani biani.

2 Pierre 3:7 ပူးပေါင်းရင်းမြစ်များ

Abia (Psaumes) 102:26

Mo laa mo lu gere ti sese ando giriri, yayu ayeke ye so maboko ti mo asara.

Abia (Psaumes) 50:3

“Ayeke nzoni Nzapa ti e aga! Lo kanga yanga ti lo pepe!” Mbeni wâ so ayeke gbi aye kue ayeke na dawa ti lo, mbeni ngangu pupu angoro tere ti lo kue.

Ésaïe 51:6

Ala yo le ti ala, ala baa ndo na yayu, na pekoni, ala baa ndo na sese: fade yayu ayeke hon tongana guru ti wâ, sese ayeke buba tongana gbagba bongo, azo ti ndö ti sese ni ayeke kui tongana avuma. Me zingo azo ayeke ngba kpu na kpu, songo azo so mbi yeke ga ti soo ala ayeke ngba lakue lakue.

Ésaïe 66:15

Biani, KOTA GBIA ayeke ga na ya ti wâ, apusu ti mbarata ti lo ayeke tongana kota pupu. Lo yeke ga ti fa sioni ngonzo ti lo, ti suku na azo na lege ti menga ti wâ.

Daniel 7:9

“So mbi ngba ti baa ndo, a zia ambata ti gbia si mbeni mbakoro aga aduti na ndö ti mbeni oko: bongo ti lo avuru tongana tukia; kua ti li ti lo avuru tongana kua ti tere ti taba so zende oko ayeke daa pepe. Mbata ti lo aza tongana menga ti wâ; agere ti mbata ni ayeke tongana wâ so aza mingi.

Sofonii 3:8

So tënë ti yanga ti KOTA GBIA laa: Ala ku mbi! Ala ku lango so mbi yeke ga ti sigigi na nda ti ala. Mbi leke na be ti mbi ti bongbi amara kue, ti bongbi akodro ti agbia kue, ti fâ ngbanga na li ti azo ni, ti tuku ngonzo ti mbi ti wâ na ndö ti ala. Biani, mbanda ti mbi so ayeke londo tongana wâ ayeke gbi sese kue.”

Matthieu 10:15

Mbi tene na ala taa-tënë: na lango ti fango ngbanga, fade ngbanga so a yeke fâ na li ti azo ti gbata so ayeke ngangu mingi ahon ti azo ti akodro ti Sodome na Gomore.”

Matthieu 11:22

Ndani laa, mbi tene na ala: na lango ti fango ngbanga, fade a yeke fâ ngbanga ngangu na li ti ala ahon ti Tir na ti Sidon.

Matthieu 11:24

Ndani laa, mbi tene na ala: na lango ti fango ngbanga, fade a yeke fâ ngbanga ngangu na li ti ala ahon ti Sodome.”

Matthieu 12:36

Mbi tene na ala: na lango ti fango ngbanga, fade azo ayeke kiri tënë na ndö ti asenge senge tënë so kue ala tene ando.

Matthieu 24:35

Fade yayu na sese ayeke hon, me atënë ti mbi ayeke hon oko pepe.”

Matthieu 25:41

“Na pekoni, fade Gbia ni ayeke tene na azo so ayeke na mbage ti maboko ti lo ti wali: ‘Ala hon yongoro na tere ti mbi, ala so Nzapa adeba ala awe so! Ala gue na ya ti kota wâ so ayeke gbi lakue lakue, so a leke ni ndali ti Zabolo na *a-ange ti lo.

Marc 6:11

Tongana azo ti mbeni kodro ake ti yamba ala, wala aye ti ma tënë ti ala pepe, ala londo na ndo ni so ahon. Ala pika sese ti gbe ti gere ti ala ti fa na azo ni so ala sara sioni awe.”

Jean 12:48

Zo so ake mbi si lo ke nga atënë ti mbi, mbeni ye ti fango ngbanga na li ti lo ayeke daa: atënë so mbi tene laa ayeke fâ ngbanga na li ti lo na lango ti ndani.

Rome 2:5

Me be ti mo akpengba si mo ye ti zia ngbene lege ti sarango ye ti mo ni pepe. Ndani laa mo yeke bongbi gba ti ngonzo ti Nzapa na ndö ti mo ti ku na lango ti ngonzo ti ndani. Na lango ni so, lo yeke fa so fango ngbanga ti lo ayeke mbirimbiri,

1 Korente 3:13

Fade a yeke fa kua ti zo oko oko na le ti azo kue na lango ti fango ngbanga. Na lango ni so, fade wâ ayeke tara kua ti zo oko oko ti fa wala kua ni ayeke nzoni wala sioni.

Filipe 1:28

Ala mu lege na awato ti ala ti zia mbeto na be ti ala oko pepe. So laa ayeke fa atene, lege ti awato ti ala ni ayeke gue na ala na kuâ; me ti ala, azo ti Filipe, ye ni ayeke ga ande ye ti songo ala na kuâ, ngbanga ti so Nzapa laa asara titene ala soo kuâ.

2 Tesalonike 2:3

Ala zia zo oko ahanda ala na mbeni tënë pepe. Biani, kozoni si lango so alingbi, fade ambeni ye ayeke si: gba ti azo ayeke zia lege ti Nzapa, Zo ti sioni ayeke si, lo so a yeke buba ande lo na ndo so wâ ayeke gbi daa lakue.

1 Timothée 6:9

Me ti azo so aye ti wara mosoro mingi, mosoro ni ahanda ala si ala ti. Nzara ti abuba ye nde nde ti sioni agbu ala tongana gbanda. Aye ni so ayeke buba azo si ayeke gue na ala na kuâ.

Ahebro 12:29

Biani, Nzapa ti e ayeke tongana mbeni wâ so ayeke gbi ye kue.

2 Pierre 2:9

so ti tene, *Kota Gbia alingbi ti zi azo so amu tere ti ala kue na lo na ya ti ye ti tarango be si lo yeke bata azo ti kirikiri ti fâ ngbanga na li ti ala na lango ti fango ngbanga.

2 Pierre 3:10

Lango ti gango ti Kota Gbia ayeke duti tongana gango ti zo ti nzi. Na lango ni so, nduzu ayeke hon si toto ni ayeke duti ngangu mingi; wâ ayeke gbi aye so ayeke na le ti nduzu, sese na aye so kue ayeke na ndö ni ayeke ngba pepe.

2 Pierre 3:12

Ala so ayeke ku lango ti gango ti Nzapa si ala ye titene aga hio so, lango ni ayeke lango so wâ ayeke gbi nduzu si ayeke buba ni kue. Ndali ti ngangu ti wâ ni, aye so kue ayeke na le ti nduzu ayeke ga ngu.

1 Jean 4:17

Tongana ndoye so ayeke na be ti e alingbi kue, na lango ti kota ngbanga, be ti e ayeke do pepe, ngbanga ti so dutingo ti e na dunia so ayeke tongana ti Jésus Christ.

Jude 1:7

Ala dabe ti ala na azo ti agbata ti Sodome na Gomore nga na ambeni kodro so ayeke na tere ni: azo ni asara asioni ye tongana ti a-ange so, ala mu be ti ala kue ti sara gi aye ti ndumba, ala sara asioni ye so akpa titene zo asara pepe. Fadeso ala yeke baa pasi na ya ti wâ so ayeke gbi lakue lakue; ala ga tapande ndali ti azo kue.

Aye so Nzapa afa 17:11

Nyama so ayeke ando na fini si lo de na fini mbeni pepe so, ayeke nga mbeni gbia ti miombe ni. Lo yeke oko ti agbia mbarambara so, lo yeke gue ti lo titene a buba lo biani.

Aye so Nzapa afa 17:8

Nyama so mo baa lo so ayeke ando na fini, me lo yeke na fini mbeni pepe. Lo yeke londo ande na ya ti *kota du so alinda mingi si lo yeke sigigi titene a buba lo biani biani. Fade li ti azo ti sese ayeke kpe na bango nyama ni, so ti tene azo so, ngbene ye so dunia abaa gigi, iri ti ala ayeke na ya ti mbeti pepe, mbeti so a su iri ti azo so ayeke na taa fini daa. Biani, nyama ni ayeke ando na fini, me fadeso lo yeke na fini mbeni pepe; fade lo yeke kiri ti ga.

Aye so Nzapa afa 20:11

Na pekoni, mbi kiri mbi baa mbeni kota vuru mbata ti gbia. Mbi baa nga lo so ayeke duti na ndö ni so. Sese na yayu alondo na dawa ti lo, akpe ahon, a kiri a baa ala mbeni pepe.

Aye so Nzapa afa 21:1

Na pekoni, mbi baa fini yayu na fini sese. Kozo yayu na kozo sese ahon awe si kota ngu-ingo ayeke daa mbeni pepe.