2 Mbai 6:27 - Mbeti ti Nzapa - Tënë so amu fini

²⁷ mo KOTA GBIA so mo yeke na yayu, ayeke nzoni mo ma ala si mo zi siokpari na li ti azo ti kua ti mo nga na li ti azo ti Israel, azo ti mo. Mo fa na ala nzoni lege titene ala tambula daa. Na pekoni, sara si ngu-Nzapa apika na ndö ti sese so mo mu na ala si aga ti ala so.

2 Mbai 6:27 ပူးပေါင်းရင်းမြစ်များ

Zakarii 10:1

Ala hunda na *KOTA GBIA titene lo tokua na ala tanga ti ngu-Nzapa. KOTA GBIA laa ayeke sara si ngangu pupu ti ngu-Nzapa aya; fade lo yeke sara nga titene ngu-Nzapa apika mingi si lo yeke sara titene kugbe ti kasa amai na yaka ti zo oko oko.

Jérémie 5:24

Ala tene na be ti ala pepe, atene: ‘Ayeke nzoni e kpe mbeto ti KOTA GBIA, Nzapa ti e, lo so lo yeke mu na e ngu-Nzapa na ngoi ni so alingbi: ngu-Nzapa ti kozo ngoi, ngu-Nzapa ti ndangba ngoi. Na ya ti ngu oko oko, lo laa lo yeke bata na e ngoi ti kongo ale ti kobe.’

Abia (Psaumes) 94:12

KOTA GBIA, ti lo nzoni, zo so mo fa nzoni lege na lo, zo so mo fa ye na lo na lege ti *Ndia ti mo!

Jean 6:45

Awayanga-Nzapa asu na mbeti, atene: ‘Fade Nzapa ayeke fa ye na azo kue.’ Zo so ama tënë ti Babâ si lo yeda ti manda ye so Babâ afa na lo, zo tongaso laa ayeke ga na mbi;

Mishe 4:2

Fade amara nde gbani gbani ayeke gue kâ si ala yeke tene: ‘Ala ga, e gue na li ti hoto ti KOTA GBIA, na kota da ti Nzapa ti Jacob. Lo yeke fa na e lege so lo ye titene e mu, e yeke tambula na alege ti lo.’ Biani, ndia ti KOTA GBIA alondo na *Sion, tënë ti lo alondo na Jérusalem.

Joël 2:23

Ala azo so ayeke lango na *Sion, ala dodo na ngia, ala duti na ngia ndali ti KOTA GBIA, Nzapa ti ala. Na peko ti buru, lo yeke tokua na ala ngu-Nzapa ti zi ala na ya ti kpale, lo yeke tokua na ala ngu-Nzapa alingbi na angoi ni tongana ti kozoni.

Ezekiel 34:26

Mbi yeke sara tufa na ndö ti ala nga na ndö ti ando nde nde so ayeke na tere ti hoto ti mbi. Mbi yeke sara titene ngu-Nzapa apika na ngoi ni, ngu-Nzapa so ayeke sara nzoni na zo.

Jérémie 42:3

Ayeke nzoni KOTA GBIA, Nzapa ti mo afa na e lege so e lingbi ti mu nga na ye so e lingbi ti sara.”

Jérémie 14:22

Na popo ti asenge senge ye ti amara nde, mbeni yanda oko ayeke daa so alingbi ti sara si ngu apika? Yayu laa asara si ngu ayeke pika? KOTA GBIA Nzapa ti e, mo laa mo sara ye so pepe? E zia be ti e ti ku mo, ngbanga ti so mo laa mo sara aye so kue.”

Jérémie 6:16

Tënë so KOTA GBIA atene ayeke so: Lege so ala ngba ti gue daa so, ala luti kete si: ala baa ndo, ala hunda ndo na ndö ti lege so azo amu ando so: ‘Nzoni lege ayeke na ndo wa?’ Ayeke nzoni ala mu lege ni so, tongaso si fade ala duti na siriri. Me ala kiri tënë: ‘E ye ti mu lege so pepe!’

Ésaïe 30:21

Na ndembe so mo ye ti hon na mbage ti maboko ti koli wala na mbage ti maboko ti wali, mo yeke ma na peko ti mo mbeni go so ayeke tene: “Baa lege ni laa, mo mu ni!”

Abia (Psaumes) 119:33

KOTA GBIA, fa na mbi lege ti ambela ti mo si mbi bata ni ngbii asi na ndani.

Abia (Psaumes) 68:9

Na ngoi ni so, sese ayingi, ngu ti nduzu atuku na dawa ti mo Nzapa, Nzapa ti Sinai, na dawa ti mo Nzapa, Nzapa ti Israel.

Abia (Psaumes) 25:12

Tongana mbeni zo akpe mbeto ti KOTA GBIA, fade KOTA GBIA ayeke fa na lo lege so lo lingbi ti soro ni.

Abia (Psaumes) 25:8

KOTA GBIA ayeke nzoni si lo yeke mbirimbiri, nilaa lo yeke fa nzoni lege na azo ti siokpari.

2 Mbai 7:14

tongana azo ti mbi so a di iri ti mbi na ndö ti ala asara tere ti ala kete, ala sambela mbi, ala gi le ti mbi si ala zia sioni lege ti sarango ye ti ala, mbi so mbi yeke na yayu kâ, fade mbi yeke ma sambela ti ala, mbi yeke zi siokpari na li ti ala si mbi yeke sara titene kodro ti ala aga nzoni.

Joël 2:12

So tënë ti yanga ti *KOTA GBIA laa: “Fadeso, ngoi titene ala kiri na mbage ti mbi na be ti ala kue laa; ala ke kobe ti sambela, ala toto, ala dema tere ti ala na mbi!

Joël 2:13

Ala suru bongo ti ala pepe, me ala suru be ti ala.” Biani, ala kiri na KOTA GBIA, Nzapa ti ala; lo yeke sara nzoni be na zo si lo yeke baa mawa ti zo, lo yeke sara ngonzo hio hio pepe, nzoni be ti lo asi singo. Sioni so lo leke na be ti lo ti sara na zo, lo yeke ke ti sara ni.