2 Mbai 34:3 - Mbeti ti Nzapa - Tënë so amu fini

³ Na ya ti ngu miombe so Yosias ale-gbia, so lo de maseka, lo to nda ti gi Nzapa ti kotara ti lo David. Na ngu baleoko na use ni, lo to nda ti sara si Juda na Jérusalem aga *nzoni: lo zi ando so azo aleke na ndö ti ahoto ti voro anzapa nde daa, akeke so a leke si aluti na nduzu ndali ti nzapa-wali *Ashera nga na ayanda so a leke na keke na ayanda so a kporo wen si a leke na ni.

2 Mbai 34:3 ပူးပေါင်းရင်းမြစ်များ

1 Agbia 13:2

Zo ti Nzapa ni ato nda ti tene tënë ti KOTA GBIA na tere ti gbalaka ni, lo tene: “Gbalaka! Gbalaka! Tënë so KOTA GBIA atene ayeke so: Fade a yeke du molenge-koli na ya ti sewa ti David; iri ti lo ayeke duti Yosias. Awayango-sandaga ti ando so a leke na ndö ti ahoto ti gbi asandaga daa so, lo yeke gbi ala na ndö ti mo, gbalaka ni. Fade a yeke gbi nga abio ti azo na ndö ti mo!”

2 Agbia 10:27

Na pekoni, ala kungbi na sese ngbongboro têne so ala leke aluti na nduzu ndali ti Baal so, ala kungbi nga da ti nzapa Baal ni na sese. Ala sara si da ni aga mbeni kabinee ndali ti azo ti lege. Kabinee ni angba ngbii asi laso.

2 Agbia 18:4

Ando so azo aleke na ndö ti ahoto ti voro anzapa nde daa, Ezekias azi ni. Angbongboro têne so azo aleke ni aluti na nduzu, lo kungbi ni na sese; lo fâ na sese akeke so a leke si aluti na nduzu ndali ti nzapa-wali *Ashera; ngbo so Moïse amu bengba wen si aleke na ni, lo fâ ya ni. Biani, azo ti Israel angba ti zö dukani na dawa ti ngbo ni so ngbii asi na ngoi ni kâ. Ala di iri ti ngbo ni Nehushtan.

2 Agbia 20:5

“Kiri, mo tene na Ezekias, makonzi ti azo ti mbi, mo tene: Tënë so KOTA GBIA, Nzapa ti David, kotara ti mo atene ayeke so: ‘Mbi ma sambela ti mo awe, mbi baa ngu ti le ti mo awe. Baa, mbi yeke kai kobela ti mo. Na peko ti lango ota, mo yeke kiri ti gue na ya ti kota da ti KOTA GBIA.

2 Agbia 23:14

Yosias afâ ya ti angbongboro têne so a leke si aluti na nduzu, lo de na sese akeke so a leke ndali ti Ashera. Lo mu abio ti akuâ, lo zia na ndö ni.

2 Agbia 23:4

Gbia amu yanga na kota wayango-sandaga Hilkia, na awayango-sandaga so ayeke mu maboko na lo nga na azo so ayeke bata yanga ti kota da ti Nzapa titene aye so a leke ando ti voro na Baal, na Ashera nga na aye mingi mingi so ayeke na le ti nduzu, ala sigigi na ni na ya ti da ni, ala gbi ni na gigi ti gbata ti Jérusalem, na popo-hoto ti Sedron. Na pekoni, ala mu mburu ti wâ ni, ala gue na ni na Betel.

1 Mbai 22:5

David atene na be ti lo: “Molenge ti mbi Salomon angba maseka, ade lo kpengba pepe. Kota da so fade a yeke sara ndali ti *KOTA GBIA so, alingbi akono si apendere; alingbi nga titene sango ni asi na ya ti akodro kue. Fade mbi yeke leke aye ti sarango na da ni ti ku na lo.” Tongaso David aleke aye mingi ndali ti kota da ni kozoni si lo kui.

1 Mbai 28:9

– Ti mo, molenge ti mbi Salomon, ayeke nzoni mo hinga Nzapa ti babâ ti mo; mo sara na lo na be ti mo kue, tere ti mo ayapu na kua, ngbanga ti so KOTA GBIA laa ayeke baa ya ti be ti zo si lo hinga tënë ti be ti zo. Tongana mo gi lo, fade lo yeke zia lege na mo ti wara lo; me tongana mo zia lo, fade lo yeke ke mo kpu na kpu.

1 Mbai 29:1

Gbia David atene na bongbi ti azo ni kue: “Molenge ti mbi Salomon ayeke zo so Nzapa asoro lo, lo ngba maseka si ade lo kpengba pepe. Andaa kua ni akono mingi, ngbanga ti so a yeke sara yangbo ni ndali ti zo pepe, me a yeke sara ni ndali ti *KOTA GBIA Nzapa.

2 Mbai 14:6

Lo tene na azo ti Juda: “E sara angangu gbagba na tere ti agbata so, e sara agbagba na tere ni, e sara akota da so ayo na nduzu, e zia angbongboro wen na yanga ni ti kanga na ni; e sara ni na ndembe so kodro ni ade ti e so. Biani, e gi KOTA GBIA, Nzapa ti e; nilaa lo sara si e duti kpoo mbage na mbage kue so.” Tongaso ala sara agbata si aye ti ala aga nzoni.

2 Mbai 15:2

Lo gue, lo wara Asa si lo tene na lo: “Gbia Asa, mo na azo ti Juda nga na azo ti Benjamin kue, ala ma mbi si! *KOTA GBIA ayeke na ala, tongana ala yeke na lo. Tongana ala gi lo, fade lo yeke zi lege na ala ti wara lo; me tongana ala zia lo, fade lo nga lo yeke zia ala.

2 Mbai 30:14

Ala to nda ti zi agbalaka so a yeke mu *asandaga na ndö ni na Jérusalem; ala zi nga agbalaka so a yeke zö dukani na ndö ni, ala tuku ni na popo-hoto ti Sedron.

2 Mbai 33:15

Anzapa nde nga na yanda so lo zia lani na ya ti kota da ti KOTA GBIA so, lo zi ni; agbalaka so lo leke na ndö ti hoto ti kota da ti KOTA GBIA nga na Jérusalem, lo zi ni kue, lo tuku ni na gigi ti gbata ni.

2 Mbai 33:17

Andaa azo angba ti mu sandaga na ando so a leke na ndö ti ahoto, me ala yeke mu ni gi na KOTA GBIA, Nzapa ti ala.

2 Mbai 33:22

Lo sara ye so ayeke sioni na le ti *KOTA GBIA tongana ti babâ ti lo Manase. Amon amu *sandaga na ayanda so kue babâ ti lo Manase aleke si lo voro nga ayanda ni.

2 Mbai 34:33

Na pekoni, asioni sarango ye so kue zo alingbi ti baa na le ti lo fani use pepe, Yosias azi ni na sese ti Israel kue. Lo gbu azo so kue ayeke na sese ti Israel na ngangu ti sara kua na KOTA GBIA, Nzapa ti ala. Na lango ti fini ti lo kue, azo ni azia lege ti KOTA GBIA, Nzapa ti akotara ti ala pepe.

Abia (Psaumes) 119:9

Fade maseka ayeke sara tongana nyen ti bata lege ti lo mbirimbiri? – Na lege ti sarango ye alingbi na tënë ti mo.

Abia (Psaumes) 71:5

Kota Gbia NZAPA, na ndembe so mbi de molenge ngbii asi laso, mbi zia be ti mbi ti ku mo, mbi zia be ti mbi na ndö ti mo.

Sigingo 34:13

Fade ala yeke kungbi na sese agbalaka ti azo ni, ala yeke kungbi angbongboro têne ti ala so ala leke si aluti na nduzu, ala yeke de na sese akeke so azo ni aleke aluti na nduzu si ala yeke voro ni so.

Amato 20:11

Alingbi ti hinga atene, lege ti dutingo ti mbeni maseka ayeke nzoni si ayeke mbirimbiri gi na lege ti sarango ye ti lo.

Amato 8:17

Mbi, mbi ye azo so aye mbi. Azo so ayeke gi mbi, fade ala yeke wara mbi.

Zo ti bongbingo azo 12:1

Na ngoi so mo de maseka, ayeke nzoni mo dabe ti mo na lo so asara mo. Dabe ti mo na lo kozoni si alango ti pasi asi, so ti tene ngoi so fade mo yeke tene: “Dunia ni anzere na mbi oko pepe”.

Awayango-sandaga 26:30

Ando so ala leke na ndö ti ahoto ti voro anzapa nde daa so, mbi yeke buba ni. Agbalaka so ala yeke zö dukani na ndö ni so, mbi yeke kungbi ni na sese; mbi yeke bongbi kuâ ti ala na ndö ti afango yanda ti ala; fade mbi yeke ke ala.

Mishe 1:5

Aye so kue asi ndali ti ngangu li ti *ahale ti Jacob, ndali ti asiokpari ti azo ti Israel. Zo wa laa ayeke pusu azo ti Jacob titene ala ga azo ti ngangu li? Ayeke azo ti Samarii pepe? Zo wa laa ayeke pusu azo ti Juda titene ala voro anzapa nde na ndo so ayeke na nduzu so? Ayeke azo ti Jérusalem pepe?

Matthieu 6:33

Ala gi lege ti *Kodro-gbia ti Nzapa kozoni, ala sara nga ye so ayeke mbirimbiri na le ti lo; fade lo yeke mu na ala tanga ti aye kue na ndö ni.

2 Timothée 3:15

Ti londo na ndembe so mo de kete molenge ngbii asi fadeso, mo hinga Mbeti ti Nzapa; mbeti ni alingbi ti mu na mo ndara. Ndara ni ayeke fa na mo lege titene mo soo kuâ na lege so mo ma na be na Jésus Christ.