2 Mbai 26:7 - Mbeti ti Nzapa - Tënë so amu fini

⁷ Nzapa amu maboko na lo ti tiri bira na azo ti Filistii, a-arabu so ayeke lango na Gur-Baal nga na azo ti mara ti Meun.

2 Mbai 26:7 ပူးပေါင်းရင်းမြစ်များ

1 Mbai 12:18

David aga na dawa ti ala si lo tene na ala: “Tongana ala ga na tënë ti siriri na mbi si ala ye ti mu maboko na mbi, fade mbi yeke yamba ala na be ti mbi kue. Me tongana ala ga ti handa mbi ti zia mbi na maboko ti awato ti mbi, ataa so mbi sara ye ti sioni oko pepe, ayeke nzoni Nzapa ti akotara ti e abaa ye ni si lo fâ ya ti tënë ni.”

1 Mbai 4:41

Na ngoi ti Ezekias, gbia ti Juda, amakonzi so a di iri ti ala so asi na sese ni, ala buba ada ti bongo na agbefa ti ahale ti Kam. Ala fâ azo ti sese ni kue, mbeni zo oko angba na fini pepe ngbii asi laso. Ala mu ndo ti azo ni aduti daa, ngbanga ti so nzoni pere ayeke daa ndali ti ataba ti ala.

1 Mbai 5:20

Na ngoi ti bira ni, ala toto na Nzapa; lo yeda na sambela ti ala si lo mu maboko na ala, ngbanga ti so ala zia be ti ala na lo. Tongaso ala hon ndö ti azo ti mara ti Hagri nga na asongo ti ala.

1 Mbai 5:22

Ala fâ awato ti ala mingi, ngbanga ti so bira ni ayeke ti Nzapa. Ala sara kodro na sese ti azo ti mara ti Hagri, ala duti na ndo ni ngbii asi na ngoi so a gbu ala a gue na ala na kodro wande.

2 Mbai 14:10

Asa adekongo na KOTA GBIA, Nzapa ti lo, lo tene: “KOTA GBIA, mo lingbi ti mu maboko na zo so ayeke na ngangu pepe nga na zo so ayeke na ngangu. KOTA GBIA, Nzapa ti e, ga, mo mu maboko na e maa! Biani, e luti na ndö ti mo. Na iri ti mo laa e ga ti tiri bira na gba ti aturugu so. KOTA GBIA, Nzapa ti e, sara si mbeni zo ahon ndö ti mo pepe.”

2 Mbai 14:11

KOTA GBIA akinda azo ti Etiopii na dawa ti Asa nga na dawa ti aturugu ti Juda; aturugu ti Etiopii akpe.

2 Mbai 17:11

Ataa azo ti Filistii kue aga na lo kadoo wala lapo ti wen ti nginza. A-arabu aga na lo anyama: akoli-taba 7 700 nga na akoli-ngasa 7 700.

2 Mbai 20:1

Na pekoni, azo ti Moab, azo ti Amon na azo ti mara ti Meun aga ti tiri bira na Yosafat.

2 Mbai 21:16

KOTA GBIA apusu azo ti Filistii na a-arabu so ayeke lango nduru na azo ti Etiopii ti tiri bira na Yoram.

2 Mbai 25:8

Tongana mo na ala ague, ataa mo tiri bira ni na ngangu ti mo kue, fade Nzapa ayeke sara titene mo ti na gbe ti awato ti mo, ngbanga ti so gi Nzapa oko laa ayeke na ngangu ti mu maboko na zo, wala ti sara si zo ati.”

Abia (Psaumes) 18:29

KOTA GBIA, mo laa mo yeke za wâ na lamba ti mbi; Nzapa ti mbi, mo laa mo yeke sara si vukongo ndo so mbi yeke ya ni aga vurungo ndo.

Ésaïe 14:29

Ala azo ti Filistii kue, keke so lani ayeke pika ala, ya ni afâ awe; me alingbi tere ti ala anzere ndali ni pepe. Biani, fade mbeni sioni ngbo ayeke sigigi na ya ti ngbo so akui awe; na ya ti para ti sioni ngbo ni, mbeni sioni nyama so akpa ngunde si ayeke huru hurungo na le ti nduzu ayeke sigigi.

Awatokua 26:22

Me Nzapa abata mbi ngbii asi laso si mbi ngba ti fa peko ti ye so asi mbi na azo kue: akete zo na akota zo. Mbi yeke tene gi tënë ti ye so Moïse na awayanga-Nzapa atene tënë ni ando si ye ni asi so.