2 Mbai 17:9 - Mbeti ti Nzapa - Tënë so amu fini

⁹ Ala mu mbeti ti *Ndia ti KOTA GBIA si ala gue na ni. Ala tambula na ya ti agbata ti Juda kue si ala fa ye na azo ti kodro ni.

2 Mbai 17:9 ပူးပေါင်းရင်းမြစ်များ

2 Mbai 15:3

Aninga mingi so azo ti Israel ayeke na taa Nzapa pepe, ala yeke na wayango-sandaga pepe ti fa ye na ala, *Ndia ayeke daa pepe.

2 Mbai 19:8

Na Jérusalem nga, Yosafat azia ambeni zo ti mara ti Lévi, ambeni wayango-sandaga nga na amakonzi ti asewa ti Israel titene ala fâ ngbanga ti azo na iri ti KOTA GBIA si ala leke nga atënë so ayeke na popo ti azo ti gbata ni.

2 Mbai 35:3

Na pekoni, lo tene na azo ti mara ti Lévi so a zia ala nde ndali ti KOTA GBIA si ala yeke fa ye na azo ti Israel, lo tene: “Sanduku ti *mbuki so ayeke nde si ayeke nzoni kue so, ala zia ni na ya ti kota da ti Nzapa, da so Salomon, molenge ti David, gbia ti Israel asara ando so; fade ala yeke kiri ti yo ni na ndö ti go ti ala pepe. Fadeso ala sara kua na KOTA GBIA, Nzapa ti ala, ala sara nga kua na azo ti Israel, azo ti lo.

Néhémie 8:7

Na pekoni, ala londo, ala ngba na nduzu si azo ti mara ti Lévi Yeshua, Bani, Sherebia, Yamin, Akub, Shabetai, Hodia, Maaseya, Kelita, Azaria, Yozabad, Hanan na Pelaya ato nda ti fa nda ti Ndia na ala.

Ésaïe 8:20

fade ala yeke kiri tënë na ala, atene: “E yeke kiri gi na ndö ti wango ti KOTA GBIA na tënë so lo tene.” Zo so atene tënë tongaso pepe, fade lo yeke baa lumiere ti ndaperere pepe.

Malashii 2:7

Biani, kua ti wayango-sandaga ayeke ti fa lege na azo si ala hinga Nzapa. Azo ayeke ga na mbage ti lo ti gi ti hinga ye so ndia afa, ngbanga ti so lo yeke watokua ti KOTA GBIA so ayeke na ndö ti dunia kue.

Matthieu 10:23

Tongana azo asara ngangu na ala na ya ti mbeni gbata, ayeke nzoni ala kpe ague na ya ti mbeni gbata nde. Mbi tene na ala taa-tënë: kozo titene *Molenge ti Zo akiri, fade ala yeke hunzi kua ti ala na ya ti agbata ti Israel kue pepe.

Matthieu 11:1

So Jésus ahunzi ti mu yanga na adisiple ti lo baleoko na use awe, lo londo si lo gue ti fa ye na azo, ti fa nga Nzoni Tënë na ya ti agbata ti ala.

Jean 5:39

Ala yeke gi nda ti Mbeti ti Nzapa, ngbanga ti so ala baa ti ala atene na lege ni, ala yeke wara fini so angba lakue lakue. Andaa gi Mbeti so laa ayeke tene tënë na ndö ti mbi!

Jean 5:46

Tongana ala yeda fade na tënë ti Moïse biani, ka ala yeda nga na tënë ti mbi, ngbanga ti so Moïse asu mbeti na ndö ti mbi.

Awatokua 13:15

So a diko ambeti ti *Ndia na ti awayanga-Nzapa awe, amakonzi ti da ti sambelango Nzapa atokua na ala, atene: “A-ita, tongana ala yeke na mbeni tënë ti mu ngangu na be ti azo ni, ala tene tënë!”

Awatokua 15:21

Biani, ngbene ye giriri, azo ayeke fa *Ndia ti Moïse na ya ti agbata oko oko kue; na *lango ti wungo tere oko oko kue, ala yeke diko Ndia ni na ya ti ada ti sambelango Nzapa.”

Awatokua 28:23

Ala na Paul afa mbeni lango si na lango ni so, ala ga mingi awara lo na ndo so lo yeke lango daa. Ti londo na ndaperere ngbii asi na lakui, Paul afa tënë: lo fa ye so lo hinga na ndö ti *Kodro-gbia ti Nzapa si lo yeke gi lege kue titene ala yeda na tënë ti Jésus. Lo mu *Ndia ti Moïse na ambeti ti awayanga-Nzapa si lo yeke fa na tënë ni.

Awatokua 8:40

Ti Philippe, lo si na gbata ti Azot. So lo yeke tambula na lege, lo yeke fa Nzoni Tënë na ya ti agbata so kue lo yeke hon daa. Lo gue ngbii lo si na gbata ti Sezare.

Rome 3:2

Biani, ye ti nzoni ni ayeke kota na ya ti aye mingi. Kozo ye ni ayeke so Nzapa azia atënë ti lo na maboko ti azuife.

1 Pierre 4:11

Tongana mbeni zo ayeke fa tënë, alingbi lo fa gi tënë ti Nzapa. Tongana mbeni zo ayeke sara kua ndali ti amba ti lo, alingbi lo sara ni na ngangu so Nzapa amu na lo, tongaso si na ya ti aye kue, azo agonda Nzapa na lege ti Jésus Christ. Gonda na ngangu ayeke ti Nzapa, kpu na kpu! Amen.