2 Korente 7:11 - Mbeti ti Nzapa - Tënë so amu fini

¹¹ Ala baa aye so vundu so Nzapa ayeda na ni asara na popo ti ala laa: ala baa lege ti akua hio! Ala fa peko ti tënë so ayeke na li ti ala! Ngonzo agbu ala na bango ye ti sioni! Mbeto ayeke na be ti ala! Ala yeke na nzara mingi ti baa mbi! Ala yeke na nzara ti sara kua! Ala fâ ngbanga na li ti azo so asara sioni! Na lege ti aye so kue, ala fa atene, tënë ayeke na li ti ala pepe.

2 Korente 7:11 ပူးပေါင်းရင်းမြစ်များ

Néhémie 13:25

Mbi suku na azuife ni si mbi deba ala. Mbi pika ambeni zo na popo ti ala si mbi gboto kua ti li ti ala. Na pekoni, mbi tene na ala ti deba yanga ti ala na iri ti Nzapa ti kiri ti mu amolenge ti ala ti wali pepe na awande. Ala nga, alingbi ala mu awali wande pepe ti ga wali ti ala wani wala ti amolenge ti ala ti koli.

Mbeti ti Job 42:6

Ndani laa, be ti mbi aso ndali ti tënë so lani mbi tene. Mbi hinga so tënë ni ayeke na legeni pepe; mbi duti na ya ti fuku ti sese, na ya ti mburu ti wâ.

Abia (Psaumes) 119:139

Ngonzo agbi be ti mbi tongana wâ, ngbanga ti so awato ti mbi agirisa atënë ti mo.

Abia (Psaumes) 130:6

Kungo so mbi yeke ku KOTA GBIA ahon kungo so sanziri ayeke ku ndaperere; biani, ahon kungo so sanziri ayeke ku ndaperere.

Abia (Psaumes) 145:19

Azo so akpe mbeto ti lo, lo yeke mu na ala ye so be ti ala aye; lo yeke ma toto ti ala si lo yeke soo ala.

Abia (Psaumes) 2:11

Ala sara kua na KOTA GBIA na mbeto; ala dekongo na ngia, me ala do na mbeto.

Abia (Psaumes) 35:13

Na ndembe so lani awato ti mbi ayeke na kobela, mbi yu bongo ti mua, mbi ke kobe, mbi sara tere ti mbi kete si mbi zia ti sambela pepe.

Abia (Psaumes) 38:9

Ngangu ti mbi ahunzi awe, mbi woko kue awe; ndali ti pasi so ayeke na be ti mbi, mbi yeke dema.

Abia (Psaumes) 42:1

Bia ti azo ti Kore; bia so ayeke ndali ti makonzi-bia. Bia ti fango ye na zo.

Abia (Psaumes) 69:9

Mbi ga tongana wande ndali ti a-ita ti mbi, tongana zo so azo ti sewa ti lo ahinga lo pepe.

Amato 14:16

Mbeto ti sioni ye ayeke sara zo ti ndara; lo yeke kpe lege ni. Me zo ti buba alondo ti sara ye hio hio, ngbanga ti so lo baa lo tene, mbeni ye ti sioni ti si na ni ayeke daa pepe.

Amato 28:14

Ti lo nzoni, zo so akpe lakue mbeto ti sarango sioni ye! Me zo so akpengba be ti lo, fade lo yeke ti na ya ti kpale.

B. ti abia 8:6

Bata mbi nduru na kate ti mo tongana *ye ti kpongo na nzoroko so a su iri ti mo na ndö ni, tongana ye ti kpongo na nzoroko so mo yu na maboko ti mo. Biani, yengo tere ayeke na ngangu tongana kuâ; nzara ti be ayeke nga ye so aso sioni tongana ndo so akuâ ayeke daa; zo alingbi ti sara ye oko na lo pepe. Yengo tere ayeke gbi ndo tongana wâ, lo yeke sungba tongana bekpa.

Ésaïe 26:8

Biani, KOTA GBIA, lege so mo mu yanga titene e hon daa, e zia be ti e ti ku mo. Ye so nzara ni agbu be ti e ayeke ti dabe ti e na mo.

Ésaïe 66:2

Aye so kue, maboko ti mbi laa asara ni si abaa gigi, so tënë ti yanga ti mbi KOTA GBIA laa. Me zo ti mawa so be ti lo awoko, lo so lo ma tënë ti mbi si tere ti lo ayeke do, zo tongaso laa mbi yeke baa lo na nzoni le.

Daniel 6:14

Awato ti Daniel akiri atene na gbia: “Gbia, Daniel, oko ti azo ti Juda so a gbu ala si a ga na ala so, lo baa mo tongana senge ye. Lo baa nga mbela so mo su maboko ti mo na gbe ni tongana senge ye: na ya ti lango oko, lo yeke sambela Nzapa ti lo fani ota.”

Marc 3:5

Jésus abaa le ti ala oko oko kue na ngonzo; be ti lo awara vundu ngbanga ti sioni be ti ala. Lo tene na koli ni: “Yoro ya ti maboko ti mo.” Lo yoro ni si maboko ti lo akiri aga nzoni.

Jean 2:17

Adisiple ti lo adabe ti ala na tënë so Mbeti ti Nzapa atene: “Nzapa, fade nzara ti da ti mo ayeke gbi mbi tongana wâ.”

Awatokua 17:16

So Paul ayeke ku Silas na Timothée na Athènes, be ti lo aso songo na bango gbata so ayanda nde nde asi singo daa.

Rome 11:20

Tënë ni laa. Me a fâ amaboko ti keke ni, ngbanga ti so ala ma na be pepe. Ti mo, mo ngba na tere ti keke ni, ngbanga ti so mo ma na be. Tongaso, mo pika kate ti mo pepe, me mo sara gi hange.

Rome 14:18

Zo so ayeke sara kua na Christ tongaso, lo yeke nzoni na le ti Nzapa si azo ayeda na tënë ti lo.

Rome 3:5

Me so sarango ye ti kirikiri ti e asara si mbirimbiri ti Nzapa asigigi na le ti azo kue so, mbeni tënë ti tenengo ni ayeke daa? Nzapa ayeke kirikiri, ngbanga ti so lo yeke pika e na ngonzo ti lo? (Mbi tene tënë so tongana ti so azo ayeke tene.)

1 Korente 12:25

Nzapa asara tongaso titene kangbi aduti na popo ti ambage ti tere ni pepe si ambage ti tere ni oko oko amu maboko na amba ti ala.

1 Korente 5:13

Ti azo ti gigi, Nzapa laa ayeke fâ ande ngbanga ti ala. Mbeti ti Nzapa atene: “Ala zi zo ti sioni so ayeke na popo ti ala.”

1 Korente 5:2

Na ndö ni kue, ala yeke pika kate ti ala daa! Ala lingbi fade ti duti na vundu ndali ti ye so pepe? Alingbi fade titene ala zi zo so asara mara ti ye tongaso na popo ti ala!

2 Korente 13:7

E yeke sambela Nzapa titene ala sara ye ti sioni oko pepe. E ye ti fa na ala pepe e tene, sarango ye ti e ayeke na legeni; me e ye ti baa ala na sarango ye ti nzoni. Tongana azo ayeke baa ala na sarango ye ti nzoni si azo ni atene, e yeke sara kua nzoni pepe, so ayeke senge.

2 Korente 2:6

Mara ti zo tongaso, azo mingi na popo ti ala ade ngbanga na li ti lo, so alingbi awe.

2 Korente 6:4

Me na ya ti aye kue, e yeke fa so e yeke taa azo ti kua ti Nzapa. Tongaso, e yeke kanga be ti e ti sara kua na ya ti pasi, na ya ti aye ti ngangu, na ya ti aye ti dongo be;

2 Korente 7:1

A-ita ti mbi so mbi ye ala mingi, azendo so kue ayeke ndali ti e. Tongaso, e *sukula sioni so kue ayeke na tere ti e nga na be ti e. Na lege ti kpengo mbeto ti Nzapa, e gi lege ti mu tere ti e kue na lo.

2 Korente 7:7

Be ti e ade gi ndali ti gango ti lo oko pepe, me be ti e ade nga ndali ti so ala mu ngangu na be ti lo. Lo tene na e, lo tene, ala yeke na nzara mingi ti baa mbi, ala yeke toto mbi mingi, ala yeke na nzara ti gbu koko ti mbi. So mbi ma tënë ni, be ti mbi akiri asi na ngia ahon ndoni.

2 Korente 7:9

me fadeso be ti mbi anzere. Be ti mbi anzere ndali ti vundu ti ala pepe, me ngbanga ti so vundu ti ala ni asara si ala zia ngbene lege ti sarango ye ti ala. Vundu ti ala ni, Nzapa laa ayeda na ni. Tongaso, e sara ye ti sioni oko na ala pepe.

2 Korente 9:2

Mbi hinga nzara ti be ti ala si mbi gonda tere ti mbi ndali ti ala na le ti azo ti Masedoane, mbi tene: “Azo ti Akayi aleke ye ti ala kue na ngu so ahon so awe.” Nilaa nzara ti sarango nzoni ye ti ala azia nga nzara na be ti azo ti ambeni *Eglize mingi.

Efeze 4:26

Tongana ala sara ngonzo, ala sara hange si ala sara siokpari pepe; ala bata ngonzo na be ti ala ngbii asi na lakui pepe.

Efeze 5:11

Aye so azo ayeke sara na ya ti vukongo ndo ayeke sara nzoni na zo oko pepe. Ala azo ti Nzapa, ala yoro tere ti ala na ya ni pepe, me ala sigigi na nda ti aye ni.

Filipe 2:12

Tongaso, a-ita ti mbi so mbi ye ala mingi, ala so ayeke ma yanga ti Nzapa lakue so, ayeke nzoni ala ma yanga ti lo gi ndali ti le ti mbi pepe. Me so mbi yeke na tere ti ala pepe, fadeso ayeke kota ye mingi titene ala ngba ti ma yanga ti lo. Ala sara kua na mbeto, na dongo tere si ala soo kuâ.

1 Tesalonike 4:6

Na ya ti tënë so, ayeke nzoni zo oko asara mbeni ye ti songo be wala ye ti kirikiri na mba ti lo pepe. E tene tënë so na ala awe, e gboto mê ti ala na ndö ni awe: azo so asara mara ti asioni ye tongaso, fade Kota Gbia ayeke zia peko ni angba senge pepe.

1 Timothée 5:20

Azo so asara siokpari, mo suku na ala na le ti azo kue, tongaso si mbeto agbu atanga ni.

2 Timothée 2:15

Mo gi lege ngangu ti duti zo so Nzapa alingbi ti gonda lo, zo so asara kua ti lo nzoni si kamene asara lo na pekoni pepe, zo so ayeke fa taa-tënë na azo na legeni.

Tite 3:8

Tënë so ayeke taa-tënë. Mbi ye mo tene tënë na ndö ni ngangu si azo so ama na be na Nzapa azia be ti ala na sarango anzoni ye. So laa ayeke nzoni si azo alingbi ti wara ye daa.

Ahebro 4:1

Nzapa amu zendo na e atene, e lingbi ti li na ndo so lo leke titene e wu tere ti e daa; zendo ni angba laso. Tongaso, le ti ala akpengba si lege ti lingo na ndo ti wungo tere ni akanga na mbeni zo oko na popo ti ala pepe.

Jacques 3:17

Me ndara so alondo na yayu, kozoni asara si zo aduti na vurungo be, na pekoni, asara si zo aduti na siriri, zo asara ye na ngangu pepe, zo ama tere na mba ti lo, zo asara nzoni be mingi na mba ti lo si lo sara nga anzoni ye. Ndara ti yayu ayeke mu mbage ti mbeni zo pepe si zo so ayeke na ni, tënë ti yanga ti lo ayeke nde pepe na sarango ye ti lo.

1 Pierre 1:17

Nzapa ayeke fâ ngbanga na li ti zo alingbi na ye so lo sara, lo yeke mu mbage ti mbeni zo pepe. Tongaso, a-ita, tongana ala yeke sambela si ala iri Nzapa atene “Babâ”, ala duti na mbeto ti lo na ngoi so ala yeke na dunia so.

1 Pierre 2:2

Ala duti tongana akete molenge so a du ala fafadeso: alingbi nzara ti tënë ti Nzapa asara ala tongana ti so nzara ti nyongo me ayeke sara kete molenge; tënë ti Nzapa so sioni ye oko ayeke daa pepe. Tongaso, na lege ni, fade ala yeke ga kota si ala soo kuâ.

Jude 1:23

Ti azo so ayeke gue na le ti wâ, ala gboto ala na ya ti wâ ni ti soo ala. Ti ambeni zo ni, ala baa mawa ti ala, me ala sara ni na mbeto. Ataa bongo ti azo ni, ala ndu ni pepe, ngbanga ti so aye ti sioni ti azo ni agbu tere ni kue.

Aye so Nzapa afa 3:19

Azo so kue mbi ye ala, mbi yeke pika ala si mbi yeke kiri ala na nzoni lege. Zia be ti mo kue na sarango kua, zia sioni lege ti sarango ye ti mo!