2 Korente 11:3 - Mbeti ti Nzapa - Tënë so amu fini

³ Me ala dabe ti ala na ye so: ngbo ahanda ando Eve na lege ti mayere ti lo si Eve agirisa lege. Mbeto asara mbi titene be ti ala ague kirikiri si ala zia peko ti Christ so ala mu lani tere ti ala kue na lo na vurungo be so.

2 Korente 11:3 ပူးပေါင်းရင်းမြစ်များ

Tongo nda ti aye 3:1

Ngbo ayeke na kode ti handango ndo ahon anyama ti ngonda so kue KOTA GBIA Nzapa asara ala. Lo hunda wali ni, lo tene: “Nzapa atene na ala: ‘Ala te ale ti keke so kue ayeke na yaka ni so pepe’ biani?”

Tongo nda ti aye 3:13

KOTA GBIA Nzapa ahunda wali ni, atene: “Nyen laa mo sara tongaso?” Wali ni akiri tënë na lo, atene: “Ngbo ahanda mbi si mbi te le ti keke ni.”

Tongo nda ti aye 3:20

Koli ni, Adam, adi iri ti wali ti lo Eve, so ti tene “Lo so ayeke na Fini”, ngbanga ti so lo laa lo yeke mama ti azo so kue ayeke na fini.

Tongo nda ti aye 3:4

Ngbo atene na wali ni: “Mvene! Ala yeke kui pepe.

Abia (Psaumes) 119:53

Ngonzo agbu mbi ngangu mingi na tere ti azo ti sioni so azia lege ti ndia ti mo.

Matthieu 24:24

Biani, fade amesii ti mvene na awayanga-Nzapa ti mvene ayeke ga si ala yeke sara akota ye ti kpene na aye ti dongo be ti handa na azo. Tongana lege ayeke daa, ataa azo so Nzapa asoro ala, ala yeke handa ala.

Jean 8:44

Babâ ti ala ayeke Zabolo, ala ye ti sara gi ye so be ti lo aye; kua ti lo ngbene ye na tongo nda ni laa. Lo gi lege laoko ti tene taa-tënë pepe, ngbanga ti so taa-tënë ayeke na ya ti fini ti lo pepe. Mvene ayeke ye ti tere ti lo, ngbanga ti so lo yeke zo ti mvene si lo yeke babâ ti mvene.

Rome 12:8

Zo so ayeke na matabisi ti mungo wango, alingbi lo mu wango. Zo so ayeke mu ye na azo, alingbi lo mu ni na vurungo be. Zo so ayeke na li ti bongbi, alingbi lo mu be ti lo kue na kua ni. Zo so ayeke mu maboko na azo ti mawa, alingbi lo sara ni na nzerengo be.

2 Korente 1:12

Ye so e yeke gonda tere ti e daa ayeke so: be ti e afa na e atene, dutingo ti e na dunia so, e duti na vuru be nga na be so sioni oko ayeke daa pepe. E duti tongaso mbirimbiri na mbage ti ala na lege ti ndara ti azo pepe, me na lege ti nzoni be ti Nzapa.

2 Korente 11:20

Azo ayeke sara ala na ngbaa, azo ayeke te ye ti ala, azo ayeke nzi ala, azo ayeke baa ala tongana ambumbuse zo, azo ayeke pika le ti ala, me ala yeke kanga be ti ala na ya ti aye so kue!

2 Korente 11:29

Tongana mbeni zo ayeke na ngangu pepe, mbi nga, mbi yeke na ngangu pepe. Tongana mbeni zo asara si mba ti lo ati na ya ti siokpari, tënë ni aso be ti mbi mingi.

2 Korente 2:17

Azo mingi ayeke mu tënë ti Nzapa ti de buze na ni; e yeke tongana ala pepe. Ti e, Nzapa laa atokua e, nilaa na lege ti gango so e ga oko na Christ, e yeke tene taa-tënë na le ti Nzapa.

2 Korente 4:2

E ke tënë ti aye ti kamene so azo ayeke sara na gbe mingo; e yeke sara ye ti handa na azo pepe, e yeke buba ya ti tënë ti Nzapa pepe. Me e yeke fa taa-tënë na azo, tongaso si na le ti Nzapa, azo kue azia be ti ala na ndö ti e.

Galasii 1:6

Mbi gi li ti mbi gbaa na ye so ala sara so: gi hio tongaso, ala zia lege ti lo so airi ala na lege ti nzoni be ti Christ so awe ti mu peko ti mbeni nzoni tënë nde!

Galasii 2:4

Me ambeni ita ti mvene ali na popo ti e tongana azo ti nzi, ala ye titene a fâ Tite na ganza. Ala ga ti gi ti hinga lege ti dutingo ti e na peko ti so e sigigi na gbe ti ngbaa si e ga oko na Christ. Ala ye ti kiri ti sara e na ngbaa.

Galasii 3:1

Ala azo ti Galasii, so buba ti nyen? Zo wa laa aturne li ti ala, zo wa? Andaa, a fa na ala polele tënë ti kuâ ti Christ na ndö ti keke ti kroa!

Galasii 4:11

Mbeto ti ye so ala yeke sara so agbu mbi; so ti tene aye so kue mbi sara ngbanga ti ala so, peko ni ayeke ngba gi senge senge?

Efeze 4:14

Fade e yeke kiri ti duti tongana akete molenge pepe so *mapo ti atënë nde nde ayingi ala, so pupu ti azo ti mvene nga na fango ye ti ala na lege ti mayere ahon na ala kirikiri tongana ngo na le ti ngu.

Efeze 4:22

Tongaso, alingbi ala zia ngbene lege ti dutingo ti ala. Ando, anzara ti be ti ala ayeke handa ala si ayeke buba ala. Alingbi ala zia ngbene dutingo ti ala ti zo tongana ti so zo ayeke zi gbagba bongo na tere ti lo.

Efeze 6:24

Ayeke nzoni Nzapa asara nzoni be na azo so kue aye Kota Gbia ti e Jésus Christ si ala ngba lakue ti ye lo!

Kolose 2:18

A-ita, alingbi ala zia amara ti azo tongaso afâ ngbanga na li ti ala pepe. Ambeni zo ni aye ti sara tere ti ala lakue na le ti azo tongana akete zo si ala yeke voro *a-ange, ala zia be ti ala gi na ndö ti aye so ala baa na ya ti mbeni ye tongana bango-li. Hingango ndo ti ala ayeke senge gbungo-li ti azo, asara si ala baa tere ti ala kota ahon azo kue.

Kolose 2:4

Mbi yeke tene tënë so na ala titene zo oko ahanda ala na anzerengo tënë pepe.

Kolose 2:8

Le ti ala akpengba si mbeni zo ahanda ala na atënë ti ndara ti sese so pepe! Atënë so ayeke asenge senge tënë alondo na lege ti tënë ti akotara wala na lege ti ayingo so ayeke na ngangu na ndö ti dunia so, me alondo na Christ oko pepe.

1 Tesalonike 3:5

Ndani laa, so mbi lingbi ti kanga be ti mbi ti ku ngbii pepe, mbi tokua Timothée titene lo gue, lo hinga tënë na ndö ti mabe ti ala. Mbeto agbu mbi si mbi hunda tere ti mbi, mbi tene: wala Zabolo ahanda ala si akua so kue e sara so aga gi senge senge?

1 Timothée 1:3

Tongana ti so mbi mu lani yanga na mo na guengo ti mbi na sese ti Masedoane, ayeke nzoni mo ngba na gbata ti Efeze. Kâ, ambeni zo ayeke fa ye so alingbi na tënë ti Nzapa pepe. Alingbi mo ke na ala na kuru go ti fa aye ni so.

1 Timothée 2:14

Adam laa Satan ahanda lo pepe, me wali laa Satan ahanda lo si lo ke yanga ti Nzapa.

2 Timothée 3:13

Ti azo ti sioni na azo ti handango amba ti ala, fade ala yeke ngba ti sara sioni ti gue na ni; ala yeke handa azo si azo ayeke handa nga ala.

Tite 1:10

Biani, ambeni zo mingi ayeke daa so li ti ala akpengba, ala yeke diko abuba tënë si ala yeke handa azo; mingi ti ala ayeke azuife so aga azo ti Christ.

Ahebro 13:9

Ala zia lege na ambeni zo pepe ti handa ala na lege ti afango ye ti kirikiri nde nde. Titene be ti zo awara ngangu na lege ti nzoni ye so Nzapa asara, so laa ayeke nzoni, me na lege ti kobe pepe; azo so ayeke bata andia ti kobe, ala wara nzoni ye na peko ni pepe.

2 Pierre 3:17

Ti ala, a-ita ti mbi so mbi ye ala mingi, ala ma tënë ni kue awe. Le ti ala akpengba, tongaso si azo ti sioni ahanda ala ti gue kirikiri pepe si lege ti Nzapa so ala kpengba daa so, ala zia ni pepe.

2 Pierre 3:3

Kozo ye so mbi ye ala hinga ayeke so: na ya ti alango ti ndani, azo so ayeke sara ye na lege ti asioni nzara ti be ti ala wani ayeke ga. Azo ni ayeke he ala,

1 Jean 2:18

Amolenge ti mbi, ngbonga ti ndani alingbi awe! Ala ma ando atene, Wato ti Christ ayeke ga. Andaa awato ti Christ asi singo fadeso. Tongaso e hinga, e tene, ngbonga ti ndani alingbi awe.

1 Jean 4:1

A-ita ti mbi so mbi ye ala mingi, tongana azo atene, ani yeke na Yingo ti Nzapa, ala yeda na ala kue pepe; me ayeke nzoni ala gi nda ti azo ni ti baa wala yingo so ala yeke na ni so alondo na Nzapa. Biani, *awayanga-nzapa mingi ti mvene amu ndö ti dunia kue awe.

Jude 1:4

Biani, ambeni zo ti sioni ali na popo ti ala na hondengo ni; azo ni ayeke buba ya ti tënë ti nzoni be ti Nzapa ti e ti mu lege na ala wani ti sara aye ti potopoto ti ala. Ala ke tënë ti Jésus Christ, lo so lo yeke oko Makonzi ti e na *Kota Gbia ti e. Mbeti ti Nzapa atene tënë ti ngbanga so a fâ na li ti azo ni, ngbene ye aninga awe.

Aye so Nzapa afa 12:15

Ngbo ni ade ngu na yanga ti lo na peko ti wali ni si aga tongana kota *bale titene amu wali ni ahon na lo.

Aye so Nzapa afa 12:9

A bi sioni nyama ni na gigi. Lo yeke ngbene ngbo so azo airi lo atene, Zabolo wala Satan, wala zo ti handango azo ti dunia kue. A bi lo na ndö ti sese, lo na a-ange ti lo.

Aye so Nzapa afa 20:2

Lo gbu sioni nyama so akpa ngunde, so ti tene ngbene ngbo so ayeke Zabolo wala Satan, lo kanga lo na zingiri ni ndali ti ngu saki oko.