2 Korente 11:23 - Mbeti ti Nzapa - Tënë so amu fini

²³ Ala yeke azo ti kua ti Christ? So nzoni, me mbi hon ala! – Mbi yeke tene tënë so tongana zo so mbeni ye asara li ti lo –. Mbi sara kua mbi hon ala kue, mbi sara kanga, mbi hon ala kue, azo apika mbi, mara ni use pepe, lege mingi, mbi kui kue.

2 Korente 11:23 ပူးပေါင်းရင်းမြစ်များ

Jérémie 36:5

Na pekoni, Jérémie amu yanga na Baruk, atene: “A kanga lege na mbi awe; mbi lingbi ti gue na ya ti kota da ti Nzapa pepe.

Awatokua 14:19

Ambeni zuife alondo na Antioshe, na sese ti Pisidii, ambeni alondo na Ikoniom si aga; ala sara si gba ti azo ni aye peko ti tënë ti ala. Tongaso ala bo Paul na têne, ala gboto lo asigigi na lo na ya ti gbata ni, ala baa ti ala atene, lo kui awe.

Awatokua 20:23

Ye oko so mbi hinga ayeke so: na ya ti agbata oko oko, Yingo-Vuru afa na mbi kozoni atene, kanga na pasi ayeke ku mbi.

Awatokua 21:11

Lo ga ti baa e. Lo mu kamba ti ndö ti bongo ti Paul, lo kanga gere ti lo na maboko ti lo na ni si lo tene: “Ala ma tënë so Yingo-Vuru atene: fade azuife ayeke kanga wa ti kamba so tongaso na Jérusalem si ala yeke zia lo na maboko ti azo so ahinga Nzapa pepe.”

Awatokua 25:14

So ala ngba ti sara lango mingi na ndo so, Festus afa tënë ti Paul na gbia Agripa, lo tene: “Mbeni koli ayeke ge so Félix azia lo na da ti kanga.

Awatokua 27:1

So a mu yanga titene e mu mangboko ti gue na Italii, a mu Paul na ambeni zo ti kanga, a zia ala na maboko ti mbeni kapita ti aturugu so iri ti lo Yulius, kapita ti bongbi ti aturugu so a iri ni “Bongbi ti aturugu ti kota gbia.”

Awatokua 28:16

So e si na Rome, a mu lege na Paul ti lango na ya ti mbeni senge da nde; a zia mbeni turugu oko na tere ti lo ti bata lo.

Awatokua 28:30

Paul asara ngu use na ya ti da so lo yeke futa na nginza ti lo wani. Lo yeke wara azo so kue ayeke ga ti baa lo.

Awatokua 9:16

Mbi wani laa mbi yeke fa na lo pasi so lo yeke baa ande ndali ti iri ti mbi.”

Rome 8:36

Tongana ti so Mbeti ti Nzapa atene: “Lakue, ti londo na ndaperere ngbii asi na lakui, azo ayeke gi e ti fâ e ndali ti mo; azo ayeke baa e tongana ataba so a yeke gue na ala na ndo ti fango ala.”

1 Korente 15:10

Me ndali ti nzoni be ti Nzapa, mbi ga zo so ala yeke baa lo laso so; nzoni be so Nzapa asara na mbi, peko ni angba senge pepe. Mbi sara kua ahon atanga ti awatokua kue, andaa mbi laa mbi sara kua ni pepe, me Nzapa so ayeke na mbi laa asara kua ni na lege ti nzoni be ti lo.

1 Korente 3:5

Apolos ayeke zo wa? Paul ayeke zo wa? Ala yeke gi azo ti kua so Nzapa amu ala ti sara si ala, azo ti Korente ama na be. Zo oko oko na popo ti azo ti kua ni asara gi ye so *Kota Gbia amu na lo ti sarango ni.

1 Korente 4:1

Ayeke nzoni ala baa e tongana azo ti kua ti Christ, awabatango taa-tënë ti Nzapa so angba na hondengo ni.

1 Korente 4:11

Nzara ti kobe ayeke sara e, nzara ti ngu ayeke sara e, e yeke na bongo pepe, azo ayeke sara sioni na e, e yeke tambula gi na nduzu na nduzu, ngbii asi fadeso.

1 Korente 4:9

Mbi baa ti mbi, mbi tene, Nzapa amu e *awatokua azia e ndangba ti azo kue. E yeke tongana azo so a fâ ngbanga ti kuâ na li ti ala awe: e ga ye ti ngia na le ti azo ti dunia kue, na le ti *a-ange nga na le ti azo.

2 Korente 10:7

Ala yeke baa aye na le ti ala gi tongana ti so zo ayeke baa na ye. Tongana mbeni zo abaa atene, ni yeke zo ti Christ, ayeke nzoni lo hinga tënë so laso biani: tongana lo yeke zo ti Christ, e nga, e yeke azo ti Christ.

2 Korente 11:5

Ti akota kota *watokua ti ala ni so, mbi baa ti mbi mbeni ye so ala hon mbi na ni pepe.

2 Korente 3:6

Lo laa lo sara si e ga azo so alingbi ti sara kua ti fini *mbuki so alondo na ndia so a su ni sungo pepe, me so alondo na Yingo-Vuru. Ndia so a su ni sungo ayeke gue na zo na kuâ, me Yingo ayeke mu fini na zo.

2 Korente 4:11

Biani, e so e de na fini, azo ayeke ka e na kuâ lakue ndali ti Jésus, tongaso si azo abaa nga Jésus so ayeke na fini na ya ti tere ti e so ayeke kui ande kuingo so.

2 Korente 6:9

azo abaa e tongana azo so ala hinga ala pepe, andaa ala hinga e kue; azo abaa e tongana azo so ayeke kui kuingo, andaa e ngba na fini; ala pika e, me ala fâ e pepe.

Galasii 6:17

Ti fadeso, alingbi mbeni zo akiri aso li ti mbi pepe! Biani, apeko ti ka so ayeke na tere ti mbi afa atene, mbi yeke zo ti Jésus.

Efeze 3:1

Ndani laa mbi Paul, mbi yeke sambela Nzapa ngbanga ti ala. Mbi yeke na da ti kanga ndali ti Jésus Christ ngbanga ti ala, azo ti amara nde.

Efeze 4:1

Tongaso, mbi so mbi yeke na da ti kanga ndali ti kua ti *Kota Gbia, mbi hunda na ala mingi titene sarango ye ti ala alingbi na iringo so lani Nzapa airi ala.

Efeze 6:20

Ataa so mbi yeke na da ti kanga, mbi yeke sara kua ti lembe ndali ti Nzoni Tënë. Ala sambela si mbi lingbi ti fa tënë ni na legeni, na mbeto pepe.

Filipe 1:13

Aturugu ti yangbo ti gbia kue, na azo so kue ayeke ge so ahinga atene, a kanga mbi ndali ti Christ.

Filipe 2:17

Mabe ti ala asara si ala yeke mu *sandaga na Nzapa. Mbi hinga pepe, tongana a fâ mbi si mene ti mbi atuku, fade ayeke ga tongana sandaga na ndö ti so ala yeke mu. Tongana ye ni ayeke tongaso, be ti mbi ayeke nzere si mbi na ala kue, e yeke na ngia.

Kolose 1:24

A-ita, fadeso, mbi yeke na ngia ndali ti pasi so mbi yeke baa ndali ti ala, ngbanga ti so na lege ti pasi ni, mbi yeke hunzi tanga ti pasi ti Christ so lo baa ndali ti *Eglize so ayeke tere ti lo.

Kolose 1:29

Ndali ni, mbi yeke sara kua si mbi yeke tiri ti hunzi kua ni na ngangu so Christ amu na mbi, ngangu so asara si mbi kpengba na ya ti kua ni.

1 Tesalonike 3:2

Nilaa e tokua ita ti e Timothée na ala; lo na Nzapa laa ayeke sara kua ti fa Nzoni Tënë ti Christ. E tokua lo na ala ti sara si ala kpengba, ti mu wango na ala si ala gbu ngangu na lege ti mabe ti ala.

1 Timothée 4:6

Tongana mo fa atënë so kue na a-ita, azo ti Christ, fade mo yeke ga nzoni zo ti kua ti Jésus Christ. So afa atene, mo yeke kpengba na lege ti atënë ti mabe nga na lege ti nzoni fango ye so mo yeda ti mu peko ni.

2 Timothée 1:16

Ayeke nzoni *Kota Gbia asara nzoni be ti lo na azo ti sewa ti Onezifore, ngbanga ti so fani mingi, lo mu ngangu na be ti mbi. Kamene ti so mbi yeke na da ti kanga asara lo pepe;

2 Timothée 1:8

Tongaso, ye so mo hinga na ndö ti *Kota Gbia ti e, ayeke nzoni mo sara kamene ti fa peko ni na azo pepe; mo sara nga kamene ti mbi pepe, mbi so mbi yeke na da ti kanga ndali ti lo so. Me mo baa pasi ndali ti Nzoni Tënë tongana ti so mbi yeke baa pasi so, mo zia be ti mo na ndö ti ngangu ti Nzapa.

2 Timothée 2:9

Ndali ti Nzoni Tënë ni, a kanga mbi na zingiri si mbi yeke baa pasi tongana sioni zo. Me a kanga tënë ti Nzapa pepe.

2 Timothée 3:11

nga na aye ti ngangu so ando asi na mbi. Mbi baa pasi mingi na Antioshe, na Ikoniom, na Listre. Aye ti ngangu ti nyen laa asi na mbi pepe? Me *Kota Gbia azi mbi na ya ni kue.

Philémon 1:9

Mbi ye fade ti mu yanga na mo pepe, me ndali ti so mbi na mo, e ye tere, mbi ye mingi ti hunda mbeni ye na mo. Mbi Paul, mbakoro zo, mbi yeke fadeso na da ti kanga ndali ti Jésus Christ.

Ahebro 10:34

Biani, ala kangbi mawa ti azo so abaa pasi na da ti kanga, ala yeda na nzoni be titene azo amu aye ti ala na ngangu. Ala sara tongaso, ngbanga ti so ala hinga atene, ala yeke na mosoro so ayeke nzoni ahon ndoni si ayeke ngba lakue lakue.