1 Timothée 4:13 - Mbeti ti Nzapa - Tënë so amu fini

¹³ Ti ku na gango ti mbi, ayeke nzoni mo zia be ti mo na dikongo Mbeti ti Nzapa, na mungo wango na azo nga na fango ye na azo.

1 Timothée 4:13 ပူးပေါင်းရင်းမြစ်များ

Jean 5:39

Ala yeke gi nda ti Mbeti ti Nzapa, ngbanga ti so ala baa ti ala atene na lege ni, ala yeke wara fini so angba lakue lakue. Andaa gi Mbeti so laa ayeke tene tënë na ndö ti mbi!

Awatokua 17:11

Be ti azuife ni kâ ayeke nzoni ahon ti ala ti Tesalonike; ala yamba tënë ti Nzapa na nzara ni kue na be ti ala. Na ya ti lango oko oko, ala yeke gi ya ti Mbeti ti Nzapa ti baa wala atënë so kue Paul atene so ayeke na legeni.

Awatokua 6:4

Ti e, fade e yeke mu tere ti e kue ti sambela, ti sara kua ti fango tënë ti Nzapa.”

Rome 12:8

Zo so ayeke na matabisi ti mungo wango, alingbi lo mu wango. Zo so ayeke mu ye na azo, alingbi lo mu ni na vurungo be. Zo so ayeke na li ti bongbi, alingbi lo mu be ti lo kue na kua ni. Zo so ayeke mu maboko na azo ti mawa, alingbi lo sara ni na nzerengo be.

1 Korente 14:26

Tongaso a-ita, fade e yeke sara tongana nyen? Tongana ala bongbi, mbeni zo na popo ti ala alingbi ti he mbeni bia, mbeni afa ye wala lo tene tënë ti mbeni ye so Nzapa afa na lo, mbeni atene tënë na ambeni yanga nde, mbeni akiri peko ti tënë ni na yanga ti kodro titene azo ama ya ni. Aye so kue ala yeke sara, alingbi ala sara ni titene azo ti *Eglize akpengba.

1 Korente 14:3

Me zo so ayeke tene peko ti tënë ti yanga ti Nzapa, lo yeke tënë ni na azo; lo yeke sara titene azo akpengba, lo yeke mu wango na ala si lo yeke sara titene be ti ala ade.

1 Korente 14:6

A-ita, tongana mbi si na popo ti ala si mbi tene tënë na ala na ambeni yanga nde, fade nzoni ye ti nyen laa ala yeke wara na mbage ti mbi? Mbi yeke sara nzoni na ala gi tongana mbi fa na ala mbeni ye so Nzapa afa na mbi, wala mbi fa na ala mbeni ye so ala hinga pepe, wala mbi tene na ala peko ti tënë ti yanga ti Nzapa, wala mbi fa na ala mbeni ye!

Ndia ti fani use ni 17:19

Lo yeke bata buku ni na tere ti lo si lo yeke diko ni na lango ti fini ti lo kue. Tongaso, fade lo yeke manda ti kpe mbeto ti KOTA GBIA Nzapa ti lo, lo yeke sara kue ti sara ye alingbi na ni nga na atënë ti ndia so kue ayeke na ya ni.

1 Timothée 4:16

Mo baa lege ti dutingo ti mo wani nzoni, mo baa nga lege ti fango ye ti mo nzoni; mo ngba daa lakue. Biani, tongana mo sara tongaso, fade mo yeke soo tere ti mo wani na kuâ si mo yeke soo nga azo so kue ayeke ma mo.

1 Timothée 4:6

Tongana mo fa atënë so kue na a-ita, azo ti Christ, fade mo yeke ga nzoni zo ti kua ti Jésus Christ. So afa atene, mo yeke kpengba na lege ti atënë ti mabe nga na lege ti nzoni fango ye so mo yeda ti mu peko ni.

2 Timothée 3:15

Ti londo na ndembe so mo de kete molenge ngbii asi fadeso, mo hinga Mbeti ti Nzapa; mbeti ni alingbi ti mu na mo ndara. Ndara ni ayeke fa na mo lege titene mo soo kuâ na lege so mo ma na be na Jésus Christ.

2 Timothée 4:2

mo fa tënë ti Nzapa na azo, wala ndembe ni laa wala ndembe ni laa pepe, mo ngba gi daa. Mo fa sioni ti azo na le ti ala, mo suku na ala, mo mu wango na ala; be ti mo awoko na lege ni pepe, mo ngba na nzara ti fango ye na ala.

Tite 2:15

Lege so mo lingbi ti tene tënë na azo, ti mu wango na ala, ti suku na ala laa; mo sara ni na ngangu so Nzapa amu na mo. Mo sara si mbeni zo oko abaa mo tongana buba zo pepe.

Josué 1:8

Ayeke nzoni atënë ti ya ti mbeti ti Ndia so angba lakue na yanga ti mo; mo gbu li ti mo daa bi na lâ, mo gi nga lege ti sara aye so kue alingbi na tënë so a su na ya ti mbeti ni. Tongaso si aye so kue mo leke na be ti mo ti sarango ni, mo yeke sara ni na legeni si aga nzoni.