1 Tesalonike 2:7 - Mbeti ti Nzapa - Tënë so amu fini

⁷ Taa na legeni, e lingbi fade ti ga kungba na ndö ti ala, ngbanga ti so e yeke *awatokua ti Christ. Me na ndembe so lani e yeke na popo ti ala, e sara ngangu na ala pepe, e duti tongana mbeni mama so ayeke gbu amolenge ti lo na kate ti lo ti mu me na ala.

1 Tesalonike 2:7 ပူးပေါင်းရင်းမြစ်များ

Ésaïe 40:11

Tongana wabatango-taba, lo yeke gue na ataba ti lo na ndo ti tengo pere, lo yeke sara maboko ti lo ti bongbi ala; lo yeke yo akete taba ni na ya ti maboko ti lo, lo yeke gue yeke-yeke na ataba so ayeke mu me na amolenge ti ala.”

Ésaïe 49:23

Agbia ayeke ga ababâ ti batango ala, amolenge ti agbia ti wali ayeke ga amama ti batango ala. Agbia ni ayeke kuku, akpo li ti ala na sese na dawa ti mo, ala yeke su sese so ayeke na tere ti gere ti mo. Tongaso fade mo yeke hinga, mo tene: mbi yeke KOTA GBIA; azo so azia be ti ala na ndö ti mbi, kamene ayeke gbu le ti ala pepe.”

Ésaïe 66:13

Biani, tongana ti so mama ayeke de be ti molenge ti lo, mbi nga, fade mbi yeke de be ti ala; a yeke de be ti ala na Jérusalem!

Wungo ti azo 11:12

Mbi laa, mbi mu ngo ti azo so kue? Mbi laa mbi du ala? Si mo tene na mbi: yo ala tongana ti so mama ti molenge ayeke yo kete molenge ti lo ti mu me na lo; mo yo ala ngbii asi na sese so mbi mu na akotara ti ala na lege ti zendo so.

Awatokua 13:18

Nduru na ngu baleosio, lo bata ala na ya ti benyama.

1 Korente 2:3

Ndani laa, so lani mbi yeke na popo ti ala, ngangu atia mbi, mbeto asara mbi si tere ti mbi ado mingi.

1 Korente 9:22

Tongana mbi yeke na popo ti azo so mabe ti ala akpengba pepe, mbi yeke sara ye tongana zo so mabe ti lo akpengba pepe. Mbi sara tongaso ti wara azo so mabe ti ala akpengba pepe. Tongana mbi yeke na popo ti azo kue, mbi yeke sara ye tongana azo kue titene mbi sara kue ti soo ambeni na popo ti ala.

2 Korente 10:1

Mbi Paul, mbi wani, mbi yeke hunda na ala mbeni ye na iri ti Christ, lo so lo yeke sara ye na nzoni be, me na ngangu pepe. Azo ayeke tene: tongana mbi yeke na popo ti ala, mbi yeke zo so ade mingi, me tongana mbi yeke yongoro na ala, mbi yeke so na ndö ti ala mingi.

2 Korente 13:4

Biani, a fâ lo na ndö ti keke ti kroa ndali ti so lo yeke na ngangu pepe, me fadeso, lo yeke na fini na lege ti ngangu ti Nzapa. Ndali ti so e ga oko na lo, e nga, e yeke na ngangu pepe, me fade e yeke fa na ala so, e yeke na fini na lege ti ngangu ti Nzapa.

Galasii 4:19

Amolenge ti mbi, tongana ti so mama ti ngo ayeke baa pasi na ndembe ti dungo ni, mbi nga, mbi yeke baa pasi ndali ti ala ngbii dutingo ti ala aga tongana ti Christ.

1 Tesalonike 2:11

Ala hinga nga atene, e sara na zo oko oko tongana ti so babâ ayeke sara na amolenge ti lo.

Jacques 3:17

Me ndara so alondo na yayu, kozoni asara si zo aduti na vurungo be, na pekoni, asara si zo aduti na siriri, zo asara ye na ngangu pepe, zo ama tere na mba ti lo, zo asara nzoni be mingi na mba ti lo si lo sara nga anzoni ye. Ndara ti yayu ayeke mu mbage ti mbeni zo pepe si zo so ayeke na ni, tënë ti yanga ti lo ayeke nde pepe na sarango ye ti lo.