1 Tesalonike 1:3 - Mbeti ti Nzapa - Tënë so amu fini

³ Na le ti Nzapa Babâ ti e, e yeke dabe ti e lakue na kua so ala yeke sara na lege ti mabe; e yeke dabe ti e na ndoye so ayeke sara titene ala sara kua ngangu nga na be ti ala so ala zia ti ku *Kota Gbia ti e Jésus Christ.

1 Tesalonike 1:3 ပူးပေါင်းရင်းမြစ်များ

Tongo nda ti aye 29:20

Tongaso Jacob asara kua ngu mbarambara ndali ti Rachel. Ti lo, lo baa ngu mbarambara so gi tongana mbeni kete lango, ngbanga ti so lo ye Rachel.

Zo ti bongbingo azo 2:26

Nilaa, zo so ayeke nzoni na le ti Nzapa, Nzapa ayeke mu na lo ndara, hingango ndo na ngia. Me ti zo ti siokpari, Nzapa ayeke mu na lo kua ti bongbingo ye ndali ti zo so ayeke nzoni na le ti lo. Ye so nga ayeke gi senge senge si ayeke tumbango peko ti pupu senge.

B. ti abia 8:7

Akota ngu alingbi ti mingo wâ ti yengo tere pepe si ngu ti *abale alingbi nga ti mene yengo tere pepe. Tongana mbeni zo amu amosoro kue ti da ti lo ti vo na yengo tere, fade azo abaa lo tongana mbumbuse zo biani.

Jean 14:15

“Tongana ala ye mbi, fade ala yeke sara ye alingbi na andia ti mbi.

Jean 15:10

Tongana ala sara ye alingbi na andia ti mbi, fade ala yeke ngba na ya ti ndoye ti mbi, tongana ti so mbi sara ye alingbi na andia ti Babâ si mbi ngba na ya ti ndoye ti lo.

Awatokua 10:31

lo tene na mbi: ‘Corneille! Nzapa ama sambela ti mo awe. Anzoni ye so mo sara na azo ti mawa, be ti lo agirisa na ni pepe.

Awatokua 3:19

Tongaso, ala zia ngbene lege ti sarango ye ti ala, ala kiri na lege ti Nzapa, tongaso si lo zi siokpari ti ala.

Rome 12:12

Ala duti na ngia ngbanga ti ye so ala zia be ti ala ti ku; ala kanga be ti ala na ya ti aye ti pasi; ala zia lege ti sambela pepe.

Rome 15:13

Nzapa so ayeke mu na zo lege ti zia be ti lo ti ku ye so lo tene tënë ni, ayeke nzoni lo sara si be ti ala asi na ngia nga na siriri ndali ti mabe so ala yeke na ni. Tongaso, na lege ti ngangu ti Yingo-Vuru, ala ngba ti zia be ti ala ti ku lo lakue.

Rome 15:4

Atënë so kue a su ando na ya ti Mbeti ti Nzapa, a su ni titene e hinga ye na lege ni. Mbeti ti Nzapa ayeke mu na e lege ti kanga be ti e, ti mu ngangu na be ti e si e zia be ti e ti ku ye so Nzapa atene tënë ni.

Rome 16:26

Fadeso, a fa tënë ni polele na ya ti ambeti ti awayanga-Nzapa. Nzapa so ayeke kpu na kpu, lo mu yanga si a fa tënë so na azo ti amara kue titene ala ma na be si ala ma yanga ti lo.

Rome 16:6

Ala bara na mbi Marie so asara kua mingi ndali ti ala.

Rome 2:7

Azo so amu be ti ala kue ti gi ti sara nzoni ye, ala yeke gi titene Nzapa agonda ala, lo ne ala si lo mu na ala fini so angba lakue lakue, fade Nzapa ayeke mu lege na ala ti duti na fini kpu na kpu.

1 Korente 13:13

Fadeso, aye ota so ayeke ngba: mabe, ziango be ti ku ye na ndoye; me ndoye ayeke kota ahon atanga ni kue.

1 Korente 15:58

Tongaso, a-ita ti mbi so mbi ye ala mingi, ala luti ngangu, ye ayingi ala pepe! Ala ngba lakue na sarango kua ti Kota Gbia. Ayeke nzoni, ala hinga atene, kua so ala yeke sara na Kota Gbia, peko ni ayeke ngba senge pepe.

2 Korente 2:17

Azo mingi ayeke mu tënë ti Nzapa ti de buze na ni; e yeke tongana ala pepe. Ti e, Nzapa laa atokua e, nilaa na lege ti gango so e ga oko na Christ, e yeke tene taa-tënë na le ti Nzapa.

Galasii 1:4

Jésus aka tere ti lo ndali ti siokpari ti e, ti zi e na ya ti ngoi ti sioni so e yeke daa laso; lo sara tongana ti so be ti Nzapa Babâ ti e aye.

Galasii 5:13

Ala a-ita, Nzapa airi ala titene ala sigigi na gbe ti ngbaa. Gi ye oko, ayeke nzoni sigingo na gbe ti ngbaa ni aga mbeni ye titene ala luti na ndö ni ti sara aye alingbi na asioni nzara ti be ti ala pepe. Me na lege ti ndoye, ala sara kua na amba ti ala na popo ti ala.

Galasii 5:6

Biani, tongana zo aga oko na Jésus Christ, ataa zo ni afâ ganza wala lo fâ ganza pepe, so kota ye ni laa pepe! Kota ye ni ayeke titene zo aduti na mabe so ayeke sara titene lo ye amba ti lo.

Galasii 6:9

Be ti e awoko pepe na sarango nzoni ye, ndali ti so tongana ndembe ni alingbi si e ngba na lege ni, fade e yeke ko lengo ni.

1 Tesalonike 3:6

Me fadeso, Timothée alondo na ndo ti ala kâ, lo kiri na e awe. Lo tene na e nzoni tënë na ndö ti mabe ti ala nga na ndö ti ndoye ti ala. Lo tene nga na e, lo tene, ala yeke dabe ti ala na e lakue si ala yeke na nzara ti kiri ti baa e tongana ti so e nga, e yeke na nzara ti kiri ti baa ala.

2 Tesalonike 1:11

Ndani laa e yeke sambela lakue ndali ti ala titene Nzapa ti e asara si ala lingbi na iringo so lo iri ala. E hunda titene na lege ti ngangu ti lo, ala sara aye ti nzoni so kue ala yeke na nzara ti sarango ni si kua so ala yeke sara na lege ti mabe asi na ndani.

2 Tesalonike 1:3

A-ita, alingbi e ngba ti mu singila lakue na Nzapa ndali ti ala. So ayeke na legeni, ngbanga ti so mabe ti ala ayeke gue lakue na nduzu si yengo so ala ye tere na popo ti ala ayeke mai lakue.

1 Timothée 1:14

Kota Gbia ti e Christ Jésus asara nzoni be na mbi ahon ndoni: lo mu na mbi mabe na ndoye so aga na lege so mbi ga oko na Jésus Christ.

1 Timothée 2:3

Baa, ye so ayeke nzoni si anzere na le ti Nzapa, Wasongo e laa.

Ahebro 10:36

Alingbi ala kanga be ti ala tongana ala ye ti sara ye so be ti Nzapa aye, ti wara ye so Nzapa amu zendo ni.

Ahebro 11:17

Na lege ti mabe, Abraham amu Isaac na *sandaga na Nzapa na ndembe so Nzapa atara be ti lo. Lo mu oko molenge ti lo na sandaga na Nzapa, ataa so Nzapa amu zendo na lo,

Ahebro 13:21

Ayeke nzoni Nzapa asara si ala ga azo so alingbi ti sara ye so kue ayeke nzoni nga na ye so be ti lo aye! Ayeke nzoni, na lege ti Jésus Christ, Nzapa asara si e sara ye so anzere na be ti lo! Gonda ayeke ti lo kpu na kpu! Amen.

Ahebro 4:11

Ndani laa, ayeke nzoni e sara ngangu ti li na ndo ti wungo tere so, tongaso si fade mbeni zo oko na popo ti e ati pepe na mungo tapande ti azo so asara ngangu li.

Ahebro 6:15

Abraham akanga be ti lo aku si lo wara ye so Nzapa amu zendo ni na lo.

1 Pierre 3:4

Me ala gi ti ga pendere na be ti ala. Aye ti pendere ni ayeke be so aduti kpoo, aduti na siriri si ane mingi na le ti Nzapa; aye ti pendere so laa ayeke buba pepe.

1 Jean 3:18

Amolenge ti mbi, e ye tere gi na lege ti tënë ti yanga pepe; me e ye tere na lege ti aye so e yeke sara nga na lege ti taa-tënë.

1 Jean 3:21

A-ita ti mbi so mbi ye ala mingi, tongana be ti e ayeke bi tënë na li ti e pepe, e yeke zia be ti e kue kue kue na ndö ti Nzapa.

1 Jean 3:3

Zo so kue azia be ti lo ti ku ye so na maboko ti Christ, lo yeke sara titene lo ga *nzoni tongana ti so Christ ayeke *nzoni.

1 Jean 5:3

Lege ti yengo Nzapa ayeke titene e sara ye alingbi na andia ti lo. Andia ti lo ayeke ngangu pepe.

Aye so Nzapa afa 2:19

Mbi hinga aye so mo yeke sara, ndoye ti mo, mabe ti mo, nzoni ye so mo yeke sara na azo nga na kangango be ti mo. Aye so mo yeke sara fadeso ahon ti so mo sara kozoni.

Aye so Nzapa afa 3:10

Mo bata tënë ti mbi, mo zia lege ni oko pepe. Ndani laa mbi nga, mbi yeke bata mo na ngoi ti aye ti tarango be so ayeke si ande na azo ti sese kue.