1 Samuel 6:4 - Mbeti ti Nzapa - Tënë so amu fini

⁴ Azo ti Filistii ahunda ala, atene: “Nyen laa e lingbi ti mu na lo ndali ti sioni ti e so?” Awayango-sandaga na azo ti bango nda ti aye akiri tënë, atene: “Ala mu lôro, ala sara na ambeni ye so akpa aka ti sanzo oku, nga na adeku oku. Ala sara ni alingbi na wungo ti agbia ti azo ti Filistii, ngbanga ti so gi oko kpale so laa awara ala na amakonzi ti ala kue.

1 Samuel 6:4 ပူးပေါင်းရင်းမြစ်များ

Sigingo 12:35

Azo ti Israel asara ye ni alingbi na tënë ti Moïse: ala hunda na azo ti Ezipte aye so a sara na wen ti nginza na lôro; ala hunda nga abongo.

Josué 13:3

Azo abaa sese ni so tongana ti azo ti Kanaan; sese ni alondo na ngu ti Shihor so ayeke baa le na Ezipte, ague ngbii asi na katikati ti sese ti Ekron, na mbage ti Banga. Agbia oku ti azo ti Filistii ayeke kâ: gbia ti Gaza, ti Asdod, ti Askalon, ti Gat na ti Ekron; sese ti azo ti mara ti Avi ayeke nga kâ,

Awafango-ngbanga 14:19

Yingo ti KOTA GBIA aga na ndö ti Samson si lo zu na Askalon. Lo fâ akoli baleota na Askalon, lo mu abongo ti ala si lo gue, lo mu ni tongana abongo ti matanga na azo so asigigi na nda ti toli ti lo so. Ngonzo amu lo mingi si lo kiri na da ti babâ ti lo.

Awafango-ngbanga 3:3

Amara so angba na ya ti kodro ni ayeke so: agbia oku ti azo ti Filistii, azo ti Kanaan kue, azo ti Sidon nga na azo ti Hivi so ayeke lango na hoto ti Liban, ti londo na hoto ti Baal-Hermon ngbii asi na Lebo-Hamat.

1 Samuel 5:12

Azo so akui pepe so, Nzapa azia kobela ti sukungo ye na tere ti ala, ala yeke dekongo na mawa si dekongo ni ague ngbii asi na yayu.

1 Samuel 5:6

Maboko ti KOTA GBIA asara ngangu na azo ti Asdod mingi. Lo tokua aye ti sioni na tere ti azo ti kodro ni; lo zia kobela ti sukungo ye na tere ti ala; ala na azo so alango nduru na gbata ti ala.

1 Samuel 5:9

Me gi so ala si na ni na Gat awe, maboko ti KOTA GBIA asara ngangu na azo ti gbata ni. Kota mbeto asara ala. KOTA GBIA azia kobela ti sukungo ye na tere ti ala: amolenge na akangba.

1 Samuel 6:5

Fade ala sara alimo ti aka ti sanzo nga na limo ti adeku so ayeke buba kodro ti ala. Na pekoni, ala gonda Nzapa ti Israel. E hinga pepe, fade lo yeke zia ti sara ngangu na ala, na anzapa ti ala nga na kodro ti ala.

1 Samuel 6:8

Ala mu sanduku ti mbuki ti KOTA GBIA, ala zia na ndö ti pusu ni. Ala mu aye ti lôro so ala leke ti mu na KOTA GBIA ndali ti sioni ti ala so, ala zia na ya ti mbeni kete sanduku na tere ti sanduku ti mbuki ni. Na pekoni, ala zia pusu ni ague.