1 Samuel 6:14 - Mbeti ti Nzapa - Tënë so amu fini

¹⁴ Sanduku ni ague, aluti na yaka ti Josué, zo ti Bet-Shemesh. Mbeni kota têne ayeke na ndo ni so. Azo asuru ya ti keke so a leke na pusu ni si ala mu abagara ni na *sandaga so a yeke gbi ni kue na wâ na KOTA GBIA.

1 Samuel 6:14 ပူးပေါင်းရင်းမြစ်များ

2 Samuel 24:18

Gi na lango ni so, Gad asi na ndo ti David si atene na lo: “Gue na lakere ti Aravna, zo ti mara ti Yebus, mo sara mbeni gbalaka ndali ti *KOTA GBIA kâ.”

2 Samuel 24:22

Aravna atene na David: “Gbia, mo lingbi ti mu ni senge, mo mu na *sandaga so a yeke gbi ni kue na wâ ye so be ti mo aye. Baa, abagara ti mbi ndali ti sandaga ni laa. Ye ti pikango na ale ti ble na akeke so a kanga na go ti abagara ni, fade a yeke sara na wâ ndali ti sandaga ni.

2 Samuel 24:25

Lo sara gbalaka na ndo ni ndali ti KOTA GBIA; lo mu na lo asandaga so a yeke gbi ni kue na wâ nga na sandaga ti beoko. Tongaso, KOTA GBIA ama sambela ndali ti kodro ni si sioni kobela so ayeke fâ azo ti Israel so ahunzi.

1 Agbia 19:21

Élisée akiri na le ti yaka ti lo. Lo mu abagara use so, lo fâ ala si lo mu na *sandaga. Lo mu akeke ti *zuge ni na aye ti kua ni kue, lo sara na wâ, lo to na kasa ti abagara ni si lo mu na azo ni titene ala te. Na pekoni, lo londo, lo gue na peko ti Élie si lo ga zo ti kua ti lo.

Sigingo 20:24

Ala mu sese asara na mbi gbalaka. Na ndö ni, fade ala yeke ya na mbi *asandaga ti ala so a yeke gbi ni kue na wâ, asandaga ti ala ti beoko, ataba ti ala, angasa ti ala nga na abagara ti ala. Na ndo so kue mbi yeke sara titene azo adabe ti ala na iri ti mbi, mbi yeke ga na mbage ti ala si mbi yeke sara tufa na ndö ti ala.

Awafango-ngbanga 21:4

Lango oko na pekoni, so ndo angba kâ, azo ti Israel alondo, ala leke mbeni gbalaka na ndo ni so. Ala mu *sandaga so a yeke gbi ni kue na wâ nga na sandaga ti beoko.

Awafango-ngbanga 6:26

Fade mo leke na KOTA GBIA, Nzapa ti mo mbeni gbalaka so a leke ni nzoni na li ti hoto so. Na pekoni, mo mu koli-bagara ni, mo ya na sandaga so a yeke gbi ni kue na wâ na KOTA GBIA. Mo mu keke so a leke aluti na nduzu ndali ti Ashera si mo fâ ni so, mo gbi na sandaga ni.”

1 Samuel 11:5

Na ndembe ni so, Saul alondo na yaka na peko ti abagara ti lo si lo yeke kiri. Lo hunda ndo, lo tene: “Azo ayeke toto ngbanga ti nyen?” Azo atene na lo peko ti tënë ti azo ti Yabesh ni.

1 Samuel 20:29

Lo tene na mbi: ‘Mbi gbu gere ti mo, zia lege na mbi, mbi gue, ngbanga ti so mbi na azo ti sewa ti mbi, e yeke mu sandaga na Nzapa si ita ti mbi ti koli airi mbi ti gue. Tongana mo baa mbi na nzoni le, mu na mbi lege ti gue ti baa a-ita ti mbi.’ Ndani laa David aga na matanga ti tengo kobe so gbia aleke so pepe.”

1 Samuel 6:13

Andaa azo ti Bet-Shemesh ayeke fâ ale ti *ble na yaka so ayeke na popo-hoto. Tongana ala yo le ti ala na nduzu, ala baa sanduku ti mbuki ni si be ti ala asi singo na ngia.

1 Samuel 6:18

Ti aye so ala sara na lôro si akpa adeku, ala mu ni alingbi na wungo ti agbata ti agbia oku ti azo ti Filistii, agbata so a sara ngangu gbagba na tere ni nga na akete kodro so gbagba ayeke na tere ni pepe. Sese ti azo ti Filistii ague ngbii asi na kota têne so a zia sanduku ti mbuki ti KOTA GBIA na ndö ni, na yaka ti Josué, zo ti Bet-Shemesh. Têne ni angba ngbii asi laso.