1 Samuel 14:6 - Mbeti ti Nzapa - Tënë so amu fini

⁶ Jonatan atene na zo so ayeke yo aye ti bira ti lo, atene: “Ga, e gue na ndo so aturugu ti Filistii so ahinga Nzapa pepe so ayeke daa. E hinga pepe, KOTA GBIA ayeke sara nzoni ye ndali ti e. Ataa e yeke mingi wala e yeke mingi pepe, mbeni ye ayeke daa pepe ti kanga lege na KOTA GBIA ti sara si e so benda.”

1 Samuel 14:6 ပူးပေါင်းရင်းမြစ်များ

2 Samuel 1:20

Ala tene tënë so na azo ti Gat pepe; ala gue na atënë ni na ndö ti alege ti Askalon pepe, ngbanga ti amaseka-wali ti azo ti Filistii awara ngia daa, ngbanga ti amaseka-wali ti azo so afâ *ganza pepe adodo na ngia.

2 Samuel 16:12

E hinga pepe, fade KOTA GBIA ayeke baa mawa ti mbi. E hinga pepe, lo yeke sanze dengo ba ti laso titene aga nzoni ye ndali ti mbi.”

2 Agbia 19:4

Gbia ti Asirii atokua makonzi ti aturugu ti lo ti zonga Nzapa so ayeke na fini. E hinga pepe, wala KOTA GBIA, Nzapa ti mo ama tënë ti zonga ni kue si lo pika lo ndali ti asioni tënë so lo tene so! Ti mo Ésaïe, sambela Nzapa ndali ti tanga ti azo so angba na fini so.’ ”

2 Mbai 14:10

Asa adekongo na KOTA GBIA, Nzapa ti lo, lo tene: “KOTA GBIA, mo lingbi ti mu maboko na zo so ayeke na ngangu pepe nga na zo so ayeke na ngangu. KOTA GBIA, Nzapa ti e, ga, mo mu maboko na e maa! Biani, e luti na ndö ti mo. Na iri ti mo laa e ga ti tiri bira na gba ti aturugu so. KOTA GBIA, Nzapa ti e, sara si mbeni zo ahon ndö ti mo pepe.”

2 Mbai 14:11

KOTA GBIA akinda azo ti Etiopii na dawa ti Asa nga na dawa ti aturugu ti Juda; aturugu ti Etiopii akpe.

Abia (Psaumes) 135:6

Ye so kue be ti KOTA GBIA aye, lo yeke sara ni na yayu nga na sese, na ya ti akota ngu-ingo nga na ya ti akota du so ali mingi.

Jérémie 9:23

Tongana zo aye ti gonda tere ti lo, ayeke nzoni lo gonda tere ti lo, ngbanga ti so lo hinga ndo si lo hinga mbi. Ayeke nzoni zo ni ahinga atene, mbi yeke KOTA GBIA si mbi yeke sara ye na nzoni be; mbi yeke sara ye na legeni mbirimbiri na ndö ti sese. Ye so anzere na be ti mbi laa; so tënë ti yanga ti KOTA GBIA laa.”

Jérémie 9:25

Azo ni ayeke azo ti Ezipte, ti Judée, ti Edom, ti Amoni, ti Moab nga na azo ti benyama so kue ayeke kio kua ti tere ti li ti ala. Biani, amara kue afâ *ganza pepe, me azo ti Israel kue afâ be ti ala na ganza pepe.”

Amos 5:15

Ala ke ye ti sioni, ala ye ye ti nzoni. Na le ti ngbanga, ala kiri afâ ngbanga na lege ti ndia; e hinga pepe, fade KOTA GBIA, Nzapa so ayeke na ndö ti dunia kue ayeke baa mawa ti tanga ti azo ti sewa ti Joseph.

Sofonii 2:3

Ala asenge zo kue ti sese so, ala gi KOTA GBIA; ala so ayeke sara ye na lege ti ndia ti lo, ala gi lege ti sara ye ti mbirimbiri, ala gi lege ti sara tere ti ala kete na dawa ti Nzapa. E hinga pepe, fade ala yeke soo fini ti ala na lango so KOTA GBIA ayeke sara ngonzo.

Wungo ti azo 10:32

Tongana e na mo, e gue, fade e yeke sara titene mo nga, mo yeke wara anzoni ye so KOTA GBIA ayeke mu na e.”

Wungo ti azo 31:4

Fade ala yeke soro azo saki oko na ya ti amara ti Israel oko oko kue.”

Matthieu 19:26

Jésus abaa ala si lo tene na ala: “Ye ni ahon ngangu ti zo, me Nzapa alingbi ti sara ye kue.”

Rome 8:31

Tongaso, fade e yeke tene nyen na ndö ti tënë so? Tongana Nzapa ayeke na e, zo wa laa alingbi ti ke e?

Ndia ti fani use ni 32:30

Wato oko senge alingbi ti tumba peko ti aturugu ti Israel saki oko? Awato use senge alingbi ti sara si azo ti Israel saki baleoko akpe? Biani, mbi KOTA GBIA so mbi yeke Kota Têne ti batango ala, mbi zia ala na maboko ti awato ti ala ni awe.

Filipe 3:3

E so, e yeke voro Nzapa na lege ti Yingo ti lo si e yeke gonda tere ti e ndali ti gango so e ga oko na Jésus Christ so, e laa e fâ mbirimbiri ganza; e yeke zia be ti e na ndö ti e wani pepe.

Josué 14:12

Tongaso, mu na mbi sese ti ahoto so KOTA GBIA amu na mbi zendo ni na ngoi ni so. Na ngoi ni so, mo ma nga atene, azo ti mara ti Anak ayeke lango na ya ti akota gbata so angangu gbagba ayeke na tere ni. Tongana KOTA GBIA ayeke na mbi, fade mbi yeke mu sese ni tongana ti so lo mu zendo ni.”

Awafango-ngbanga 15:18

Nzara ti ngu ahon ndö ti lo; tongaso lo toto na KOTA GBIA, lo tene: “Mo laa mo sara si mbi, zo ti kua ti mo, mbi so benda na ndö ti azo so. Fade mo yeke zia mbi titene mbi kui nzara ti ngu, titene mbi ti na maboko ti azo so asara na Nzapa pepe so?”

1 Samuel 14:5

Oko têne ni ayeke na mbage ti Banga si abaa le na Mikmas; mbeni têne ni ayeke na mbage ti Mbongo si abaa le na Geba.

1 Samuel 14:7

Zo so ayeke yo aye ti bira ti lo akiri tënë na lo: “Sara ye ti be ti mo. Hon na dawa, mbi yeke ngba na tere ti mo tongana yingo ti mo.”

1 Samuel 17:26

David ahunda azo so ayeke luti nduru na tere ti lo so, atene: “Zo so ayeke fâ zo ti Filistii so si ayeke zi kamene na le ti azo ti Israel, fade a yeke sara nyen na lo? Zo ti Filistii so ahinga Nzapa pepe so, lo yeke zo wa si lo yeke gi yanga ti aturugu ti Nzapa so ayeke na fini so?”

1 Samuel 17:36

Lege so mbi zo ti gbe ti mo, mbi fâ bamara, mbi fâ nga urse laa. Zo ti Filistii so ahinga Nzapa pepe so, fade mbi yeke sara na lo tongana ti so mbi sara na anyama use so, ngbanga ti so lo gi yanga ti aturugu ti Nzapa, Nzapa so ayeke na fini.”

1 Samuel 17:46

Laso, fade KOTA GBIA ayeke zia mo na maboko ti mbi; mbi yeke fâ mo, mbi yeke fâ li ti mo. Gi laso, fade mbi yeke mu kuâ ti aturugu ti Filistii na andeke ti nduzu nga na anyama ti ngonda titene ala te ni. Tongaso, fade azo ti dunia kue ahinga atene Nzapa ayeke na Israel.

1 Samuel 17:47

Fade azo so kue abongbi ge so ayeke hinga atene, KOTA GBIA ayeke sara titene azo ti lo aso benda na lege ti yongoro zeme wala likongo pepe. Me KOTA GBIA laa ayeke makonzi ti bira; fade lo yeke zia ala na maboko ti e.”

1 Samuel 31:4

Saul atene na zo so ayo aye ti bira ti lo, atene: “Gboto yongoro zeme ti mo, mo koro ya ti mbi, ngbanga ti so mbi ye pepe titene azo so ahinga Nzapa pepe so aga akoro ya ti mbi si ala he mbi.” Me zo so ayo aye ti bira ni ake, ngbanga ti so mbeto asara lo mingi. Nilaa Saul amu yongoro zeme ti lo azia si lo ti na yanga ni.