1 Samuel 12:19 - Mbeti ti Nzapa - Tënë so amu fini

¹⁹ Azo ni kue atene na Samuel: “Sambela KOTA GBIA, Nzapa ti mo ndali ti e azo ti gbe ti mo si e kui pepe. Biani, na ndö ti asiokpari so kue e sara, e kiri e zia mbeni na ndö ni na lege ti so e hunda mbeni gbia.”

1 Samuel 12:19 ပူးပေါင်းရင်းမြစ်များ

Tongo nda ti aye 20:7

Mo kiri na wali ti koli so na lo, ngbanga ti so koli ni ayeke wayanga-Nzapa. Fade lo yeke sambela ndali ti mo titene mo ngba na fini. Me tongana mo kiri na wali ni pepe, ayeke nzoni mo hinga, mo tene, mo na azo ti mo kue ayeke kui biani.”

Mbeti ti Job 37:13

Nzapa atokua ala ti pika azo ti ndö ti sese, wala ti fa na ala nzoni be ti lo.

Mbeti ti Job 42:8

Fadeso, ala mu akoli-bagara mbarambara, akoli-taba mbarambara, ala gue, awara Job, zo ti kua ti mbi. Ala mu anyama ni na *sandaga so a yeke gbi kue na wâ ndali ti ala wani. Fade Job ayeke sambela ndali ti ala, mbi yeke yeda na sambela ti lo. Tongaso, mbi yeke sara na ala pepe alingbi na ye ti buba so ala sara; ala tene taa-tënë na ndö ti mbi pepe; gi Job, zo ti kua ti mbi laa atene taa-tënë.”

Sigingo 10:17

Fadeso, ala kiri azi tënë na li ti mbi ti fani oko ni maa! Ala sambela KOTA GBIA, Nzapa ti ala titene lo zi mbi na ya ti kuâ so.”

Sigingo 32:30

Lango oko na pekoni, Moïse atene na azo ni, atene: “Ala sara kota siokpari awe. Me fadeso, mbi yeke gue na li ti hoto na mbage ti KOTA GBIA. Mbi hinga pepe, mbi yeke gi lege ti sara si lo zi siokpari na li ti ala.”

Sigingo 9:28

Ala sambela KOTA GBIA titene sioni bekpa na pembe ti bekpa ni akai. Mbi yeke zia lege na ala ti gue; ala yeke kiri ti luti na ndo so pepe.”

Ésaïe 26:16

KOTA GBIA, na ya ti ye ti ngangu, e baa ndo na mbage ti mo. Na ndembe so mo pika e, e yeke sambela mo na gbe ti go ti e.

Jérémie 15:1

*KOTA GBIA atene na mbi: “Ataa Moïse na Samuel aluti fade na dawa ti mbi ti sambela ndali ti mara so, ka tënë ti azo ti mara so ayeke so be ti mbi oko pepe. Mo tumba azo ni na dawa ti mbi, ala hon!

Jérémie 27:18

“Tongana azo ni so ayeke taa awayanga-Nzapa, tongana biani KOTA GBIA laa azia tënë ti lo na yanga ti ala, ayeke nzoni ala voro tere ti ala na KOTA GBIA so ayeke na ndö ti dunia kue titene akungba so angba na ya ti kota da ti Nzapa ge, akungba so angba na yangbo ti gbia ti Juda na ti so angba na Jérusalem, azo amu ahon na ni na Babilone pepe.

Jérémie 37:3

Andaa gbia Sedesias atokua Yukal, molenge ti Shelemia, lo na wayango-sandaga Sefania, molenge ti Maaseya, ti tene na wayanga-Nzapa Jérémie, atene: “E gbu gere ti mo, sambela KOTA GBIA Nzapa ti e ndali ti e!”

Jérémie 42:2

wayanga-Nzapa Jérémie si ala tene na lo: “E gbu gere ti mo, ayeke nzoni vorongo tere ti e agbu be ti mo. Sambela *KOTA GBIA, Nzapa ti mo ndali ti tanga ti e so e ngba na fini so. Lani e yeke mingi, fadeso e ngba gi kete, tongana ti so mo yeke baa na le ti mo so.

Malashii 1:9

Fadeso, ala tara ti voro tere ti ala na mbi, Nzapa titene mbi baa mawa ti ala! Na peko ti ye so ala sara so, fade mbi yeke kiri ti yamba ala na nzoni be? Tënë so KOTA GBIA so ayeke na ndö ti dunia kue atene laa.

Wungo ti azo 21:7

Tanga ti azo ti Israel ague, awara Moïse si atene na lo: “E sara siokpari, e kasa KOTA GBIA, e kasa nga mo! Toto na KOTA GBIA titene lo zi angbo so yongoro na tere ti e.” Moïse atoto na KOTA GBIA ndali ti azo ti Israel.

Awatokua 8:24

Simon akiri tënë, atene: “Ala wani asambela Kota Gbia ndali ti mbi si sioni so ala tene tënë ni so asi na mbi pepe.”

Jacques 5:15

Tongana ala sambela na mabe, sambela ni ayeke soo zo ti kobela ni; Kota Gbia ayeke mu lo na nduzu. Tongana zo ni asara siokpari, Nzapa ayeke zi ni na li ti lo.

1 Jean 5:16

Tongana mbeni zo abaa ita ti lo na sarango siokpari, mbeni siokpari so ague na lo na kuâ pepe, alingbi lo sambela si fade Nzapa amu fini na ita ti lo so. Tënë so ayeke ndali ti azo so ayeke sara siokpari so ague na zo na kuâ pepe. Mbeni siokpari ayeke daa so ayeke gue na zo na kuâ, mara ti siokpari so laa mbi hunda na ala ti sambela ndali ni pepe.

1 Samuel 12:13

Fadeso, baa gbia so ala soro so laa; gbia so ala hunda so laa. KOTA GBIA amu na ala gbia awe.

1 Samuel 12:17

Ngoi so e yeke daa so, ayeke ngoi ti fango le ti *ble pepe? Mbi yeke sambela KOTA GBIA titene lo sara si bekpa asungba si ngu-Nzapa apika. Tongaso si ala hinga atene, ala sara sioni mingi na KOTA GBIA na lege so ala hunda mbeni gbia.”

1 Samuel 12:20

Samuel atene na azo ni: “Ala sara mbeto pepe! Ala wani laa asara asioni ye so kue. Me ala hon yongoro na KOTA GBIA pepe, ala sara kua na lo na be ti ala kue.

1 Samuel 12:23

Ti mbi, fade mbi yeke sambela KOTA GBIA lakue ndali ti ala; mbi yeke ngba ti fa na ala nzoni lege nga na lege so ayeke mbirimbiri. Tongana mbi sara tongaso pepe, andaa mbi sara sioni mingi na KOTA GBIA.

1 Samuel 7:5

Samuel atene: “Ala bongbi azo ti Israel kue na Mispa. Fade mbi yeke sambela KOTA GBIA ndali ti ala.”

1 Samuel 7:8

Ala tene na Samuel: “Mo zia e pepe; mo voro KOTA GBIA, Nzapa ti e titene lo soo e na maboko ti azo ti Filistii.”

1 Samuel 8:6

Tënë so ala tene so anzere na be ti Samuel oko pepe. Tongaso Samuel asambela *KOTA GBIA.