1 Samuel 10:1 - Mbeti ti Nzapa - Tënë so amu fini

¹ Samuel amu ngbenda ti mafuta, lo tuku mafuta ni na li ti Saul. Lo su ngbangba ti Saul si lo tene na lo: “*KOTA GBIA wani laa atuku mafuta na li ti mo titene mo ga makonzi na ndö ti azo ti lo.

1 Samuel 10:1 ပူးပေါင်းရင်းမြစ်များ

2 Samuel 1:14

David atene na lo: “Tongana nyen laa mbeto ti fango gbia so KOTA GBIA atuku mafuta na li ti lo asara mo pepe so?”

2 Samuel 19:39

Gbia atene: “Nzoni! Fade mbi na Kimham, e yeke gue; mbi yeke sara na lo tongana ti so anzere na be ti mo. Ye so kue mo yeke hunda na mbi, mbi yeke mu na mo.”

2 Samuel 20:19

Na sese ti Israel kue, gbata ti e ayeke oko ti agbata so siriri ayeke daa si ayeke sara ye na legeni. Me ti mo, mo ye ti gi lege ti buba gbata so azo ayeke ne ni mingi na sese ti Israel! Ye so ayeke ti *KOTA GBIA, mo ye ti buba ni ngbanga ti nyen?”

2 Samuel 5:2

So Saul ayeke ando gbia ti e so, mo laa mo yeke lakue na li ti azo ti Israel ti gue na ala na bira nga ti kiri na ala. *KOTA GBIA atene na mo: ‘Mo laa mo yeke bata ande azo ti Israel, azo ti mbi; mo laa mo yeke ga makonzi ti azo ti Israel.’ ”

1 Agbia 1:34

Kâ, fade wayango-sandaga Sadok na wayanga-Nzapa Natan ayeke tuku mafuta na li ti lo ti zia lo gbia na ndö ti azo ti Israel. Ti ala, ala yeke huru tatalita si ala dekongo, atene: ‘E mu gbia Salomon na nduzu!’

1 Agbia 19:18

Me fade mbi yeke bata azo saki mbarambara na Israel; azo ni ayeke azo so kue akuku na gbe ti nzapa *Baal pepe, ala su gere ti lo pepe.”

2 Agbia 20:5

“Kiri, mo tene na Ezekias, makonzi ti azo ti mbi, mo tene: Tënë so KOTA GBIA, Nzapa ti David, kotara ti mo atene ayeke so: ‘Mbi ma sambela ti mo awe, mbi baa ngu ti le ti mo awe. Baa, mbi yeke kai kobela ti mo. Na peko ti lango ota, mo yeke kiri ti gue na ya ti kota da ti KOTA GBIA.

2 Agbia 9:1

Wayanga-Nzapa Élisée airi mbeni zo oko na popo ti azo ti bongbi ti awayanga-Nzapa si atene na lo: “Leke tere ti mo, mo mu ngbenda ti mafuta so, mo gue na gbata ti Ramot, na sese ti Galaad.

2 Agbia 9:12

Me atanga ni atene na lo: “Mvene! Mo tene na e tënë ti ye so asi so ma!” Yehu atene: “Tënë so lo tene na mbi ayeke so: ‘Tënë so KOTA GBIA atene ayeke so: Mbi tuku mafuta na li ti mo titene mo ga gbia ti Israel.’ ”

Abia (Psaumes) 135:4

Biani, KOTA GBIA asoro Jacob ndali ti lo wani, lo soro Israel titene aga ye ti lo wani.

Abia (Psaumes) 2:12

Ala kuku ti voro molenge ti lo si lo sara ngonzo pepe. Tongana lo sara ngonzo, fade ala kui na lege ti sarango ye ti ala so. Biani, gi kete ye, ngonzo ti lo alondo tongana wâ. Ti ala nzoni, azo so kue akpe na lo ti bata tere ti ala.

Abia (Psaumes) 78:71

na ndembe so lo yeke bata ataba. Lo sara si lo ga zo ti batango azo ti Jacob, azo ti lo; lo ga zo ti batango azo ti Israel, ye ti lo.

Sigingo 30:23

“Mo mu apendere yombo: kilo oku ti *mire ti ngu ni, kilo use na ndambo ti sinamome so afun nzoni, kilo use na ndambo ti kanele so afun nzoni

Jérémie 10:16

Ti Nzapa, lo yeke tongana ala pepe, lo so lo yeke mosoro ti Jacob; lo laa lo sara si dunia abaa gigi, mara ti Israel ayeke ye ti lo; iri ti lo ayeke KOTA GBIA so ayeke na ndö ti dunia kue.

Ezekiel 16:13

Aye ti pendere ti mo ayeke na lôro nga na wen ti nginza; a sara abongo ti mo na len ti nzoni ni nga na abongo ti ngangu ngere so a sara apendere nzoroko na tere ni. Kobe ti mo gi farini ti nzoni ni, mafuta ti wotoro na mafuta ti olive. Tongaso mo ga pendere ahon ndoni si mo lingbi ti duti gbia-wali.

Osée 13:2

Ti fadeso, azo ti Efraim angba ti sara siokpari: ala kporo wen si asara na anzapa nde, ala mu wen ti nginza ti ala si na lege ti kode ti ala, ala sara na ayanda. Ye so kue ayeke ye ti maboko ti awakode-kua. Ndali ti anzapa ni, azo ayeke tene: “Azo, ala mu asandaga na anzapa ni!” Azo ayeke su ngbangba ti akete bagara!

Awatokua 13:21

Na ndembe so ala hunda ti wara mbeni gbia, Nzapa amu na ala Saul, molenge ti Kish, zo ti mara ti Benjamin; lo le-gbia na ya ti ngu baleosio.

Ndia ti fani use ni 32:9

Me azo ti Israel ayeke azo so aga ti KOTA GBIA, *ahale ti Jacob aga ye ti lo.

1 Tesalonike 5:26

Ala bara a-ita kue na sungo ngbangba so ayeke nzoni na le ti Nzapa.

Ahebro 2:10

Nzapa asara ye kue, ye kue ayeke ndali ti lo. Lo ye ti mu azo mingi ti li na ala na ya ti gonda ti lo. Biani, alingbi fade lo sara titene Jésus aga nzoni kue na lege ti pasi so lo baa. Andaa Jésus ayeke mu lege na azo titene ala soo kuâ.

Aye so Nzapa afa 5:8

So lo mu ni awe, aye osio so ayeke na fini na akangba baleuse na osio kue akuku na gbe ti lo. Ala kue ayeke na akundi nga na akopo ti lôro so yombo asi singo na ya ni; yombo ni ayeke sambela ti azo ti Nzapa.

1 Samuel 12:3

Baa, mbi laa na dawa ti ala so. Tongana mbi sara mbeni ye ti sioni, ayeke nzoni ala fa ni na le ti *KOTA GBIA nga na le ti gbia so lo soro lo so. Zo wa laa mbi mu bagara ti lo wala lele ti lo, zo wa? Zo wa laa mbi mu ye ti lo na haram wala mbi sara ngangu na lo, zo wa? Zo wa laa apete goro na mbi si mbi kanga le na ndö ti tënë ti lo, zo wa? Fade mbi yeke kiri na ni na lo.”

1 Samuel 13:14

Me fadeso, lengo-gbia ti mo ayeke ninga pepe. KOTA GBIA asoro mbeni zo so be ti lo wani aye; lo zia lo ti duti makonzi na ndö ti azo ti lo, ngbanga ti so yanga so lo mu na mo, mo sara ye alingbi na ni pepe.”

1 Samuel 15:1

Samuel atene na Saul: “Mbi laa *KOTA GBIA atokua mbi lani ti tuku mafuta na li ti mo titene mo ga gbia ti azo ti Israel, azo ti lo. Fadeso, ayeke nzoni mo ma tënë so KOTA GBIA atene.

1 Samuel 15:17

Samuel atene: “So mo yeke baa tere ti mo wani lani tongana kete zo so, KOTA GBIA laa asara si mo ga makonzi na li ti azo ti Israel pepe? Lo tuku mafuta na li ti mo si mo ga gbia ti azo ti Israel.

1 Samuel 16:1

*KOTA GBIA atene na Samuel: “Fade mo yeke ngba ti sara mawa ndali ti Saul ngbii asi lawa? Mbi ke lo awe; lo yeke ngba gbia ti Israel mbeni pepe. Mo tuku mafuta na ya ti didi ti mo, mo londo mo gue. Mbi yeke tokua mo na ndo ti Yese, zo ti Betlehem, ngbanga ti so mbi soro mbeni molenge ti lo oko titene lo ga gbia.”

1 Samuel 16:13

Samuel amu didi so mafuta ayeke na ya ni si lo tuku mafuta ni na li ti David na le ti a-ita ti lo. Gi na lango ni so, yingo ti KOTA GBIA aga na ndö ti David. Na pekoni, Samuel amu lege akiri na Rama.

1 Samuel 2:10

Azo so alondo ti tiri na KOTA GBIA, fade lo yeke kungbi ya ti ala. Na nduzu kâ, lo yeke tokua bekpa ti sungba na ndö ti ala. Fade KOTA GBIA ayeke fâ ngbanga ti azo ti sese kue. Lo yeke mu ngangu na zo so lo zia lo gbia; zo so KOTA GBIA asoro lo ti ga gbia, fade lo sara si lo wara ngangu mingi.”

1 Samuel 24:6

Na peko ti aye so, be ti David apika mingi, ngbanga ti so lo fâ yanga ti kota bongo ti Saul.

1 Samuel 26:11

Ayeke nzoni KOTA GBIA abata mbi si mbi sara sioni pepe na zo so KOTA GBIA atuku mafuta na li ti lo! Mu gi likongo so ayeke nduru na mbage ti li ti lo, nga na ngângâ ti ngu si e gue.”

1 Samuel 26:9

Me David atene na Abishai: “Fâ lo pepe. Zo so *KOTA GBIA atuku mafuta na li ti lo awe so, tongana mbeni zo afâ lo, fade a yeke zia zo ni senge?”

1 Samuel 8:19

Me azo ti Israel ake ti ma tënë ti Samuel, ala tene: “E ke awe! E ye ti e ti wara gi gbia.

1 Samuel 8:9

Tongaso, ma tënë ti ala. Me mo gboto mê ti ala nzoni; mo fa na ala lege so gbia ni ayeke le-gbia ande na ndö ti ala.”

1 Samuel 9:16

“Kekereke gi na oko ngbonga so, fade mbi yeke tokua na mo mbeni zo ti mara ti Benjamin titene mo tuku mafuta na li ti lo si lo ga makonzi ti azo ti Israel, azo ti mbi. Lo laa lo yeke zi azo ti mbi na maboko ti azo ti Filistii. Biani, mbi baa mawa ti azo ti mbi si mbi ma toto ti ala.”

1 Samuel 9:27

So ala si na maka ti gbata ni awe, Samuel atene na Saul: “Mo tene na zo ti kua ti mo ti hon na dawa ti e.” Zo ti kua ni ahon. Samuel atene: “Ti mo, luti kete si. Mbi ye ti fa na mo tënë so KOTA GBIA atene.”