1 Korente 5:11 - Mbeti ti Nzapa - Tënë so amu fini

¹¹ Me mbi su mbeti so lani na ala si zo so atene, ni yeke ita ti ala, zo ti Christ si lo yeke gi wali wala koli kirikiri, kota nzara ti warango ye ayeke na be ti lo, lo yeke voro anzapa nde, lo yeke du mvene na li ti amba ti lo, lo yeke ngbaa ti samba, wala lo yeke zo ti nzi, alingbi ala sara songo na lo pepe, ala te nga kobe na mara ti zo tongaso pepe!

1 Korente 5:11 ပူးပေါင်းရင်းမြစ်များ

Abia (Psaumes) 10:3

Zo ti sioni ni apika kate ti lo ndali ti aye so nzara ni ayeke na be ti lo; so lo wara aye ni awe, lo zonga KOTA GBIA, lo he lo na ngia.

Abia (Psaumes) 101:5

Zo ti tenengo mvene na iri ti amba ti lo na hondengo ni, fade mbi yeke kanga yanga ti lo. Zo so abaa amba ti lo tongana mbumbuse ye si baba ahon ndö ti lo, mbi lingbi ti kanga be ti mbi na lo pepe.

Ezekiel 22:12

Na ndo ti mo, azo ayeke mu goro titene ala tuku mene. Ala sara boon ti nginza na amba ti ala si na pekoni, ala yeke hunda gba ti nginza na ndö ni; ala yeke te aye ti amba ti ala na ngangu. Ti mbi, be ti ala agirisa na mbi biani biani; so tënë ti yanga ti Kota Gbia NZAPA laa.

Matthieu 18:17

Tongana lo ke ti ma ala, mo fa peko ti tënë ni na azo ti *Eglize. Tongana lo ke ti ma azo ti Eglize, mo baa lo tongana zo so ahinga Nzapa pepe, wala tongana zo ti rongo nginza ti lapo.

Matthieu 23:25

“Mawa na ala, awafango-ndia, ala na afarizien! Tënë ti yanga ti ala ayeke nde na sarango ye ti ala! Ala yeke sukula tere ti akopo na asembe ti ala, me na ya ti akopo na asembe ni, gi aye ti nzi na aye ti kota be laa asi singo daa.

Nzoni Tënë so Luc asu na mbeti 18:11

Farizien ni aluti ti lo lutingo si lo yeke sambela na ya ti be ti lo, lo tene: ‘Mbi mu singila na mo, Nzapa, ngbanga ti so mbi yeke tongana tanga ti azo kue pepe. Ala yeke ti ala azo ti nzi, azo ti kirikiri, azo ti gingo awali wala akoli ti azo. Mbi yeke nga tongana zo ti rongo nginza ti lapo so pepe.

Nzoni Tënë so Luc asu na mbeti 21:34

“Ala sara hange! Ala zia be ti ala kue na nyongo samba ahon ndoni na tengo kobe ahon ndoni pepe, ala gi be ti ala na ndö ti gigi ti ala pepe. Tongana ala sara hange pepe, lango ni so ayeke wara ala

Awatokua 1:15

Mbeni lâ, azo ti Jésus abongbi tere ti ala, li ti ala kue ayeke nduru na ngbangbo oko na baleuse. Pierre alondo na popo ti ala si lo tene:

Awatokua 9:17

Tongaso Ananias ague, lo li na ya ti da so Saul ayeke daa; lo zia maboko na ndö ti Saul, lo tene: “Ita ti mbi Saul, Kota Gbia laa atokua mbi. Jésus so asi na mo na lege na gango ti mo, lo tokua mbi titene mo kiri mo baa ndo si mo si singo na Yingo-Vuru.”

Rome 13:13

Alingbi fini ti e aduti na legeni mbirimbiri tongana ti azo so ayeke sara ye na kota lâ. E te kobe wala e nyon samba ahon ndoni pepe, e sara aye ti kirikiri wala aye ti ndumba pepe, e papa wala e sara kota be pepe.

Rome 16:17

A-ita, ye so mbi hunda na ala mingi ayeke so: ala sara hange na azo so ayeke ga na tënë ti kangbi nga na tënë so asara si azo ati na ya ti siokpari; azo ni azia lege ti tënë so e fa na ala so awe. Ala zia lege ti azo ni so,

1 Korente 10:14

Ndani laa, a-ita ti mbi so mbi ye ala mingi, ala kpe lege ti vorongo anzapa nde!

1 Korente 11:21

Biani, zo oko oko ayeke do tere ti te kobe ti lo wani, ambeni zo ayeke ngba na nzara si samba ayeke sara ambeni.

1 Korente 5:13

Ti azo ti gigi, Nzapa laa ayeke fâ ande ngbanga ti ala. Mbeti ti Nzapa atene: “Ala zi zo ti sioni so ayeke na popo ti ala.”

1 Korente 6:10

azo ti nzi, azo so kota nzara ti warango ye ayeke na be ti ala, azo so ayeke ngbaa ti samba, azo ti dungo mvene na li ti amba ti ala, azo ti gbungo ye ti azo na ngangu, fade Kodro-gbia ti Nzapa ayeke ga ti ala pepe.

1 Korente 6:6

Mbeni zo ti Christ ague na mba ti lo na ngbanga, lo gue na lo na gbe ti azo so ama na be pepe!

1 Korente 6:9

Ala hinga pepe? Azo ti sarango sioni, fade *Kodro-gbia ti Nzapa ayeke ga ti ala pepe. Ala handa tere ti ala pepe: azo ti gingo wali wala gingo koli kirikiri, azo ti vorongo anzapa nde, azo ti gingo wali wala koli ti amba ti ala, akoli so ayeke lango na amba ti ala akoli,

1 Korente 7:12

Ti atanga ti azo ni, mbi yeke tene tënë so na ala (tënë ni alondo na Kota Gbia pepe, me na mbi wani): tongana mbeni ita ayeke na wali so ama na be pepe si wali ni aye ti ngba ti duti na lo, alingbi lo tumba lo pepe.

1 Korente 7:15

Me tongana zo so ama na be pepe aye ti kangbi na wali ti lo wala na koli ti lo, lo lingbi ti sara ni senge. Zo so ama na be so, mbeni ye ti kanga lo na koli ni wala na wali ni ayeke daa pepe, ngbanga ti so Nzapa airi e ti duti na siriri.

1 Korente 8:11

Ndali ti hingango ye ti mo, ita ti mo so akpengba pepe, lo so Christ akui ndali ti lo so, ayeke girisa lege.

Galasii 2:12

Kozoni, lo na ambeni zo ti amara nde ayeke te kobe. Me gi na peko ti so ambeni zo alondo na mbage ti Jacques si asi, lo gboto tere ti lo si lo yeke duti nde, lo kiri lo te kobe na ala pepe. Ndali ti so azo ayeke sara ye alingbi na tënë ti ndia ti fango *ganza, mbeto ti ala asara lo.

Efeze 5:18

Ala nyon samba ahon ndö ti ala pepe: nyongo samba ahon ndoni ayeke buba gigi ti ala; me ala zia lege na Yingo-Vuru ti si ala singo.

Efeze 5:5

Alingbi ala hinga nzoni atene, azo ti sarango ye ti ndumba, azo ti sarango ye ti kamene nga na azo so kota nzara ti warango ye ayeke na be ti ala, *Kodro-gbia ti Christ na ti Nzapa ayeke ga ti ala pepe. – Andaa sarango kota nzara ti warango ye ayeke mbeni lege ti vorongo anzapa nde. –

Kolose 3:5

Tongaso, ala zi anzara ti sarango asioni ye ti dunia so na be ti ala: sarango ye ti ndumba, sarango ye ti kamene, nzara ti tere, nzara ti sarango asioni ye nga na kota nzara ti warango ye; so ayeke mbeni lege ti vorongo anzapa nde.

2 Tesalonike 3:14

Tongana mbeni zo ake ti ma tënë so e tene na ya ti mbeti so, ala su iri ti lo na mbeti, ala sara songo na lo pepe, tongaso si kamene agbu lo.

2 Tesalonike 3:6

A-ita, e hunda na ala na iri ti *Kota Gbia Jésus Christ ti kpe lege ti a-ita so kue ayeke azo ti sopo, so sarango ye ti ala ayeke nde na tënë so e fa na ala kozoni so.

1 Timothée 3:3

lo yeke ngbaa ti samba pepe, lo yeke zo ti tiri pepe, me lo yeke zo ti nzoni be, lo yeke sara ngangu na amba ti lo pepe; nzara ti nginza ahon ndö ti lo pepe;

1 Timothée 6:5

na bingbingo tënë so ayeke kai hio pepe; aye ni so ayeke londo lakue na popo ti azo so gbungo-li ti ala aga sioni awe, ala hinga taa-tënë oko pepe. Ala baa ti ala atene, gbungo tënë ti Nzapa ngangu ayeke mbeni lege ti warango mosoro.

2 Jean 1:10

Tongana mbeni zo asi na ala si lo fa mbeni tënë nde, ala yamba lo na da ti ala pepe, ala tene nga na lo pepe: “Nzoni gango!”

Aye so Nzapa afa 2:14

Me ambeni ye so mbi ke na mo ayeke so: na ndo ti mo, ambeni zo ayeke daa so ayeke mu peko ti Balaam na lege ti fango tënë ti lo. Ando Balaam amu wango na Balak titene lo handa azo ti Israel ti te anyama so a mu na *sandaga na anzapa nde si ala sara nga aye ti ndumba.

Aye so Nzapa afa 2:20

Me ye so mbi ke na mo ayeke so: mo zia lege na Yezabel, wali so, ti sara si azo ti kua ti mbi agirisa lege. Lo yeke tene na azo atene, ni yeke wayanga-Nzapa, lo yeke fa lege na azo ti mbi ti sara aye ti ndumba si ala yeke te akobe so a mu na *sandaga na ayanda.

Aye so Nzapa afa 21:8

Me ti azo ti mbeto, azo so azia lege ti mabe, azo ti sarango asioni ye, azo ti fango zo, azo ti sarango aye ti ndumba, azo ti guengo na gbe ti yoro, azo ti vorongo anzapa nde nga na azo ti mvene kue, ye so a leke ti ku na ala ayeke kota le ti wâ ti *sufre. So laa ayeke kuâ ti use ni.”

Aye so Nzapa afa 22:15

Na gigi, azo so sarango ye ti ala akpa ti mbo, azo ti guengo na gbe ti yoro, azo ti sarango aye ti ndumba, azo ti fango zo nga na azo so aye mvene si ayeke tene mvene!