1 Korente 10:23 - Mbeti ti Nzapa - Tënë so amu fini

²³ Ambeni zo ayeke tene: “A mu na zo lege ti sara ye kue”. Taa-tënë, me ye kue laa ayeke sara nzoni na zo pepe. “A mu na zo lege ti sara ye kue”, me ye kue laa asara si Eglize amai pepe.

1 Korente 10:23 ပူးပေါင်းရင်းမြစ်များ

Rome 14:15

Tongana mba ti mo awara vundu ndali ti mbeni kobe so mo yeke te, so afa atene, mo sara ye na lege ti ndoye pepe. Zo so Christ akui ndali ti lo, alingbi mo buba lege ti lo ndali ti tënë ti kobe pepe!

1 Korente 14:12

So ala yeke na nzara mingi ti wara amatabisi ti Yingo, ayeke nzoni ala gi ti wara amatabisi so ayeke sara titene Eglize akpengba.

1 Korente 14:17

Ataa sambela ti mo ayeke nzoni mingi, fade sambela ni ayeke kpengba mba ti mo pepe.

1 Korente 14:26

Tongaso a-ita, fade e yeke sara tongana nyen? Tongana ala bongbi, mbeni zo na popo ti ala alingbi ti he mbeni bia, mbeni afa ye wala lo tene tënë ti mbeni ye so Nzapa afa na lo, mbeni atene tënë na ambeni yanga nde, mbeni akiri peko ti tënë ni na yanga ti kodro titene azo ama ya ni. Aye so kue ala yeke sara, alingbi ala sara ni titene azo ti *Eglize akpengba.

1 Korente 6:12

Ambeni zo ayeke tene: “A mu na mbi lege ti sara ye kue.” Taa-tënë, me ye kue laa ayeke sara nzoni na zo pepe. “A mu na mbi lege ti sara ye kue”, me mbi ye ti ga ngbaa ti mbeni ye oko pepe.

1 Korente 8:1

Âdu tënë ti anyama so a yeke ya na *sandaga na anzapa nde, taa-tënë, tongana ti so ala yeke tene: “E kue, e yeke azo ti hingango ye.” Hingango ye so ayeke sara si baba ahon ndö ti zo, me ndoye ayeke sara si zo ti Christ amai.

1 Korente 8:9

A mu lege na ala ti sara ye kue, me ala sara hange si ndali ti sarango ye ti ala ni, mbeni zo so mabe ti lo akpengba pepe so ati pepe.

2 Korente 12:19

Aninga mingi, ala baa ti ala atene, e yeke gi ti ga mbirimbiri na le ti ala? Oko pepe. Ndali ti gango so e ga oko na Christ, e yeke tene tënë so na le ti Nzapa. A-ita ti mbi so mbi ye ala mingi, ye so kue mbi sara so, mbi sara ni titene Eglize ti ala akpengba.

Efeze 4:29

Alingbi sioni tënë oko asigigi na yanga ti ala pepe. Me tongana lege ayeke daa, ala tene gi nzoni tënë so alingbi ti mu lege na amba ti ala ti kpengba si asara nzoni na azo so ayeke ma ala.

1 Tesalonike 5:11

Tongaso, ala mu ngangu na be ti ala na popo ti ala, ala sara si amba ti ala akpengba tongana ti so ala yeke sara ni so.

1 Timothée 1:4

Mo ke nga na ala titene ala zia be ti ala na ndö ti ambai ti mvene wala na dikongo a-iri ti akotara gbani gbani. Aye so ayeke ga na *bingbingo tënë na popo ti azo, me nzoni lege so Nzapa aleke ndali ti zo, ala lingbi ti hinga ni na lege ti aye so pepe. Zo ayeke hinga nzoni lege ni gi na lege ti mabe.