1 Korente 1:18 - Mbeti ti Nzapa - Tënë so amu fini

¹⁸ Biani, tënë ti keke ti kroa so e yeke fa ayeke buba tënë na le ti azo so ayeke mu lege ti kuâ; me ti e so e yeke soo kuâ, tënë ni ayeke ngangu ti Nzapa.

1 Korente 1:18 ပူးပေါင်းရင်းမြစ်များ

Awatokua 13:41

‘Azo so abaa tënë ti Nzapa tongana buba ye so, ala baa! Ala sara mbeto si ala kpe ahon! Biani, na ngoi so ala de na fini, mbi yeke sara mbeni ye, ye so, ataa mbeni zo atene peko ni na ala, ala yeke yeda na ni pepe.’ ”

Awatokua 17:18

Ambeni wafango-ye so ayeke a-epikurien na astoisien ato nda ti tene tënë na lo. Ambeni atene: “Tënë ti nyen laa sakpa-tënë so ayeke tene so?” Ambeni atene: “Lo kpa zo ti fango tënë ti anzapa nde.” Ala tene tongaso, ngbanga ti so Paul ayeke tene tënë ti Jésus na tënë ti zingongo ti akuâ.

Awatokua 17:32

So azo ni ama tënë so Paul atene na ndö ti zingongo ti akuâ, ambeni ahe lo na ngia si ambeni atene: “Mbeni lâ si e yeke kiri ti ma mo na ndö ti tënë so!”

Awatokua 2:47

Ala yeke sepela Nzapa si azo kue aye ala. Na ya ti lango oko oko, Nzapa ayeke sara si ambeni zo so asoo kuâ ayeke li na ya ti bongbi ti ala.

Rome 1:16

Biani, kamene ti fango Nzoni Tënë asara mbi pepe: Nzoni Tënë ni ayeke ngangu ti Nzapa so lo mu ti soo azo so kue ama na be, azuife kozoni, na pekoni azo ti amara nde.

1 Korente 1:21

Biani, azo ti dunia so, na ndara ti ala wani alingbi ti hinga Nzapa pepe, ataa na ndo so lo fa ndara ti lo daa. Ndani laa, lo leke na be ti lo ti soo azo so ama na be gi na lege ti tënë so e yeke fa si akpa buba tënë so.

1 Korente 15:2

Tongana ala bata Nzoni Tënë ni tongana ti so mbi fa na ala, fade ala yeke soo kuâ gi na lege ni. Tongana ala bata ni na legeni pepe, andaa mabe ti ala ayeke senge senge.

1 Korente 2:14

Zo so ayeke na Yingo ti Nzapa pepe, lo yeke yeda na aye ti Yingo ti Nzapa pepe: aye ni ayeke aye ti buba na le ti lo, lo lingbi ti ma ya ni pepe, ngbanga ti so zo alingbi ti hinga nda ni gi na lege ti Yingo.

1 Korente 2:2

Biani, so mbi yeke na popo ti ala, mbi ye ti hinga mbeni ye nde pepe, gi Jésus Christ oko, Jésus Christ so a fâ lo na ndö ti keke ti kroa.

1 Korente 3:19

Biani, ndara ti azo ti dunia so ayeke ye ti buba na le ti Nzapa. A su na ya ti Mbeti ti Nzapa, atene: “Lo yeke gbu azo ti ndara na lege ti mayere ti ala wani.”

1 Korente 4:10

Ndali ti Christ, e ga azo so li ti ala ayeke daa pepe, me ti ala, ala ga azo ti ndara na lege ti gango so ala ga oko na Christ. E yeke ti e na ngangu pepe, me ti ala, ala yeke na ngangu. Azo ayeke ne ala, me ti e, azo ayeke baa e tongana ambumbuse zo.

2 Korente 10:4

Aye ti bira ti e alondo na zo ti sese so pepe, me ngangu ti aye ti bira ti e alondo na Nzapa si ayeke buba angangu gbagba ti bira. Atënë ti gbungo-li ti azo so ayeke na legeni pepe, e yeke buba ni.

2 Korente 4:3

Tongana Nzoni Tënë so e yeke fa so angba na hondengo ni, angba na hondengo ni ndali ti azo so ayeke girisa lege,

1 Tesalonike 1:5

Biani, ala hinga atene, Nzoni Tënë so e fa na ala, e fa ni gi na yanga pepe, me e fa ni na ngangu nga na lege ti kua ti Yingo-Vuru. E hinga biani na be ti e, e tene, Nzoni Tënë so e fa ayeke taa-tënë. Ala kue ahinga lege ti dutingo ti e na popo ti ala, e sara ye so kue ndali ti nzoni ti ala.

2 Tesalonike 2:10

Fade lo yeke sara aye ti sioni nde nde ti handa na azo so ayeke mu lege ti kuâ. Ala yeke na lege ti kuâ, ngbanga ti so ala ke ti yamba taa-tënë so alingbi fade ti soo ala na kuâ, ala ke nga ti ye taa-tënë ni.

Ahebro 12:2

Le ti e angba na ndö ti Jésus. Lo laa lo zi lege ti mabe na e si lo sara titene e ngba na lege ti mabe ni ngbii asi na ndani. Lo yeda si azo afâ lo na ndö ti keke ti kroa, lo sara kamene ti kuâ so lo kui na ndö ti keke ti kroa pepe. Lo yeda ndali ti so lo hinga kozoni so fade lo yeke duti na ngia. Fadeso, lo yeke duti na tere ti mbata ti Gbia Nzapa, na mbage ti maboko ti lo ti koli.

Ahebro 4:12

Tënë ti Nzapa ayeke na fini si ayeke na ngangu ti sara ye. Tënë ni ayeke kpo be ti zo ahon yongoro zeme so yanga ni aza mbage na mbage. Tënë ni ayeke gue ngbii akangbi popo ti be ti zo na yingo ti zo. Tënë ni ayeke kangbi popo ti mafuta ti ya ti bio nga na ndo so abio atengbi tere daa. Tënë ni ayeke sigigi na tënë ti be ti zo nga na aye so kue nzara ni ayeke na be ti zo.