Tich Joote 13:39 - Motingʼo Loko Manyien

³⁹ Kuome ema ngʼato angʼata moyie iketo kare mi gony kuom gimoro amora ma Chik Musa ne ok nyal gonyoe ngʼato.

MUMA MALER 2015

³⁹ Bende nyaka ung’e ni ng’ato ka ng’ato moyie kuome, to owene richone duto mane Chik Musa otueyo.

Tich Joote 13:39 ပူးပေါင်းရင်းမြစ်များ

Ayub 25:4

Ka en kamano, to ere kaka dhano dibed ngʼat makare e nyim Nyasaye? Koso ere kaka dhano ma dhako onywolo nyalo bedo maler?

Ayub 9:20

Kata dabed ni aonge richo kata achiel, to dhoga pod biro mana ndhoga. Kata dabed ni aonge rach moro amora, to dhoga pod biro miyo inena kaka jaketho.

Zaburi 143:2

Kik imi jatichni yud kum nimar onge kata ngʼato achiel matimo maber e nyimi.

Isaya 53:11

Bangʼ chandruokne duto enone ler mar ngima kendo noyud mor e chunye; kuom riekone, jatichna makare nongʼad bura makare ne ji mangʼeny kendo notingʼ richogi.

Jeremia 31:32

Singruokno ok nochal gi mano mane atimo gi kweregi, kane amako lwetgi mi atelonegi kagologi e piny Misri, nikech negiketho singruokna, kata obedo nine an chworgi,” Jehova Nyasaye ema owacho.

Habakuk 2:4

“Ne kaka osungore; dwarone ok nikare. To ngʼat makare nobed mangima kuom yie mare,

Luka 10:25

Chiengʼ moro achiel, ngʼat moro molony e chik nochungʼ mondo otem Yesu, nopenjo niya, “Japuonj, en angʼo monego atim eka ayud ngima mochwere kaka girkeni mara?”

Luka 10:28

Yesu nodwoke niya, “Isedwoko kare, tim kamano, eka inibed mangima.”

Luka 18:14

“Awachonu ni ngʼatni, ma ok ngʼat machielono, nodhi dala ka en kare e nyim Nyasaye. Nimar ngʼato angʼato matingʼore malo kende nodwok piny, to ngʼat madwokore piny notingʼ malo.”

Johana 1:17

Chik nochiw kokalo kuom Musa, to ngʼwono kod adiera, to Yesu Kristo ema nokelo.

Johana 5:24

“Awachonu adier ni ngʼato angʼata mawinjo wachna, kendo moyie kuom Jal mane oora, nigi ngima mochwere, kendo ok bi ngʼadne buch tho; to osengʼado oa e tho modonjo e ngima.

Tich Joote 10:43

Jonabi duto owuoyo kuome ni ngʼato angʼata moyie kuome yudo weruok mar richo e nyinge.”

Jo-Rumi 10:10

Nimar chunyi ema iyiego mi keti kare kendo dhogi ema ihulogo mi iyud warruok.

Jo-Rumi 10:4

Kristo e giko mar Chik kendo en ema okelo ngima makare ni ji duto moyie.

Jo-Rumi 3:19

To koro wangʼeyo ni gimoro amora ma Chik wacho, owacho ni joma ni e bwo chik, mondo ji duto olingʼ thi, kendo buch Nyasaye olo piny duto.

Jo-Rumi 3:20

Kuom mano, onge ngʼama noket kare e nyime kuom timo gik ma Chik owacho, to kuom Chik ema dhano ngʼeyoe kethone.

Jo-Rumi 4:15

nikech Chik kelo mirimb Nyasaye. To kama Chik onge, ketho chik bende onge.

Jo-Rumi 4:24

to ni wan bende, ma Nyasaye biro ketonwa tim makare, wan mwayie kuom Jal mane ochiero Yesu Ruodhwa oa kuom joma otho.

Jo-Rumi 5:1

Emomiyo, kaka koro oseketwa kare kuom yie, wan gi kwe gi Nyasaye kuom Ruodhwa Yesu Kristo,

Jo-Rumi 5:20

To Chik nomedi mondo richo omedre. To kama richo nomedoree, ngʼwono nomedoree moloyo,

Jo-Rumi 5:9

Kaka koro oseketwa kare kuom rembe, donge ibiro reswa chuth kendo moloyo e mirimb Nyasaye nikech En!

Jo-Rumi 8:1

Mano emomiyo koro onge bura kuom joma oyie kuom Kristo Yesu,

Jo-Rumi 8:3

Gima Chik ne ok nyal timo nikech ringruok manyap mar dhano, ema Nyasaye notimo kuom oro Wuode owuon, e kido mar dhano ma jaricho mondo obed misango magolo richo. Osetimo kamano mondo omi bura olo richo,

Jo-Rumi 9:31

to Israel mane otemo matek mondo oyud ngima makare motenore kuom Chik to pok oyude.

1 Jo-Korintho 6:11

Kamano e kaka jomoko kuomu ne chalo. To ne olwoku mi opwodhu, mi oketu udoko joma kare e nying Ruoth Yesu Kristo, kendo kuom Roho mar Nyasachwa.

Jo-Galatia 2:16

wangʼeyo ni dhano ok nyal ket kare kuom mako Chik, to mana kuom yie kuom Yesu Kristo. Omiyo kata mana wan bende waseketo yiewa kuom Kristo Yesu, mondo eka oketwa kare kuom yie kuom Kristo, to ok kuom mako chik, nikech onge ngʼama ibiro ket kare nikech mako chik.

Jo-Galatia 2:19

“Nikech korka chik to ne asetho kuom chik mondo eka abed mangima ne Nyasaye.

Jo-Galatia 3:8

Nosewach e muma chon ni Nyasaye noket joma ok jo-Yahudi kare kuom yie kendo nolando Injili motelo ni Ibrahim niya, “Ogendini duto nogwedhi nikech in.”

Jo-Galatia 5:3

To bende awachonu ni ngʼato angʼata moter nyangu nigi gowi mar chopo Chike Musa mamoko duto.

Jo-Hibrania 10:11

Jodolo mag jo-Yahudi duto chungʼ odiechiengʼ kodiechiengʼ mondo otim tich dolo, ka ginuoyo mana misango ma ok nyal golo richo.

Jo-Hibrania 10:4

nikech remb rwedhi gi diek ok nyal golo richo kata matin.

Jo-Hibrania 7:19

(nikech chik ne ok nyal keto gimoro kare), kendo koro osekelnwa geno manyien maber moloyo chik machon-no, kendo kuom genono wasudo machiegni gi Nyasaye.