Eklesiastes 6:3 - Motingʼo Loko Manyien

³ Ngʼato nyalo bedo kod nyithindo mia achiel kendo odak higni mangʼeny; to kata bed ni odak mangʼeny maromo nade, ka ok onyal yudo mor kuom mwandune kendo ok oike maber ka otho, to awacho ni nyathi monywol kosetho ber moloye.

MUMA MALER 2015

³ Ng’ato nyalo bedo gi nyithindo mia achiel, mi odag higni mang’eny. To kata da bed ni odak aming’a machal nadi, to ok oyudo mor kuom gik ma en go, kendo ok oyike maber ka otho, to oneno ni nyathi ma obuogi kosetho ber moloye.

Eklesiastes 6:3 ပူးပေါင်းရင်းမြစ်များ

Chakruok 33:5

Eka Esau notingʼo wangʼe malo moneno mon kod nyithindo. Nopenjo niya, “Magi gin ngʼa gini man kodigi?” Jakobo nodwoke niya, “Gin nyithindo ma Nyasaye osemiyo jatichni kuom ngʼwonone.”

Chakruok 47:9

Kendo Jakobo nodwoko Farao niya, “Higni ma asewuothogo e piny gin higni mia achiel kod piero adek. Gisebedo manok kendo matek kendo ok ginyal romo gi higni mane wuora odak godo e piny.”

2 Ruodhi 10:1

E piny Samaria ne nitie yawuowi piero abiriyo mawuok e dhood Ahab. Kuom mano Jehu nondiko barupe mooro Samaria ne jotend Jezreel, ne jodonge kod jorit mag nyithind Ahab kowachonegi niya,

2 Ruodhi 9:35

To kane gidhi yike onge gima negiyudo makmana hanga wiye, tiendene gi lwetene.

1 Weche mag Ndalo 28:5

To kuom yawuota duto ma bende Jehova Nyasaye osemiya mangʼeny, noyiero wuoda Solomon mondo obedi e kom loch mar pinyruodh Jehova Nyasaye e Israel.

2 Weche mag Ndalo 11:21

Rehoboam nohero Maaka nyar Abisalom moloyo mondege mamoko kod mon mamoko. Ne en kod mon apar gaboro kaachiel gi mon mamoko piero auchiel, bende ne en gi yawuowi piero ariyo gaboro kod nyiri piero auchiel.

Esta 5:11

Haman nosungorenegi kaka en-gi mwandu mathoth, gi yawuowi mangʼeny, to gi kaka ruoth osemiye duongʼ moloyo jotelo gi jodongo mamoko.

Esta 7:10

Omiyo neginego Haman e gima noseiko mondo oneg-go Modekai. Eka mirimb ruoth norumo.

Ayub 3:11

“Dine atho ei minwa, kata dine obwoga ka inywola?

Ayub 3:16

Koso angʼo mane omono panda ei liel ka nyathi monywol kosetho, kata ka nyathi mayom mane ok oneno ler mar odiechiengʼ?

Zaburi 58:8

Mana kaka ndach kamnie maleny nono, kendo mana kaka nyathi monywol kosetho, mad kik gine wangʼ chiengʼ.

Ngeche 17:6

Nyikwayo gin osimbo ne joma oti, to jonywol e mor mar nyithindgi.

Eklesiastes 4:3

To joma johawi moloyogi duto, gin jogo ma pod ok onywol, ma pod ok oneno richo mitimo e bwo wangʼ chiengʼ.

Eklesiastes 6:4

Nywol mar nyathi ma kamano en kayiem nono, olal e mudho kendo kata nying ok chake.

Jeremia 22:19

Enoyike ka punda, moywa kendo owit oko mar dhorangeye Jerusalem.”

Jeremia 36:30

Emomiyo, ma e gima Jehova Nyasaye wacho kuom Jehoyakim ruodh Juda: Ok nobed gi ngʼama bedo e kom duongʼ Daudi; ringre nowit oko kendo nomo oko ne liet mar odiechiengʼ kendo ne thoo mar otieno.

Jeremia 8:2

Chokego noyar oko e nyim chiengʼ gi dwe kod sulwe duto manie polo mane gihero kendo tiyonegi ma bende negiluwo bangʼ-gi ka gipenjo rieko kendo lamogi. Ok nochokgi kata ikgi, to ginichal ka owuoyo manie lowo.

Mathayo 26:24

Wuod Dhano biro dhi adier mana kaka nondiki kuome. To ngʼat mandhogo Wuod Dhano none malit! Dine obedo maber moloyo kane ok onywole.”