San Marcos 8:11 - Mixtec Silacayoapan

¹¹ A̱nda̱ já na̱xi̱nu̱ na̱ fariseo nu̱ Jesús já na̱casáhá ndítúhún na̱ xi̱hi̱n á. Ta sa̱há ña̱ cúni̱ na̱ coto ndojó cuití ñahá na̱ sa̱há ña̱ cán quéa̱ na̱xi̱ca̱ na̱ nu̱ á ña̱ ná caja in ña̱ xitúhún, ña̱ quixi indiví já ná canda̱a̱ ini na á mé a̱ nda̱a̱ cúú á ña̱ na̱chindahá Ndióxi̱.

San Marcos 8:11 ပူးပေါင်းရင်းမြစ်များ

San Mateo 12:38

Java na̱ fariseo xi̱hín na̱ jána̱ha̱ ley Moisés na̱ca̱ha̱n na̱ xi̱hín Jesús já na̱cachi na já xi̱hi̱n á: —Maestro, cúni̱ nde̱ ña̱ ná caja ndó in ña̱ha xitúhún nu̱ú nde̱ já ná cuni nde̱ —na̱cachi na xi̱hín Jesús.

San Mateo 19:3

Joo ndaja coo java na̱ fariseo na̱cayati na nu̱ Jesús sa̱há ña̱ coto ndojó ñahá na̱ cúni̱ na̱. Já na̱cachi na já xi̱hi̱n á: —Á núná nu̱ú in da̱ta̱a jándacoo da ñájíhí da̱ sa̱ha̱ ndá ña̱ na̱cuu —na̱cachi na̱ fariseo cán.

San Mateo 21:23

Tá na̱ndihi já na̱ndi̱hvi Jesús ini veñu̱hu cáhnu cán ta nani jána̱ha̱ tu̱hun Ndióxi̱ nu̱ú na̱ ndúu cán na̱xi̱nu̱ na̱ sa̱cua̱ha̱ nu̱ú ju̱tu̱ xi̱hín na̱ sa̱cua̱ha̱ nu̱ú na̱ Israel cán nu̱ á. Já na̱cachi na já xi̱hi̱n á: —Yo já sáhan ña̱ma̱ni̱ nu̱u̱n cajún ña̱ cájún yóho —na̱cachi na.

San Mateo 22:15

Tá na̱ndihi já na̱quee na̱ fariseo na̱sa̱ha̱n na̱ jándique táhan na tu̱hun na ndaja caja na coto ndojó na̱ Jesús xi̱hín tu̱hun cáha̱n mé á já ná cuu jácojo na cua̱chi ja̱tá.

San Mateo 22:18

Joo sa̱ na̱canda̱a̱ ini Jesús ña̱ cáhvi núu ini na sa̱há ña̱ cán quéa̱ na̱cachi a já xi̱hi̱n ná: —Co̱ cúú ndó tá quia̱hva ndáa ndó jáchi̱ cúni̱ ndó coto ndojó cuití ndó ye̱he̱.

San Mateo 22:23

Ta sa̱ mé qui̱vi̱ já na̱sa̱ha̱n java na̱ saduceo ca̱ha̱n na̱ xi̱hín Jesús. Ta mé na̱ saduceo yóho co̱ cándúsa na ña̱ nditacu tucu na̱ sa̱ na̱xi̱hi̱. Sa̱há ña̱ cán quéa̱ na̱nda̱ca̱ tu̱hún na̱ Jesús já cáchí na̱ já xi̱hi̱n á:

San Marcos 12:15

Joo sa̱ na̱canda̱a̱ ini Jesús ña̱ co̱ cúú ná tá quia̱hva ndáa na ña̱ cán quéa̱ na̱cachi a já xi̱hi̱n ná: —Cánda̱a̱ cáxí táhyí ini i̱ ña̱ cúni̱ ndó coto ndojó cuití ndó ye̱he̱. Jána̱ha̱ ndó in táhan jiu̱hún ja̱n nu̱ú i̱ ná cande̱hé e̱ ña̱ —na̱cachi a.

San Marcos 2:16

Joo na̱ jána̱ha̱ ley Moisés xi̱hín na̱ fariseo tá na̱xini na íin coo Jesús xíxi a xi̱hín na̱ cán na̱casáhá cáchí na̱ já xi̱hín da̱ xíca tuun xi̱hín Jesús: —Ndá cuéntá quéa̱ xíxi xitoho ndó xi̱hín na̱ játaca jiu̱hún cuéntá impuesto ta xi̱hín java ga̱ na̱ cája cua̱chi —na̱cachi na̱ cán.

San Marcos 9:16

A̱nda̱ já na̱nda̱ca̱ tu̱hún Jesús na̱ já cáchí a̱ já xi̱hi̱n ná: —Ndá sa̱ha̱ ndítúhún ndó xi̱hín na̱ ja̱n —na̱cachi a.

San Lucas 10:25

Ta ndaja coo in da̱ jána̱ha̱ ley Moisés na̱nda̱ca̱ ndichi da ca̱ha̱n da̱ xi̱hi̱n Jesús jáchi̱ cúni̱ da̱ coto ndojó ñahá da̱. Ta na̱cachi da já xi̱hi̱n á: —Maestro, ndía̱ ndítahan caja i̱ já ná cuu catacu u̱ indiví a̱nda̱ ama cáa qui̱vi̱ —na̱cachi da xi̱hi̱n á.

San Lucas 11:16

Ta java ga̱ na̱ cúni̱ na̱ coto ndojó na̱ Jesús sa̱há ña̱ cán quéa̱ na̱xi̱ca̱ na̱ nu̱ á ña̱ ná caja mé á ña̱ha xitúhún quixi indiví já ná cuni na.

San Juan 4:48

Tá na̱ndihi já na̱cachi Jesús já xi̱hi̱n dá: —Ndúsa̱ caja i̱ ña̱ náhnu xi̱hín ña̱ xitúhún nu̱ ndo̱ já cuu candúsa ndó ye̱he̱ á tá co̱ó ta co̱ cúni̱ ndó candúsa ndó ye̱he̱ —na̱cachi Jesús.

San Juan 6:30

A̱nda̱ já na̱cachi tucu na̱ cán já xi̱hi̱n á: —Ndá ña̱ha xitúhún chága̱ cuu caja ndó nu̱ú nde̱ viti ña̱ ná cuni nde̱ ña̱ já ná cuu candúsa nde̱ ndo̱hó. Ndá a̱ náhnu quéa̱ cuu caja ndó.

San Juan 7:48

Jáchi̱ ja̱nda̱ ni in túhún toho táhan na̱ sa̱cua̱ha̱ ndúu tañu mé nde̱ co̱ cándúsa nde̱ da̱ ja̱n. Ta ni in na̱ fariseo co̱ cándúsa na nu̱ cáha̱n Jesús ja̱n.

San Juan 8:6

Na̱cachi na̱ cán já xi̱hín Jesús jáchi̱ cúni̱ na̱ coto ndojó cuití ñahá na̱ ta cúni̱ na̱ ñe̱he̱ íní na̱ jácojo na cua̱chi ja̱tá Jesús. Tá na̱ndihi já na̱saco̱o Jesús já na̱casáhá cáhyí a̱ nu̱ ñúhu̱ cán xi̱hín nducu ndáha̱ á.

Hechos 5:9

A̱nda̱ já na̱cachi Pedro já xi̱hi̱n ña̱: —Mé ndó na̱jándique táhan ndó tu̱hun ndó coto ndojó ndo̱ ínima̱ yi̱i̱ Ndióxi̱. Cande̱hé. Ja̱ta̱ vehe ja̱n va̱xi na̱ na̱sa̱ha̱n na̱jándu̱xu̱ yíu̱n. Ta viti cañehe ri na yo̱hó va cu̱hu̱n na̱ jándu̱xu̱ na̱ —na̱cachi Pedro xi̱hi̱n ña̱.

1 Corintios 10:9

Ta co̱ ndítahan nu̱ yo̱ coto ndojó yo̱ Jesucristo, xitoho í ña̱ ná cande̱hé yo̱ á mé a̱ nda̱a̱ jándoho a iní sa̱há cua̱chi cája í. Jáchi̱ quia̱hva já na̱caja java na̱ cán va ta sa̱há ña̱ cán na̱xi̱hi̱ na̱ na̱caja cua̱há co̱o.