Yeremiya 49:37 - BIBLIYA NTAGATIFU OMU MASHI

³⁷ “Abaelamiti nâbadirhimanya embere z’abashombanyi bâbo, embere za balya babalongeza olufù. Nâbarhumira obuhanya omu bukunizi bwâni bunene. Nâbashimbulula n’ebîrha kuhika mbamalîre”.

Yeremiya 49:37 ပူးပေါင်းရင်းမြစ်များ

Yeremiya 30:24

“Obukunizi bunene bwa Nyakasane burhahube arhanacihubula, n’okuyunjuliza omuhigo àligwêrhe emurhima. Mwayîshiyumva e­byo omu nsiku nzinda”».

Yeremiya 48:2

“Yahwerîrwe, erhaciri irenge lya Mowabu! E Heshiboni bajire irhigi ly’obuhanya bwâge: Bangaduki: Rhumukûle omu mashanja! Na­we, Madmeni, orhacibumbûle akanwa, engôrho ekugosire bwinjà­ bwinjà”.

Yeremiya 48:39

Bulya anashâbirwe, bandi endûlù! Bulya Mowabu, n’enshonyi ebusù, ayêrekîne omugongo! Mowabu ahindusire masheka g’abagera na cêrekane ca kuyôbohya oku balungu.

Yeremiya 49:22

Kwo ali nk’ikozi lishanjwîre ebyûbi, amâsoka n’okulembêra enyanya za Bosra. Olwo lusiku emirhima y’abasirika b’entwâli ba Edomu yayôrha ak’omurhima gw’omukazi odwîrhe alumwa n’emikero y’okuburha.

Yeremiya 49:24

Abantu b’e Damasi batwîsire omurhima, bahindwîre omugongo bayâka, badirhimanyire n’omusisi; balikwo amalibuko n’amalumwa ak’omukazi walumwa n’emikero y’okuburha.

Yeremiya 49:29

Babanyâge amahêma gâbo n’amasò gâbo g’ebintu, amashîro gâbo n’ebirugu byâbo byoshi binyagwe. Banyagwe engamiya zâbo banabalumizekwo ecôbà, empande zoshi.

Yeremiya 49:38

“Nâkula mwâmi n’abarhambo omu Elamu, ngwîkemwo entebe yâni y’obwâmi. Ntyo kwo Nyakasane adesire”.

Yeremiya 49:5

Alaga oku nkolaga nakuhondakwo côbohya, kanwa ka Nyakasane Nyamuzinda w’Emirhwe, akugorhe empande zoshi, mwâlibirhwa­ kwo mweshi, mugende mihanda erhashimânana na ntâye wâshûbûze abajayâka.

Yeremiya 50:36

Engôrho oku balaguzi bâge bahurhiremwo irhwe! Engôrho oku basirika bâge, batwîke omurhima!

Yeremiya 6:19

Oyumve igulu! Lâba oku ndwîrhîre olu lubaga obuhanya bugoma bwâbo bukudwîrhe, bulyâla ebinwa byâni barhabirheziri kurhwiri, n’irhegeko lyâni bàligayaguzize.

Yeremiya 9:15

Nnambashandâze omu karhî k’amashanja barhishi, mashanja bashakulûza bâbo barhamanyaga nârhuma n’engôrho yabakwâma, kuhika mbalambike boshi.

Yeremiya 9:16

Ee wee! Muhamagale abalasi baj’eno. Mulêrhe abalenga bayishe.

Ezekiyeli 12:14

“Na balya boshi bamulamusize, balya boshi bakazâg’imulanga, emirhwe yâge yoshi nâyishandabanya balumîre mpande zoshi, na mbayomolere engôrho omu nyuma zâbo”.

Ezekiyeli 32:23

“Ebyûsho byâge babiheba omu ndalâlà ekuzimu, engabo yâge ezungulusire ecûsho câge; boshi bâli banizirwe, bafà n’engôrho, n’obwo bwo bakazâg’ihira ecôbà omu igulu ly’abazîne!”

Ezekiyeli 5:12

Cihimbi ciguma ca kasharhu c’abantu bâwe bafà n’ecihûsi, ishali lyâbamalirira ekarhî kâwe, ecindi cihimbi ca kasharhu engôrho yâci­malirira eburhambi bwâwe n’ecindi cihimbi ca kasharhu cicisigîre nâcishandabaganya balibirhe erhi n’engôrho ebali omu nyuma.

Ezekiyeli 5:2

Ecigabi ciguma ca kasharhu, wânacidulika muliro omu karhî k’olugo, ago mango olugo lwâbalugorhe. Wânashubirhôla ecindi cihimbi ca kasharhu wânaja wâcitwa n’engôrho, kuzunguluka olugo loshi. Ecindi cihimbi ca kasharhu cizinda, wânacibuha cihêkwe n’empûsi, erhi nâni namâyisha nyômwîre engôrho enyuma zâbo.

Ben Levi 26:33

Ninyu namushandabanya omu mashanja, ngal’immuyômolera engôrho omu nyuma zinyu; ecihugo cinyu câhagulwa, n’engo zinyu ziyôrhe nkunûnû y’irungu.