Yeremiya 23:8 - BIBLIYA NTAGATIFU OMU MASHI

⁸ Ci mpu: «azîne Nyakasane owayinamulaga anagalula obûko bw’enyumpa y’Israheli kurhenga omu cihugo c’emwênè na kurhenga omu bihugo byoshi àli abashandabanyize mpu babêre omu ishwa lyâbo».

Yeremiya 23:8 ပူးပေါင်းရင်းမြစ်များ

Izaya 11:11

Mw’olwo lusiku, Nyakasane ayash’ilambula okuboko, mpu lyo alîkûza abasigîre bw’omu lubaga lwâge; balya bâge bacisigîre omu Asîriya n’omu Mîsiri, omu Patrosi n’omu Kushi n’omu Elamu, omu Sinazi n’omu Hamati n’omu birhwa by’enyanja,

Izaya 14:1

Nêci, Nyakasane âbabalira Yakôbo ânashub’icîshoga Israheli; âshub’ibadekereza omu cihugo câbo. Abantu b’embuga bacîgusha haguma nabo banalungane n’enyumpa ya Yakôbo.

Yeremiya 16:14

Lâba oku ziyîruka ensiku, akanwa ka Nyakasane, barhakaciderhamwo mpu: «Nyakasane ozîne, ye wayinamulaga bene-Israheli kurhenga omu cihugo c’e Mîsiri!

Yeremiya 16:15

“Ciru Nyakasane ozîne, ye wâyinamulage bene-Israheli kurhenga omu cihugo c’emwênè na kurhenga emunda àli abashandabanyize. Nâbashubiza omu cihugo nalimpîre b’îshe!”»

Yeremiya 23:3

Nâshubuza niene ebibuzi byâni byasigîre, kurhenga omu bihugo byoshi nali mbishandabanyize, nabigalula omu lwâbuko: byaburhana biyôloloke.

Yeremiya 29:14

“Nâleka munshange, kanwa ka Nyakasane. Empira zinyu nâziga­lula, nnâmubuganyazo kurhenga omu mashanja goshi na kurhenga n’emunda namuhabulîre yoshi, kanwa ka Nyakasane. Nâmugalula ahâla mwâli erhi mu­shandabana”».

Yeremiya 30:10

“Nâwe, we mwambali wâni Yakôbo, orhaciyôbohaga kwo Nyakasane adesire, orhacirhe omurhima, wâni Israheli, bulya nyishire nti nkuyôkole mw’ebyo bihugo by’ekulî, nâyôkola n’abâna bâwe, omu cihugo bahêkagwa bujà. Yakôbo agaluka anashubibona obuholo n’omurhûla. Na ntâye wacimurhemula”.

Yeremiya 30:3

“Bulyâla, lâba k’orhabwîni oku ensiku zayisha, yekudesire Nyakasane, zo nâgalulamwo empira z’olubaga lwâni lw’Israheli (na Yûda), kanwa ka Nyakasane, nâbashubiza omu cihugo nahâga b’îshe cishube câbo”».

Yeremiya 31:8

Nâbashûbûza kurhenga omu cihugo c’enjira nyanya, n’ambahuluza kurhenga emahanga g’igulu. Bo balimwo emihûrha n’enkunagizi, abakazi bali nda, n’abazîre, boshi haguma, olubaga lwâni lugaluke oku lwanali.

Yeremiya 32:37

“Nâshûbûza olubaga lwâni kurhenga omu mahanga bàyâkiraga oburhè bwâni, nkolaga nabashanganya mbabwârhaze badêkerere omu murhûla”.

Yeremiya 8:3

N’oku banyi balobôka muli obwo bûko bw’emihera, ngasi aha nakabahabulira, ye kudesire Nyakasane w’Emirhwe, olufù lwâbà lwo lukulu aha buzîne.

Ezekiyeli 28:25

Ntya kwo adesire Nyakasane Nyamubâho. Amango nashûbûza omulala gwa bene Israheli kurhenga omu karhî k’amashanja, emunda bali bashandabîne, nâyêrekana ntyo obwimâna bwâni embere z’amashanja. Gwayûbaka mulya budaka nahâga omurhumisi wâni Yakôbo.

Ezekiyeli 34:13

“Nâbikula omu mbaga, nâbishûbûza birhenge omu bihugo, nabishubiza oku budaka bwâbo nambiyâbulire oku ntondo z’Israheli, omu rhubanda n’omu hantu hayûbake omu cihugo”.

Ezekiyeli 36:24

Nâkurhenza omu mashanja, nâkushûbûza kurhenga omu bihugo byoshi nkushubize omu cihugo câwe.

Ezekiyeli 36:35

Bakaz’iderha mpu: Ecihugo càli cikola bwâmwa lêro cikola nka busâne bw’e Edeni, mpu n’engo zàli zamâshabûlwa zananyagwa n’okuhenangulwa, lêro zikola hantu hayûbake.

Ezekiyeli 37:25

Babere omu cihugo nahâga mwambali wâni Yakôbo, n’omu b’îshe wâbo bayûbakaga, babêramwo boshi n’abâna bâbo, ciru n’abâna bâbo ensiku zoshi na mwambali wâni Daudi âbà ye mwâmi ensiku zoshi.

Ezekiyeli 39:28

“Bayishimanya oku nie na ndi Nyamubâho, Nyamuzinda wâbo hano bâkengêra kurhi nabalekaga bujà emwa amashanja na kandi kurhi namâshubibashubûza nti bajè omu cihugo câbo buzira kuleka ciru n’omuguma eyôla munda”.

Mikeyo 7:15

Nka kulya mwa zirya nsiku warhurhenzagya omu cihugo c’e Mîsiri oshubigirhuyêreka ebirhangâzo.

Sofoniya 3:20

“Mw’ago mango nâmmushokolera mmuyêreke enjira, okubundi mmuhè obukuze n’irenge omu mashanja goshi g’en’igulu, hano nshubimmujira nk’oku mwanayôrhaga burhanzi, omu karhî k’amashanja goshi ga hano igulu.”» Ntyo kwo Nyakasane adesire.