Yeremiya 10:10 - BIBLIYA NTAGATIFU OMU MASHI

¹⁰ Nyakasane yêhe ye Nyamuzinda w’okuli, ye Nyamuzinda ozîne ye na Mwâmi w’ensiku n’amango. Akabà burhè, igulu linageremwo omusisi, amashanja garhankalinda omutula gwâge.

Yeremiya 10:10 ပူးပေါင်းရင်းမြစ်များ

Murhondêro 21:33

Abrahamu agwîka omurhi gw’etamarisi ahôla Bersheba anashengeraho izîno lya Nyamubâho, Nyamuzinda w’ensiku n’amango.

1 Bâm 18:39

Olubaga lwoshi lwabon’ebyo byoshi; abantu banacirhimba ehy’akamalanga oku idaho baderha mpu: «Nyakasane ye na Nyamuzinda! Nyakasane ye na Nyamuzinda!»

1 Bâm 8:60

“na ntyôla amashanja goshi g’igulu ganamanya oku Nyakasane yêne ye onali Nyamuzinda ntà wundi kulusha ye”.

1 Nganîro 29:11

Yâgirwa, wêne we nn’obukulu n’obuhashe, irenge, okurhwâliha n’obwâmi w’e nnabyo, byoshi omu mpingu na bano igulu bibà byâwe. Muhànyi, we mwâmi, we Nnahano orhegeka igulu, obuhirhi n’irenge kuli we birhenga.

2 Nganîro 15:3

Israheli agezize myâka minji buzira kubà na Nyamuzinda w’okuli, buzira kubà na omudâhwa wakaziyigîriza, buzira kubà n’oburhegesi.

Ayubu 9:6

Anashabagize igulu aha linali, n’ebikondo liyimangirakwo binagere mw’omusisi.

Ennanga 10:16

Nyamuzinda ye Mwâmi w’ensiku n’amango, amashanja g’abapagani gàhirigirha omu igulu lyâge.

Ennanga 100:3

Mumanye oku Nyakasane ye Nyamuzinda, Yêne warhulemaga nîrhu rhuli bâge, rhuli ishanja lyâge, rhunali bibuzi by’okw’irango lyâge.

Ennanga 100:5

Bulya Nnâmahanga ali mwinjà, obwonjo bwâge buli bw’ensiku n’amango, arhanarheba ndi kurhenga abantu baburhwa.

Ennanga 104:32

Kàli akalola okw’igulu linageremw’omusisi wâni! akahuma oku ntondo enatumbûke cigî!

Ennanga 114:7

Igulu, nêci dirhimana omu masù ga Nyakasane, omu masù ga Nyamuzinda wa Yakôbo.

Ennanga 145:13

Obwâmi bwâwe buli bw’emyâka n’emyâka, oburhegesi bwâwe buyôrha buli oku ngasi iburha. Nyakasane ali w’okuli omu nderho zâge zoshi, ali na Mwimâna omu bijiro byâge byoshi.

Ennanga 146:6

Nnâmahanga ye walemaga empingu n’igulu, enyanja n’ebiyibâmwo byoshi. Azibuhize endagâno zâge ensiku zoshi.

Ennanga 18:7

Omu malibuko gâni nalakira Nyakasane, nàyambaza Nyamuzinda Nnâhamwîrhu; àyumva izù lyâni omu bwâmi bwâge n’omulenge gwâni gwahika omu marhwiri gâge.

Ennanga 29:10

Nyakasane atamîre agandâza kurhaluka ecihonzi, Nyakasane ye wanayôrha ayîmire ensiku n’amango.

Ennanga 31:5

Lyo lyanarhuma wantenza omu kasirha bantezire, bulya wêne we lwâkiro lwâni.

Ennanga 42:2

Kulyâla akashafu kacîfinja ecikunguzo c’olwîshi, kwo omurhima gwâni gudwîrhe gwakwifinja, Nnâmahanga.

Ennanga 68:11

N’obusò bwâwe bwayâbukira muli eco cihugo wali obîkîre omukenyi, obûla oyinjiha Nnâmahanga.

Ennanga 68:8

Nnâmahanga, bulya agenda oshokolîre olubaga lwâwe, bulya olugerana omu mpinga,

Ennanga 74:12

Nyamuzinda ye Mwâmi nshiga kurhenga mîra, ye Mufungizi onfungira mw’er’igulu.

Ennanga 76:7

Wakankama obwo, Nyamuzinda wa Yakôbo, babomboro n’ebihêsi byàgama.

Ennanga 76:8

Bakurhînye, orhajîbwa omw’irwe, erhi budârhi bw’oburhè bwâwe burhuma.

Ennanga 77:18

Ebitù byàdubula amîshi, ecitù càkungula n’emyampi yâwe yàbalala.

Ennanga 84:2

Alà nk’enyumpa yâwe yayinjiha Yâgirwa Nyakasane k’Emirhwe.

Ennanga 9:8

Nyamuzinda yêhe ho ayôrha abà ensiku n’amango, ajeberîze entebe yâge y’obwâmi mpu atwe emmanja.

Ennanga 90:11

Ndi wakagera obuhashe bw’omutula gwâwe, nîsi erhi agere obwôba bukwânîne oburhè bwâwe?

Ennanga 90:2

Embere entondo zifûnuke n’embere igulu liburhwe, kurhenga ensiku n’amango erhi ho wêhe onabà ensiku n’amango Nnâmahanga.

Ennanga 93:2

Kurhenga ensiku n’amango erhi entebe yâwe ebà ngwîke. Kurhenge ensiku n’amango erhi ho ôbà.

Ennanga 97:4

Emilazô yâge yo yamoleka igulu, idaho lyabwîne lyanajuguma.

Izaya 37:17

Orhege okurhwiri, Yâgirwa Nyakasane, oyumve; ozibûle amasù. Yâgirwa Nyakasane, ocîbonere! Oyumve ebinwa bya Senakeribu orhumire abayish’ijâcira Nyamuzinda ozîne.

Izaya 37:4

“Kwankabà Nyakasane Nyamuzinda wâwe ayumva ebinwa by’omurhambo w’olurhambà orhumirwe na nnahamwâbo, omwâmi w’e Asîriya, mpu ayish’ijâcira Nyamuzinda ozîne! Kwankanabà amuhanira ebyo binwa Nyakasane Nyamuzinda wâwe anayumvîrhe! Mâshi osengererage aga mâhunga g’olubaga lwâge gacisigîre!”»

Izaya 40:15

Alà oku amashanja kwo gali nka ntônyi ya mîshi omu ndômo; kwo gali nka hitulo omu munzâni! Alà oku ebirwa kwo biri nka hishâno hityanguli

Izaya 40:28

Ka kuhaba okuhabire? K’orhasâg’ikuyumva? Nyakasane ye Nyamuzinda w’ensiku n’amango, ye walemaga igulu kuhika aha lihekera, ye ntaluha ye na ntagoyôla n’oburhimanya bwâge burhajira lugero.

Izaya 57:15

Nêci, kwo adesire ntyâla Ow’Enyanya emalunga, oyôrha abâho ensiku n’amango; izîno lyâge liri litagatîfu: «Nie mbà enyanya omu ndâro ntagatîfu; ci mbêra haguma n’omuntu ocîyunjuzize n’ow’omurhima mwirhôhye, lyo mpira obuzîne omu myûka y’abîrhôhye, lyo nnampira obuzîne omu mirhima y’abaciyunjuzize».

Izaya 65:16

Ngasi yêshi wânalonze omugisho omu cihugo, ânagishwe na Nyamuzinda w’okuli, na ngasi wânalonze okunywa akasheba omu cihugo, anacîgashe oku izîno lya Nyamuzinda w’okuli. Bulya amalibuko ga mîra gâyibagirwa, gafulikwe kuli n’amasù gâni.

Yeremiya 23:36

Cikwône murhaciderhe «omuzigo gwa Nyakasane», bulya kuli ngasi-muguma omuzigo kanali akanwa kâge yêne, Munadwîrhe mwagolongohya ebinwa bya Nyakasane ôzîne, Nyakasane w’Emirhwe. Nyamuzinda wîrhu.?

Yeremiya 4:2

Erhi wakanalahira Nyamuzinda Ozîne, buzira bîrà, omu bushinganyanya n’oburhabêsha, ago mango amashanja ganacîshinga muli we, ganacikwîtakira.

Yeremiya 4:24

Nalola entondo, nabona zidwîrhe zageramwo omusisi n’orhurhondo narho nabona rhwadundagana.

Yeremiya 50:46

Erhi ogwo mwanzi gunamanywa, mpu: «Babiloni agwâsirwe», igulu lyàdirhimana, ecihôgero cinene càmazûka omu mashanja goshi.

Yeremiya 51:29

Igulu lyamâdirhimana, lyamâgeramwo omusisi n’obwôba; bulya omuhigo gwa Nyakasane kuli Babiloni gwamâhika. Ecihugo ca Babiloni acîhindula irungu lya kujugumya, lirya lirhimbwamwo muntu.

Daniyeli 4:3

Nanaciyâliza irhegeko ly’okuhamagala abarhimanya boshi b’omu Babiloni nti bayishe bampugulire ecôla cilôrho.

Daniyeli 4:34

Bunôla niono, mwâmi Nabukondonozori, namâharâmya, namâkuza namâvuga n’omunkwa emwa Omwâmi w’empingu, oyu emikolo yâge yoshi eri y’okuli n’enjira zâge zishingânîne, Ye oli n’obuhashe bw’okuhurhaza abagenda bacijêgêga n’obucîbone.

Daniyeli 6:26

Okubundi mwâmi Dariusi ayandikira embaga, amashanja n’abà ngasi lulimi banabà bano igulu, erhi: «Omurhûla gumuyunjule mweshi!

Daniyeli 6:27

“Mpânyire eri irhegeko nti: Omu bwâmi mwoshi bakazirhînya n’okukenga Nyamuzinda wa Daniyeli, ebwa kubà yêne ye Nyamuzinda ozîne, yêne ye onayôrha abâho ensiku zoshi; obwâmi bwâge burhakayûrha n’oburhegesi bwâge buli bw’ensiku n’amango”».

Daniyeli 7:14

Banacimuhà amâmi, amahashe, irenge n’oburhegesi, amashanja goshi n’ebihugo byoshi, n’abantu b’endimi zoshi bakazimurhumikira. O­bwâmi bwâge bwabà bw’ensiku n’amango, bwâmi burhakayûrha, bwâmi burhakakûlwa ciru n’amango maguma.

Yoweli 2:11

Izù lya Nnâmahanga lyâyumvikane, ashokolire engabo zâge, bulya abamulwira bali banji, bulya ajira obuhashe bunji n’oku adesire kwo kunabà; luli lukulu olusiku lwa Nyamuzinda, lwa kuyôbohya, na ndi wankamuja emalanga?

Mikeyo 1:4

Entondo alabasirekwo zamâjonga, n’emmanda zamâboneka nka kula omuhomo gujonga n’omuliro, nka kula amîshi gahona oku mâla.

Nahumu 1:5

Entondo zinajugume emalanga gâge, orhurhondo rhugeremwo ogwa nyegenye; idaho likunduke, igulu n’abaliyûbakakwo.

Nahumu 1:6

Obukali bwâge wâni! Ndi wankabulindira? Ndi wankafukunya amango adârhabîre? Obudârhi bwâge kwo buyâka nka muliro, n’amabuye ganashanguke embere zâge.

Habakuki 3:10

Erhi entondo zikubona, zanajuguma, enkuba y’ecihonzi yayunjuza igulu, enyanja nênênè yakûngula n’empimbi z’omulaba zakaz’ilwîra emalunga.

Habakuki 3:6

Akayimanga, igulu linadirhimane, amâlola oku mashanja gamâgeramwo ogwa nyugunyu. Entondo z’ensiku n’amango zamârhembagana, orhurhondo rhwa mîra rhwahahanyusire, zo zàli njira akâg’igeramwo burhanzi.

Malakiya 3:2

Ndi wakalembera olusiku lw’okuyisha kwâge, erhi nîsi ayimange olusiku âcîyâlagaza? Ayishiba nka muliro gwa mutuzi, nka nsabuni eyeruhya emyambalo.

Mateyo 16:16

Simoni-Petro erhi ashuza, aderha, erhi: «We Kristu Mwene-Nyamuzinda Ozîne».

Mateyo 26:63

Yezu acîhulikira. Omukulu w’abadâhwa anacimubwîra, erhi: «Nkulahirîze kuli Nyamuzinda ozîne, orhubwîre erhi we Kristu Mugala wa Nnâmahanga»,

Yowane 17:3

Akalamo k’ensiku n’amango kuli kukumanya, w’oyo Nyamuzinda w’okuli wênene, n’oyu warhumaga, Yezu Kristu.

Ebijiro 14:15

«Mâshi, mwe balume, kurhi okwo mwajira? Kàli nîrhu rhuli bantu ak’inyu; rhumubwîzire nti muleke ebi bya busha, muhindamukire Nyamuzinda ozîne wajiraga amalunga n’igulu n’enyanja na ngasi byoshi bibâmwo.

Lushika 32:4

Yêne y’ibuye: obushanja bwâge buli bwimâna, bulyâla enjira zâge zoshi ziri bushinganyanya. Ye Nyamuzinda mutabesha na mudahemuka. Ye Mushinganyanya ye na Mushongêza.

Lushika 5:26

“Ka hali ojira omubiri okola oyumvîrhe akîrhu izù lya Nyamuzinda ozîne lyaderhera omu karhî k’omuliro akanabulilama?”»

1 Batesalonika 1:9

Ntâho barhadwîrhi baganîra oku mwarhuyankiriraga, n’oku mwalekaga abazimu binyu, mpu mushimbe Nnâmahanga munashige Nyamuzinda w’obuzîne n’ow’okunali,

1 Timoteyo 1:17

Kuli Mwâmi w’ensiku n’amango, Mwâmi orhankafà, orhanabonekana, Nyamuzinda muguma dolodolo, obukuze n’irenge emyâka n’emyâka! Nêci ntyo!

1 Timoteyo 6:17

Obwîre abahirhi ba mw’er’igulu barhakâg’icîbona, bamanye bakahira obulangâlire bwâbo omu mahirhi ga nsiku nsungunu, ci bacîkubagire Nyamuzinda, orhugabira ebintu byoshi mpu rhubikolêse.

Bahabraniya 10:31

Yajebe! Ciri cintu ca kuyôboha okugwa omu nfune za Nyamuzinda ozîne. Ecirhuma rhukwânîne rhusêre omu buyêmêre

Yozwe 3:10

«Lolagi eci mwamanyirakwo oku Nyamuzinda ozîne ali ekarhî kinyu n’oku akungusha loshi embere zinyu, Abanyakanani, Abahititi, Abahiviti, Abapereziti, Abagirgashiti, Abanyamoreni, n’Abayebuseni.

1 Yowane 5:20

Kandi rhuyishi oku Mugala wa Nyamuzinda ayishire, n’oku a­rhushobôzize obukengêre bw’okumanya Nn’okuli. N’oyo Nn’okuli rhuli muli ye, omu Mugala Yezu Kristu: Ye Nyamuzinda w’okuli, ye na Buzîne bw’ensiku n’amango.

Mafulûlo 20:11

Okubundi nanacibona entebe nnene nyêru-nyêru, n’owali oyitamîrekwo. Amalunga bo n’igulu, erhi bamurhimbakwo amasù, bayâka, na ntâye wacimanyire aha bagerîre.

Bacîranuzi 5:4

Yâgirwa Nyakasane erhi orhenga e Seiri, erhi oyegera endimiro za bene Edomu, igulu lyageramw’omusisi, amalunga gajonga, n’ebitù byavongobokamwo enkuba.

1 Samweli 17:26

Daudi anacidôsa abantu bâli hôfi naye erhi: «Kurhi bankajira omuntu wayîrha oyo mufilistini na ntyo akûle enshonyi omu Israheli! Bulya, oyo mufilistini aligi yeki muntu muci, oyo murhindi orhakembûlagwa wacîshomya okujâcira engabo ya Nyamuzinda Ozîne.»

1 Samweli 17:36

Mwambali wâwe ayîsire entale n’akakiri n’ecôla cirhîndi c’omufilistini cirhakembûlagwa nacinigûza nka okunigûza ngasi nguma muli ezôla nsimba, bulya anajacîre engabo ya Nyamuzinda Ozîne».