Izaya 54:9 - BIBLIYA NTAGATIFU OMU MASHI

⁹ Kwo nâberwa kulya byabâga omu nsiku za Nûhu, erhi ncîgasha nti amîshi ga Nûhu garhacifaga gamirîre igulu bundi: kwo nshubir’icîgasha nti ntakacikukûnirira bundi ntakanacikuhigira amabî.

Izaya 54:9 ပူးပေါင်းရင်းမြစ်များ

Murhondêro 8:21

Nyakasane abayiza hirya hibayo hinjà anacigerereza, erhi: «Ntakacihehêrera igulu bundi erhi muntu orhuma, bulya iralà lyâge libà liyêrekîre amabî kurhenga emuhimbo, ntakacishangula bundi ebizîne nk’oku nzind’ijira.

Ayubu 11:16

Obuhanya bwakulikwo, orhacibukengêre ciru, n’okabukengêra, erhi kunakola nka kula bakengêra amîshi gàhulwîre.

Ennanga 104:9

Olubibi wagatwîrîre, garhakalutwa mpu gashubizisa igulu.

Izaya 12:1

Mw’olwôla lusiku wanâderhe, erhi: Namâkukuza, Nyakasane! Wali onkunirîre, ci obukunizi bwâwe bwarhulwîre, wanantûlirîze.

Izaya 49:18

Lolà eburhambi bwâwe: boshi bashûbûzinye, bayishire emunda oli. Mb’ofà obuzîne bwâni, Nyakasane okudesire, akabà orhacîhundikiribo boshi nka mwambalo gwa bulimbi, n’akabà orhabazongizi ecibunu nka mukaba, kula omunyere waheruka ajira.

Izaya 51:22

Kwo adesire ntyâla, Nyakasane Nyamubâho, Nyamuzinda wâwe, ofungira olubaga lwâge: Alà oku nkola narhenza akabehe k’okudandabaganya omu nfune zâwe, akabehe k’obukunizi bwâni; orhakacikanywakwo bundi,

Izaya 51:6

Galamiri emalunga, mulole igulu bwandagala, bulya amalunga gâyishicîberamwo nka mugî, igulu lyâyôrha mirendwè nka mwambalo, n’abayûbaka muli lyo, nabo bagukumuka nka nzi. Ci obucire bwâni bwayôrha buli ho ensiku n’amango, n’obushinganyanya bwâni burhakayûrha.

Izaya 51:8

Bulya kwo babà nka mushangi gwalîrwe n’enshwa, na nka môya gamalîrwe n’ecibungu. Ci obushinganyanya bwâni bwayôrha bubâho ensiku n’amango, n’obucire bwâni kurhenga iburha kuhika oku lindi.

Izaya 55:11

ntyo kwo nalo luli oluderho lurhenga omu kanwa kâni: lurhankangalukira busha, ci lwanajira eci nalonzagya, lunayûkirize oku lwarhumagwa.

Izaya 62:8

Nyakasane àcîgashire okulyo kwâge n’okuboko kwâge kugala-byoshi, erhi: «Ntakaciziga nti emburho yâwe elîbwe n’abashombanyi bâwe; n’abantu b’ihanga barhakac’igorhomera amamvu waluhiraga.

Yeremiya 31:37

Ntya kwo Nyakasane adesire: Erhi bakahasha okugera obulî n’obugali bw’empingu kurhenga enyanya, n’ankabakambwîra obulenga igulu libà liyûbakîrwekwo, lyoki, nakabayêmêrera nâkabulira olubaga lw’Israheli oku maligo goshi lwajijire.

Ezekiyeli 16:42

Ntyo, nanamala oburhè bwâni kuli we n’olûji lwâni kuli we lwânahwa, nânarhûlirira n’oburhè bwânayûrha,

Ezekiyeli 39:20

Kuli agôla mêza gâni, mwâyigurhirakwo enyama z’enfarasi, ez’e­ ntwâli n’ez’abalenga b’okulwa ba ngasi lubero, kwo adesire Nyakasane Nyamubâho.

Ezekiyeli 39:29

“Ntanacikâbafulike obusù bwâni, ebwa kubà nâlumîza omûka gwâni omu mulala gwa Israheli, kwo adesire Nyakasane Nyamubâho.”»