Ezra 9:8 - BIBLIYA NTAGATIFU OMU MASHI

⁸ Ci konene buno, Nyakasane, Nyamuzinda wîrhu arhanzirirhubêra obwonjo erhi alanga muli rhwe emisigala, anarhuha aha rhwayâkira omu hantu hâge hatagatîfu lyo Nyamuzinda wîrhu arhuyigula amasù, anarhuhè akalamo muli omu bujà bwîrhu.

Ezra 9:8 ပူးပေါင်းရင်းမြစ်များ

2 Bâm 19:4

Akabà Nyamubâho wâwe anayumva ebîra binwa byoshi, omuntu orhumirwe na mwâmi w’e Asîriya mpu ayishijaciramwo Nyamuzinda ozîne, ci naye yêne ayêrekane oku agayire ebyo binwa oyo Nyamuzinda wâwe. Co carhuma osôkezagye omusengero gwâwe emunda ali kuli ogûla musigala gw’olubaga.»

Ezra 9:9

Nêci rhuli bajà, ci konene arharhulekêreraga muli obo bujà. Ajizire abâmi b’e Persi bakarhulola n’omurhima gw’obwonjo, mpu lyo rhubà n’akalamo, lyo rhunayishiyimanza enyumpa ya Nyamuzinda wîrhu, rhushub’ishakûlula, anarhuhè aha rhwakabêra ahazungulusirwe n’olugurhu omu Buyahudi n’omu Yeruzalemu.

Nehemiya 1:11

“Mâshi Nyakasane, okurhwiri kwâwe kuyumve omusengero gwa mwambali wâwe n’omusengero gw’abandi bambali bâwe barhînya izîno lyâwe. Mâshi Yâgirwa, ojire mwambali wâwe abone iragi ene, ababalirwe n’oyo muntu! Ago mango erhi nie cirhanza-mamvu omu bwâmi.”»

Nehemiya 9:31

Ci oku bwonjo bwâwe orhabalekêreraga, orhabaherêrekezagya, bulya we Nyamuzinda w’olukogo, munyabwonjo bunji.

Ayubu 33:30

Okwôla mpu ly’arhenza omûka gwâge omu lufù, mpu ly’omuntu amolekerwa n’obulangashane bw’abazîne.

Ennanga 13:3

Kuhika mangaci nayôrha ntimanya amalibuko omu murhima gwâni? Kuhika mangaci omushombanyi wâni ayôrha ampima?

Ennanga 13:4

Lolà, onshuze, Nyakasane Nyamuzinda, Nnâhamwîrhu! Ommolekere amasù, ndek’ijir’îrò omu lufù.

Ennanga 138:7

Nkabâ omu maganya, onanzibuhye, onalambûle okuboko kwâwe wagombyamwo abanshomba, onancize.

Ennanga 34:5

Najîre aho nalongereza Nyakasane naye anyumvîrhiza, anankûla ebihamba byoshi emurhima.

Ennanga 85:6

K’okola wayôrha orhulubîre ensiku zoshi, nîsi erhi olubîre amâburhwa g’abantu goshi?

Migani 29:13

Omuganda n’omugale babugânîne muli oku: bombi Nyakasane obamolekera mûshi.

Muhanûzi 12:11

Ebinwa by’abarhimanya kwo biri nka kababo, kwo biyôrha nka birhi bigwîke, kulonza obwôloloke bw’obusò bwâge kurhuma lungere abikolêsa.

Izaya 1:9

“Acibiga Nyakasane Nyamuzinda w’Emirhwe arhali arhulekîre amâhûngà g’emisigala, rhwankabîre aka Sodomo rhunashushe Gomora”».

Izaya 14:3

Olusiku Nyakasane akugalulira omuluhûko enyuma ly’amalumwa n’amalibuko n’obujà budârhi wàlimwo,

Izaya 56:5

“nazihêra omu nyumpa yâni n’omu byôgo byâni irenge n’izîno bilushire abânarhabana n’abâna-nyere; naziha izîno ly’ensiku n’amango lirhakazâzika”.

Izaya 57:15

Nêci, kwo adesire ntyâla Ow’Enyanya emalunga, oyôrha abâho ensiku n’amango; izîno lyâge liri litagatîfu: «Nie mbà enyanya omu ndâro ntagatîfu; ci mbêra haguma n’omuntu ocîyunjuzize n’ow’omurhima mwirhôhye, lyo mpira obuzîne omu myûka y’abîrhôhye, lyo nnampira obuzîne omu mirhima y’abaciyunjuzize».

Izaya 6:13

N’erhi hankasigala cihimbi ciguma ca kali ikumi, nabo bânahungumuka! Ci nka kula omutudu n’omuhumbahumba bikatûbwa, ecigundu cinasigale, ntyo kwo ecigundu câyîsh’ibà mburho ntagatîfu.»

Yeremiya 42:2

bayishibwîra omulêbi Yeremiyahu, erhi: «oyumvîrhize omusengero gwîrhu. Osengerêre ogûla musigala gw’olubaga emwa Nyakasane Nyamuzinda wâwe, bulyâla rhusigîre banyi bwenêne n’obwo rhwàli banji, nâwe wêne obwîne n’amasù gâwe.

Yeremiya 44:14

Muli ogu musigala gwa Yûda gwayishigibêra omu cihugo ca Mîsiri, barhâfulumuke­ mwo ciru n’omuguma, mpu ashubire omu cihugo ca Yûda, n’obwo badwîrhe bacîfinja okuyishubira n’okuyibêra».

Ezekiyeli 14:22

“na lêro hayish’ibonekana abâsigala bafume olufù, banafumye abânarhabana na abâna­nyere bâbo, kandi obone bakuyishire mpu wêne obone olugendo lwâbo n’ebijiro byâbo, na mpu ly’orhulûla n’ago mahanya nârhumira Yeruzalemu, n’oku ngasi bindi bibî binji nankamurhumira”.

Hozeya 6:2

Hano kugera nsiku ibirhi ârhugalulira obuzîne, oku lwa kasharhu ârhuyinamule rhunamubêreho.

Habakuki 3:2

Yâgirwa, Nyakasane, nayumvîrhe bashambâla emikolo yâwe y’okurhangâza nieshi nayunjula bwôba. Mwa gano mango g’akalamo kîrhu oshub’izûsa emikolo ya bene eyo, oyimanyîse oku bantu. Ciru akabà mpu ogwêrhe ecirhumire wakunira, oshub’irhuyêrekeza olukogo lwâwe.

Sofoniya 3:12

Bantu bîrhôhye bônene n’abakenyi naleka muli we, abakampûna mpu mbalange.

Zakariya 10:4

Muli ye mwârhenga abarhambo ba ngasi lubero, bazibuzibu nk’ibuye kaboko ka nyumpa, bantâdundwe nka nkwîra y’ihêma, badârhi nka muherho gwa bîrha. Bâkaz’igenda nka barhabâzi ntwâli bajè balabarhanya ababalwîsa nka bijondo by’omu njira.

Zakariya 8:12

Nabadubulirakwo omurhûla: emirhi yayâna emizâbîbu, obudaka bwayêra emhurho, enkuba yârhoga nyinji bwenêne emalunga. Ago minjà goshi nâgashobôza omusigala gw’olubaga lwâni.

Zakariya 8:6

Ntya kwo Nyakasane w’Emirhwe adesire: «Akabà okwo ciri cisômerîne omu masù g’emisigala y’olubaga lw’Israheli, ka nâni ciri co emwâni? Cikwône niehe nanahash’ijira ntyo, niono Nyakasane w’Emirhwe.

Barom 9:27

Naye Izaya aderhîre Israheli, erhi: ciru bene-Israheli bankaluga nka mushenyi gw’omu nyanja, obusigale bwône bwânacizibwe;

Mafulûlo 3:12

Owânahime, nâmujira ashube mutungo omu luhêro lwa Nyamuzinda wâni, arhakanacihoza okugulu embuga bundi. Nâmuyandikakwo izîno lya Nyamuzinda wâni n’izîno ly’Olugo lwa Nyamuzinda wâni - Yeruzalemu muhyâhya wamanukaga emalunga emwa Nyamuzinda wâni - n’izîno lyâni lihyâhya».

1 Samweli 14:27

Ci kwônene Yônatani arhamanyaga amango îshe Saulu agashaga olubaga. Ayêrekeza irhwêrhwè ly’akarhi, ali afumbasire, alifunda omu cigukulu c’obûci ahêka okuboko kwâge ebwa kanwa, amasù gâge gashubizibûka.

1 Samweli 14:29

Yônatani anacishuza erhi: «Larha amasherêza ecihugo. Ka murhabwîni oku amasù gâni gakola magumaguma bulya namalya hitya kuli obu buci!