Ezekiyeli 9:8 - BIBLIYA NTAGATIFU OMU MASHI

⁸ Agôla mango bajaga banigûza, nanacibêra halya nali, nanacikumba bubî oku idaho. Nanaciyâma nti: «Mashi Nyakasane Nyamubâho, ka onakolaga wamalîra ogu musigala gw’Israheli omu kuyâkiza oburhè bwâwe kuli Yeruzalemu?»

Ezekiyeli 9:8 ပူးပေါင်းရင်းမြစ်များ

Murhondêro 18:23

Abrahamu ayegêra, aderha, erhi: «Kàli onakolaga waherêrekeza omushinganyanya haguma n’enkola-maligo?

1 Nganîro 21:16

Daudi agalamula amasù, abona Malahika amanyanyire ekarhî k’amalunga n’igulu, anayômwire engôrho yâge akola ayiyêrekezize e Yeruzalemu. Daudi bo n’abagula bâge bâli bayambîrhe emyambalo y’emishîbo, bayunama bahwera oku idaho.

Ezra 9:5

Erhi amango g’enterekêro y’ebijingo ganabà, nayîsha najonjoboka na gulya mutula gwâni n’erya mishangi n’ecishûli câni bisharhangusire; nanacifukama, nanaciyinamulira amaboko emunda Nyamuzinda wâni ali,

Yeremiya 14:13

Nashuza obwo: «Nti Yâgirwa Nyakasane, kali abalêbi badwîrhe bababwîra: erhi murhabone engôrho, murhashalike, kulya kubà niene namushobôza omurhûla gw’enkwîra mw’eci cihugo.»

Yeremiya 14:19

Ka Yûda kukaga wamukazire loshi? Nîsi erhi Siyoni kurhenga akurhenzire emurhima! Cici carhumire warhubambula omubambu gurharhundûke? Rhwakazâgilinga omurhûla, ci ntà kwinjà amango g’okufuma, ci lolaga ebihamba.

Yeremiya 4:10

Naderhe obwo: erhi waliha Nyakasane kwabirage kurheba warhurhebire erhi oderha erhi «mwâbona omurhûla» enakolaga ngôrho eno erhuli emumiro.

Ezekiyeli 11:13

Ci nk’oku nanalêbaga, Pelatiyahu, mugala wa Benayahu anacifà. Naku­mbà bubî oku idaho, nanaciyâma n’izù linene, nti: «Mashi Nyakasane ­Nyamubâho, k’onakolaga wamalîra ogu musigala?»

Ezekiyeli 4:14

Okubundi nanaciderha nti: Mashi! Nyakasane Nyamubâho, iroho lyâni linyinyi­ lirhahemusiri. Kurhenga e burho bwâni kuhika bunôla, ntà mango ciru n’ama­guma nkola ndîre enyama yaniolagwa igosi, nîsi erhi eyi bàsharhulaga, ntà mango enyama ngalugalu ekola enjîre e kanwa.

Ezekiyeli 7:8

Na bunôla nkolaga nakujahika kwo obukunizi bwâni, n’oburhè bwâni mbuyukize kuli we: nkola nakutwîra olubanja nk’oku olugendo lwâwe lunali, nankudôse kuli galya mabî goshi okazijira.

Mibalè 14:5

Mûsa n’Aroni banacikumba bûbi embere za bene Israheli boshi.

Mibalè 16:4

Erhi Mûsa ayumva okwôla, akumba bûbi.

Lushika 9:18

Oku bundi nacîha oku idaho, embere za Nyamubâho, nk’oku nanajiraga burhanzi, nashinga miregerege makumi anni na madufu makumi anni ntakoza omugati erhi mîshi ekanwa, najira ntyo erhi amaligo mwakolaga garhuma, aga mwagayisagyamwo Nyamubâho n’okumujira burhè.

Yozwe 7:6

Yozwè anacisharhangula emyambalo yâge, afukamiriza, akamalanga kahuma oku idaho embere ly’omucîmba gw’amalaganyo, kuhika bijingo, ajira ntyo ye n’abagula ba bene Israheli, banacicihira oluvù oku irhwe lyâbo.