Daniyeli 3:10 - BIBLIYA NTAGATIFU OMU MASHI

¹⁰ W’oyu Yâgirwa Mwâmi wahanyire eli irhegeko mpu ngasi muntu wânayumve izù ly’omushekera, ely’akarhêra, ely’olulanga, ely’enzenze, e­ly’elikembe, ely’ecinanda n’elya ngasi bindi bizihwa, agwâsirwe akumbe bûbi, aharâmye eyôla nsanamu y’amasholo.

Daniyeli 3:10 ပူးပေါင်းရင်းမြစ်များ

1 Nganîro 15:16

Daudi anacirhegeka abarhambo b’abaleviti obwo, mpu bakereke bene wâbo bâli bakwânîne bajè bayimba n’okuziha ennanga, enzenze, emishekera, abarhimbi b’engoma n’ezindi nzihwa za ngasi lubero bànagwêrhe, n’okuyêrekana omwîshingo gwâbo munene omu mulya gw’enzihwa zilongîre bwinjinjà.

1 Nganîro 15:28

Bene-Israheli boshi balêrha omucîmba gw’Amalaganyo e Yeruzalemu omu cihôgêro c’amasîma, banabûha empembe n’emishekera, n’enzihwa n’emijegereza, ennanga n’enzenze.

2 Nganîro 29:25

Ahira abadâhwa omu ka-Nyamubâho, abahà n’emijegereza, enzenze n’ennanga, nk’oku Daudi anarhegekaga omu kushimba ebinwa bya Gadi, mulêbi wa mwâmi n’eby’omulêbi Natani; bulyâla eryo irhegeko lyarhengaga emwa Nyamubâho, omu kanwa k’abalêbi.

Ennanga 94:20

Yâgirwa lushangi luci mweshi n’engombe y’endyâlya? Engombe ezûsa entambala mpu ly’irhegeko erhi irhegeko!

Lubungo 1:16

«Nka mwabusa abakazi b’Abayahudi, mukâlola bwinjà, aciri oku ncingo, mwâna muci obusirwe. Akabà mwâna-rhabana, munamuyîrhe; akabà mwâna-nyere, munamuleke alame.»

Lubungo 1:22

Faraoni mwâmi w’e Mîsiri kwo kurhegeka abantu bâge boshi, erhi: «Ngasi mwâna-rhabana waburhwe, munamulohe erwîshi, ci ngasi mwâna-nyere munaleke alame».

Muhanûzi 3:16

Kwône ncidwîrhe nasinza hanôla igulu: aha batwîra olubanja, bushungu buhali oku ntebe y’omushinganyanya, cishungu cikuli.

Izaya 10:1

Buhanya bwâbo abajira amarhegeko g’obubî, na nka bayandika, bayandike ebinwa by’okurhindibuza abâbo.

Daniyeli 3:11

Kandi wanaderha oku ngasi yêshi orhakumbiri bûbi akabula buharâmya, oyôla anakwêbwe omu ndugurhira y’o­muliro.

Daniyeli 3:15

“Lêro akabà mucirheganyizagye, hano munayumva izù ly’omushekera; ely’akarhêra, ely’olulanga, ely’enzenze ely’elikembe, ely’ecinanda n’elya ngasi bindi bizi­hwa, okukumba bûbi n’okuharâmya erya nsanamu nayîmanzagya. Ci mukabula kuyiharâmya, bwo na buno mwakwêbwa omu ndugurhira y’omuliro, na nyamuzinda ohi wankacibashugunula omu maboko gâni?”»

Daniyeli 6:12

Oku bundi abôla bantu bashubijira ihano bajà bayunjayunja; banacibugana Daniyeli adwîrhe ashenga Nyamuzinda wâge.

Amosi 6:5

Mudwîrhe mwayimbira olulanga, mudwîrhe mwajirisa enzihwa aka Daudi.

Yowane 11:57

Abajinji b’abadâhwa n’Abafarizeyi bâli erhi bàrhegesire mpu owamanye ah’ali anababwîre, bagend’imugwârha.