Ben Levi 10:12 - BIBLIYA NTAGATIFU OMU MASHI

¹² Mûsa anacibwîra Aroni, Eliezari na Itamari, bo bâna Aroni alicisigaline, erhi: Muyanke ngasi bisigîre oku nterekêro yajiragwa n’omuliro embere za Nyakasane, mubirye birhanalimwo lwango. Mubilîre embere z’oluhêrero bulya buli bwangà butagatîfu.

Ben Levi 10:12 ပူးပေါင်းရင်းမြစ်များ

2 Nganîro 31:14

Omuleviti Korè, mugala wa Yimuna, ye wakazâgilanga omuhango gw’e buzûka-zûba, ye wakazâgiyankirira entûlo z’obulonza bwinjà bakazâgilerhera Nyamubâho mpu baberûle ebi barhûzire Nyamubâho n’ebintu bitagatîfu bwenêne.

Ezra 7:5

mugala w’Abishuwa, mugala wa Pinasi, mugala wa Eleazari, mugala w’omudâhwa mukulu Aroni.

Lubungo 29:2

n’omugati gurhalimwo lwango, emigati y’olununîrizi erhalimwo lwango yavungiragwa omu mavurha, n’orhugati rhw’olununîrizi rhurhalimwo lwango, rhushîge amavurha, obijire n’enshâno y’omulà gw’engano.

Lubungo 29:33

Bo bakazilya ebyakolesibagwa oku nterekêro y’okubacêsa olusiku lw’okuyîmikwa n’okurherekêrwa kwâbo. Ntà w’embuga wankabiryako, bulya biri bitagatîfu.

Lubungo 6:23

Aroni ayanka omukazi, ye Luzabeti, mwâli wa Aminadabu, mwâli wâbo Nashoni; amuburhakwo Nadabu, Abihu, Eleyazari na Itamara.

Ezekiyeli 44:29

Bakazilya oku nterekêro y’enkalangè, oku nterekêro y’oku câha, oku nterekêro y’obubî na ngasi kadesirwe ka kuzira kali kâbo.

Ben Levi 10:13

Mwakaz’ibilîra ahantu hatagatîfu; co cikono câwe eco mwene bagala bâwe, oku ishêga lya Nyakasane. Ntyo kwo narhegesirwe.

Ben Levi 21:22

Nêci acigwêrhe obuhashe bw’okulya oku biryo bya Nyamuzinda wâge, ciru n’oku bwangà bwimâna, n’oku bwangà bwimâna bwenêne.

Ben Levi 24:9

Eyo migati yanabà ya Aroni n’abagala. Banakaz’iyilira ahantu himâna, bulya kuli bo buli bwangà bwimâna, bw’oku nterekêro nsingônola yajiriragwa Nyakasane. Eryôla liri irhegeko ly’ensiku n’amango.

Ben Levi 7:9

Ngasi nterekêro yakalangiragwa omu cibekenge c’omuliro, kandi erhi omu nyungu, nîsi erhi aha lukalango enali y’olya mudâhwa warherekêraga.

Mibalè 3:2

Alaga amazîno ga bene Aroni: Nadabu lwo lubere lwâge, Abihu, Eleazari na Itamara.