N’okwôla mpu kujirwe lusiku luguma omu bihugo bya mwâmi Asuerusi byoshi, omu nsiku ikumi n’isharhu z’omwêzi gwa kal’ikumi na kabirhi, gwo mwêzi gwa Adari. 12 (a) Olwandiko lw’amaruba gw’okubabalira Abayahudi: 12 (b) Ga mwâmi Asuerusi, omwâmi mukulu. Ayandikiraga abarhambo b’omu bihugo byâge oku binali igana na makumi abirhi na nda, kurhenga e Buhindi kujà e Etiyopiya; n’oku ngasi banalanga ebirugu bîrhu, mweshi rhumuhîre omusingo! 12 (c) Bantu banji, erhi babà bamakuzibwa n’obwinjà burhalusire bw’abalonza okubajirira aminjà, bôhe kunabè kucibona bakola bacibona. Arhali oku bashizi bîrhu bônene bacîhindula, ci erhi bajejerhwa n’obugale bwâbo, anabè ababajirira aminjà bo bakola balonziyîrha. 12 (d) Arhali kurhamanya aminjà g’abantu gônene balekêrera, ci omu bucîbone bwâbo bali bantu barhuzirwe n’ebya hanôla igulu, banamanye mpu nkaba bafuma olubanja lwa Nyamuzinda orhabonakwo banyankola-maligo anayîshi ngasi kantu. 12 (e) Kanji kanji w’anabona abantu nka bamahabwa obuhashe, omu kushumikwa n’abîra bâbo balya bahîrwe cikono cilebe, banalonze okubulaga omukò g’omwêru-kwêru, lêro bacîlerhere amabî garhankabukwa. 12 (f) Obulyâlya bw’ababî, bunalonze okurheba balya bantu binjà babarhegeka. 12 (g) Loli bwinjà: Arhali omu myanzi yagezire mîra mwonene mwankaboneka ebiri nkebyo mmukengêzize ci n’erhi mwankalola byajirwa hôfi na ninyu, mwanabona ebijiro bibî by’abàli oku buhashe bwa bene abôla. 12 (h) Nêci, nacîhangâna okwôla kurhacibaga omu nsiku zayîsha, lyo ngasi muntu alama n’omurhûla, buzira kadugundu omu bwâmi bwîrhu, 12 (i) Nakûla abarhakwânîni, n’okurhimanya ebyahira n’ebyahiruka okushingânîne. 12 (k) Mweshi murhahabiri kurhi, Hamani mugala wa Hamdata, muntu w’e Macedoniya, okunali arhali w’omu bûko bw’Abapersi, muntu rhurhankagererize ciru embere, lêro rhwanacimuyankirira bwinjà nka cigolo. 12 (l) Abona oku nêci rhwamuyankirire bwinjà nk’okurhunajirira agandi mashanja kuhika ciru rhwamulola nka y’ekola larha ciru n’abantu boshi bakafukamiriza embere zâge nka kulya anali wa kabirhi omu cikono c’obwâmi 12 (m) Ci kwônene ayêrekana oku arhankahasha okuyôrhana iragi lya bene eryo, arhondêra okujà kwafufula eyi n’eyi oku buhashe bwâni, n’okulonza okuheza akalamo kâni. 12 (n) Rhujira côkola, muntu oyôrha arhujirira aminjà, ye Mardokeyo; rhujira na Esteri, ye wîrhu w’ebwâmi orhabakwo izâbyo, naye Hamani omu binwa byâge by’obunywesi n’eby’obwîsi abahunira olufù, kuguma n’olubaga lwâbo loshi; 12 (o) Omu kujira ntyôla, alilangâlire okurhanywa n’abandi na buzinda ecihugo c’Abapersi acihe ab’e Macedoniya. 12 (p) Ci kwônene abôla Buyahudi bali batwîrîrwe okufà n’oyôla mwîsi, rhwêhe rhunabone oku barhabà bîsi n’oku barhegekwa n’amarhegeko gashingânîne; 12 (q) rhunabone oku bali bâna b’Owe-nyanya, Nyamuzinda ozîne mukulu bwenêne, ye warhuhâga, kuguma na bashakulûza, narheecka obwâmi bwîrhu n’obushinganyanya bunene. 12 (r) Co cirhumire murhaciyumvagya galya maruba garhumagwa na Hamani mugala wa Hamdata, kulya kubà owagayandikaga amanisirwe oku murhi boshi n’enyumpa yâge yoshi, aha muhango gwa Suza, bw’obuhane bushingânîne Nyamuzinda, Murhegesi w’ebintu byoshi amujirîre. 12 (s) Hano mubà mwamamanika agâla maruba, ngasi hoshi muleke Abayahudi bashimbe n’obwâlagale amarhegeko gâbo. Munabarhabâle okuciyônôlakwo balya bahizire okubayîrha mw’olwo lusiku lwalilulalirwe, kwo kuderha: omu nsiku ikumi n’isharhu z’omwêzi gwa kal’ikumi na kabirhi, gwo mwêzi guderhwa Adari. 12 (t) Bulya Nyamuzinda Lulema w’ebintu byoshi, oku lubaga lwâge, ahindwire olusiku lwàli lwâbà lwa buhanya mpu lubè lwa kushagaluka oku lubaga lwîshogwa. 12 (u) Ninyu mwe Buyahudi kuziga mukuze olwôla lusiku lw’irenge n’enshagali nk’oku munajira oku zindi nsiku zinyu nkulu na ntyôla olwôla lusiku lwâbà, bunôla n’agandi mango gayîsha, cêrekane c’akalamo kuli mwene n’oku bandi boshi b’obulonza bwinjà omu Persi, na kwa balya balonza okurhulenganya gabè mango ga kukengêra okuhwa kwâbo. 12 (x) Olugo ciru n’ecishagala cirhashimbiri ebyôla binwa cinanyagwe, itumu licizungulemwo, cinadulikwe muliro, cirhaciyûbakagwamwo, arhali n’abantu bônene ciru n’ensimba n’enyunyi z’emalunga.