Yosua 7:9 - Ma Jou ai Demo-demo o Totobelohoka

⁹ Ho naa abe idadioka de ahao o nyawa abe yogogere o Kanani ma tonaka ma amokika ka de yoihene de onangoo manga domoroini naga ka hiadono imiparangi ngomino. De o nyawa utu manga gogere ma gurutika ma onangoo ahao yoihene ma ade-ade abe hokokia o nyawa ko yowoeua de imihikala ka hiadono miloara. Ka de gea yoihene de manga domoroini utuohi idogo ngomino de ona ahao yomakokitoomuino de ahao yomahikagaro hiadono yoboa de imihigilolitino. De ona yowoe-woe ho marai imihiofi o dunia ma lokuino ngomi abe mimahiromanga Ma Jou o Yawe ani nyawa. De nako hokogea idadi, de ahao hokokia Ngona nodiai la to Ngona ani romanga o nyawa agorakiye?” Hokogea o Yosua ai hininga ma huha womahingahu Ma Jou o Yaweika.

Yosua 7:9 ပူးပေါင်းရင်းမြစ်များ

Huhupu 32:12

Ho naa nako ani nyawa nahibinaaha de ahao o Mesiiri ma nyawa yosanangi hiadono done ahao manga demo o hohedu Ngonaika. Ona ahao yotemo, ato, ‘Abeika, manga jou ai hininga duru wabudi hiadono ona waofi o dunia ma lokuino. Abe ona wahihupu nenangino la wao o tonaka utuika de wakokitoma o loku-lokuoka genangoka.’ Ahi Jou, done hokogea manga hohedu ma demo Ngonaika ho koaho ibootoka ani ngamo onangika. Ngohi togahoko ahi Jou ani hininga naturuuru onangika la ufa nahibinaaha.

Gegetongo 14:13

Masara ka de ai demo gea woihene de o Musa unangoli wohuha hiadono o Isiraele ma nyawa waademo Ma Jou o Yaweika wato, “Done sarakia o Mesiiri ma nyawa manga ade-ade o nyawa utuika ma oraha yoihene gea Ngona nahikokibinaaha ani nyawa! Ona ma dihira duru o Mesiiri ma nyawa manga hidogoronaka ma oraha genangoka Ngona nahikokihupu. Ho Ngona duru de o heheranga ma ngoe ani buturungu nahimatoko o Mesiiri ma nyawaika.

Yohanese 12:28

De ahao o Yesusu wotemo ai Babaika wato, “Baba, iti to Ngona dika ani medebini ma dararono nomahimatoko o nyawaika.” De ahao naga o ilingi o Horogauku itemo ato, “Ahi medebini ma dararono o nyawaika tomahimatokoka, de ahao tomahimatokoli ahi medebini ma dararono gea.”

Yosua 7:10

De Ma Jou o Yawe wotemo o Yosuaika wato, “Yosua, nomomikiye! Ngona nododoa nomamotumuku ahi himangoka hokonaa?

Yosua 7:8

Ahi Baluhu, Ma Jou o Yawe, o kia naga abe ngohi ka idadi tomidemo? Angamoi ngomi o Isiraele ma nyawa miloaroka o Ai ma nyawa manga himangoka.

1 Samuele 12:22

Ma Jou o Yawe winihibehehongoka ngini o Isiraele ma nyawa winihidadioka to Una ai nyawa de ai gogao nginika gea duru ko idadiua itoaka. Ho ngaro ma oraha nenanga eko ngaro ma oraha nanga himangika abe ko iboauahi masara duru ko iwa ma oraha abe Una wininoaika. De angamoi nako hoka Una wininoaika gea wohirusaka o nyawa manga horomati to Una ai romangika abe ka to Una ai romangohi ihikurutiye. De ufa niawohanga Una womangiriki o Isiraele ma nyawa la yodadi to Una ai nyawa abe duru womadingakoka.”