Yosua 7:1 - Ma Jou ai Demo-demo o Totobelohoka

¹ Masara o Isiraele ma nyawa gea Ma Jou o Yawe ai behehongo onangika yao ko itiaiua abe o Yeriko ma nyawa manga kiahonanga mata-mata ona kiani iwidingakoka Unangika. Ma Jou wato ena gea kiani yahihuba Unangika de o bobinaaha, masara naga womatengo ai romanga o Akana, una ko wohingounua Ma Jou ai behehongika. Abe ngaro ma kiahonanga gea kiani ona iwidingaka Ma Jouika masara naga utu o Akana gea womagorakoka. O Akana gea o Isiraele ma nyawa abe womahidutu o Yehuda ma dutuika de ai baba o Karami. De o Karami ai babali o Sabadi, de o Sabadi to una ai babali o Sera ho o Akana wokuwewete o Seraika. De ona gea mata-mata o Yehuda ai toforauku yadaene abe una o Isiraele ma nyawa manga dutu moi abe ona o dutu yangimoi de yahinootoino. De naa o Akana womagoraka o Yeriko ma kiahonangino abe kiani idadi manga huhuba Ma Jouika ho Ma Jou ai ngamo duru itagi ihauku o Isiraele ma nyawaika ma titi gea o Akana wodiaioka. Masara o Isiraele ma nyawa utu ko ihiorikuahi ma titi to Akana ai howono gea. De gea o Yeriko ma nyawa yahikalaka ho ona ato naa ka idadi yogila-gila o Kanani ma nyawa yahikala mata-mataika.

Yosua 7:1 ပူးပေါင်းရင်းမြစ်များ

Dodadi 34:27

Ho yolio o Simeono de o Lewi de ahao ka yoliokali ma kotaino ka ma moi de manga roria-dodoto yomakiniiki mangale o Yakubu ai ngofa-ngofaka ato, “O kota naa imihidadidorou nanga biranga ho homihibalaha.” De kanganoinohi manga nau-nauru yakokitomakau ho naa yakokile manga feka-fekata de manga ngofa-ngofaka de yakokigoraka manga kiahonanga mata-mata abe naga manga tau ma goronaka. De ngaro manga kiahonangoo abe naga o kota ma hoanoka hoka manga duduono de manga keledai enangoo yakokile. Ho gea manga kaya yamataka yomagora.

2 Kokoano 5:24

De ona yaruange yosobo yomakiniiki yotagi-tagi ka hiadono yomahitigika o Elisa ai ngiika, abe o Elisa wogogere o lokuoka. Ho ma lokuoka gea de ahao o Gehasi wale ma hidoaka mata-mata ona yahinootoino de wahuloko la ona iwigilio dika o Naamanika. De ona yosoboka de ahao una wowohama ma tau ma goronaika de womataiti wagogono ma hidoaka gea.

Tobadotoko 9:18

Nako o nyawa abe yososawaro de o nyawa abe manga parangi ma dae ingodumu, masara ka onangohi duru de manga buturungoka abe manga sosawaro ma hininga naga de ma enanga. Masara irahai homahitiari angamoi ngone o nyawa nanga datoro moi dika abe ibodo ka idadi ihiwedere nanga datoro ma rorahai ma ngoeika.

Yunusu 1:7

Ho o Yunusu womomiki de wodoa daku o kapa ma lokuiye de genangoka una de o kapa ma nyawa yomakoketemo, ato, “Abeika, ngone homatoomuino homaketebataru la homakamaihi la gea hohioriki to onagona manga howono hiadono o bodito naa hamake.” Ho ka de yomakamaihi de iwidumutu o Yunusika.