Yohanese 17:8 - Ma Jou ai Demo-demo o Totobelohoka

⁸ Ho abe ani demo nohihidoaka Ngohino gea tahidoakoli onangika. De gea yodafongo dika hiadono ona duru ihioriki Ngona dika nohihidingoto, abe Ngohioo Ngonaka de taino.”

Yohanese 17:8 ပူးပေါင်းရင်းမြစ်များ

Sosawaro 1:23

Ngaro ufa dika ngini ka ihikaika hokogea. Abe nako ma oraha ngohi tinitaere nginika abe tapake o hiowa ma demo de nako duru nimadoihene gea de ahao to ngohi ahi hininga ma owa ma dola ngohi tinihidoaka nginika la nihioriki o sosawaro ma demo ma titi.” Hokogea hapake ma hiketero de o ngofeka la o sosawaro hoka de ma ilingoka.

Sosawaro 1:3

Ho nako homadoihene de hapake o Saloomo ai hiowa ma demo nenanga de ahao inahiakunu la hohidodiai homahiaturu itiai nanga wowangoka. De gea hiadono nanga wowangoka ngone homaputuhu itaana, de haniiki ma totiaiika. De gea ngone homakao irahai de o nyawa utu ho ko habudiua onangika.

Sosawaro 2:1

Naa, ahi ngofaka, duru togahoko la nohitoihene ngohino la de ani hininga duru de ma gimonoka nodafongo de nomahitongona ahi behehongo ma demo ngonaika.

Sosawaro 4:10

Ho ngini homoi-homoiika tinihingahu tato, “Ahi ngofaka duru nohidodiai nomafikiri abe ma titi o dodotoko ma demoino naa abe nako gea ngona naniiki de ahao to ngona ani wowango ikurutu o duniaka nogogere.

Sosawaro 8:10

“Ngohi o ngo Sosawaro toigo tinidotoko de hokonaa tinihitararono, ngini nia wowangoka naga nia ngiriki ma ngoe de marai nioigo nimalingiri o kiahonanga ma hali-hali hoka o gurasi de o haaka abe duru de ma ijaka. Masara ngohi tinihingahu abe nako o haaka de ahi dodotoko ka ahi dodotokohi abe duru ikurutiye de inihiutumu nia wowangoka. De nako o gurasi de o tobahioriki, ka o tobahiorikohi abe duru de ma utumoka nako gea ena nimangiriki.

Matiusu 13:11

De o Yesusu wapaluhu onangika wato, “Ma dihiraino o nyawa ko ihiorikuahi Ma Jou ai dogogono abe ma titi hokokia Una wahikoano ai nyawaika. Masara ma oraha naa Una ai dogogono gea winihimatokoka nginika abe nihinii-niiki la wato ngini ka idadi nihioriki. Masara naga o nyawa utuoli gea abe tanu ko iwa manga hininga Ma Jouika ho Una ko wahidoakua onangika la wato ufa ihioriki.

Yohanese 12:49

Angamoi ahi demo gea ko ma titiua tomahohiningaiye dika de totemo. Hokogenangua, masara gea to ahi Baba ai demo. Angamoi gea o Baba wohihidingoto, ho to Ngohi ahi demo imakadaene hoka o Baba ai behehongo Ngohino, ho gea dika ahi demo.

Yohanese 14:10

Ho abe ma titi Ngohi de ahi Baba, Una wogogere Ngohioka de Ngohi naga ahi Babaka. Marai gea ngona ko nangakuahi e? Ma gea ahi demo ma titi ufa niafikiri to Ngohi dika ahi hiningaka de aino de tinihingahu. Masara mangale o Baba naga Ngohioka ho gea to Una ai karajaanga mata-mata todiai Ngohi.

Yohanese 15:15

“Ho abe tomahiketero hoka Ngohi o angguru ma roehe de ngini ma jaga-jaga, gea ma titi hiadono ko tinihiromangokaua ahi huhuloko masara tinihiromangoli ahi dodiawo. Angamoi nako o huhuloko manga dutu, una ko wahingahua ai huhulokika ai hininga ma dola mata-mata. Masara Ngohi hokogenangua ahi hininga hiadono mata-mata abe o Baba wohihingahuoka Ngohino, gea Ngohioo tinihingahuoka nginika.

Yohanese 16:27

Koua, naa nihingaku abe Ngohi Ma Jouoka de taino. Ho to Baba ai mau la naa ngini ma hirete nimagahoko angamoi Una duru winidora mangale ngini nihidora Ngohi.

Yohanese 16:30

Ho naa duru itararono ngomino abe Ngona igoungu mata-mata duru nohioriki abe o nyawa ko inilehauahi de manga leleha gea Ngona nohiorikokau. Ho gea mingaku abe igoungu Ma Jouino noboa.”

Yohanese 17:14

To Ngona ani demo-demo Baba tahidoakoka onangika, ho o dunia ma nyawa yadohata onangika angamoi imaketero hoka Ngohi ko o dunia ma nyawaua, ho onangoo yaniikokaua o dunia ma biaha.

Yohanese 17:18

Angamoi abe hoka Ngona nohihidingoto o duniauku naa, imaketero hokogea onangoo naa Ngohi tahidingoto o dunia ma nyawaika. Abe imaketero hoka Ngona nohihikarajaanga ho onangoli naa ihigila-gila ani karajaanga gea.

Yohanese 17:21

Ho Baba ona gea takokigahoko la duru yodadioka moi Ngoneoka imaketero hoka Ngona naga Ngohioka de Ngohi naga Ngonaka. Hokogea tagahoko la ahao o dunia ma nyawa yamake manga rimoi manga wowangoka de yangaku abe Ngona igoungu nohihidingoto Ngohi.”

Yohanese 17:23

Ho Ngohi naga onangoka de Ngona naga Ngohioka. De toigo la manga rimoi duru itiai la gea o dunia ma nyawa mata-mataika ka idadi duru ihioriki gea Ngona Baba nohihidingotuku o duniauku naa. Iti ona ihiorikoo ani dora itagi ihingaku-ngakuika imaketero hoka itagi Ngohinoo.”

Yohanese 17:3

Angamoi o wowango ka hiado-adonika gea o wowango ma gou-goungu abe ona yamake mangale ma titi inihioriki Ngona dika Ma Jou ma gou-goungu. De ona ihihiorikoo Ngohi naa ani Mesia o Yesusu abe nohihidingoto onanguku.”

Yohanese 3:17

Angamoi gea Ma Jou wihidingoto ai Ngofaka o duniauku, ko mangaleua ma titi la wahohowono o dunia ma nyawa, masara ma titi la ka idadi to ona manga howono Ma Jouika waofi.”

Yohanese 3:33

Masara onagona dika yangaku o Horogaino ma hingahu, ona gea duru iwitaana Ma Jou wagou-goungu abe manga ngongaku ihititi ai demo ma gou-goungika.

Yohanese 6:68

De o Simono Peturusu wipaluhu o Yesusika wato, “Mia Baluhu, done onagonaika miloiki? Angamoi, o demo abe inahihira o wowango ka hiado-adonika, o demo gea naga Ngonaka dika igogere.

Yohanese 8:42

De o Yesusu wahitararono onangika wato, “Nako ngini niagoungu niato ti ngini nia Baba Ma Jou, gea tanu nihiao irahai Ngohi naa, angamoi Ngohi Ma Jouoka de taino hiadono naa naga. De gea toboa ko ma titiua Ngohi dika taputuhu tato toboa. Masara ma titi naa toboa gea Ma Jou o Baba waputuhu wato wohihidingoto hiadono toboa nenanguku naa.”

1 Korintusu 11:23

Ho naa tinihihohininga abe ma titi nanga Baluhu idodutu ai demo gea abe koaho hokokia ai hohininga haniiki. Abe ai dodotoko naa nengokadau wohihidoaka ngohino, de ma oraha naa duru ka imaketero dika ai dodotoko ma demo tinihidoakoli nginikali. Abe hokonaa ai dodotoko. Ma dihira ma futu gea abe nanga Baluhu idodutu o Yesusu iwihidoaka ai musuika, ka ma futu gea dika Una de iwinii-niiki ona yomakokutuono yolomo. De gea o Yesusu o roti waleino.

1 Korintusu 15:1

De naa, ahi gogianongoru, ngohi tato tinihihohininga ma titi o Abari ma Rorahai abe nengokadau tinihingahuoka nginika. De ma oraha gea ngini o Abari ma Rorahai gea niodafongoka de duru genangika nimahingutukoka de gea hiadono idadi ti ngini nia gogere.

1 Tesalonika 2:13

De naga ma titi moioli hiadono ngomi ka ihikaika mitarimakase Ma Jouika ma titi ngini. De gea mitarimakase Unangika mangale ma dihira gea ngini duru niodafongo Ma Jou ai demo abe ngomi minihingahu nginika. Abe ma oraha mia demo gea niihene de niato, “Gea igoungu Ma Jou ai Demo-demo de gea ko to nyawaua manga demo inahingahu ngoneino.” De gea nia demoka duru itaana angamoi igoungu ma abari gea Ma Jou ai Demo-demo. De ai Demo-demo gea hiadono naa ka ikarajaangohi nia kokihiningaka abe ngini niwingaku-ngakuoka.

1 Tesalonika 4:1

Ho naa, mia gogianongoru, ngomi minihibehehongo nginika. De gea nengokadau ma oraha ngomi nagahi nginioka de gea minidotokoka nginika abe hokokia kiani niwango la niwihisanangi Ma Jouika. De igoungu nengokadauinohi ngini naa nianiiki mia demo gea hiadono Unangika niwihisanangi. De masara naa ngomi duru minihigaro de minihibehehongo nginika ma titi nanga gogao nanga Baluhu idodutu o Yesusika, de gea minihibehehongo la ngini ka idogo-dogoli abe nianiiki mia dodotoko ma demo gea hiadono utuohi niwihisanangi Unangika ma titi nia wowango ma datorino.

1 Yohanese 4:14

De naga ma titi moioli abe inahitaana ngoneino ma titi nanga gogao Ma Jouika. De gea abe ngomi ai hidingoto ma nyawa ma dihiraino de to Una ai Ngofaka ngomi wiwimakeoka, ho naa ngomi ka idadi miagou-goungu minihingahu nginika miato Ma Jou o Baba wihidingoto ai Ngofaka la wodadi o duniaka naa nanga Duduhunu.

Himatoko 1:1

O buku naa ma dolaka naga o Yesusu Kristusu ai himatoko abe Ma Jou wihidoaka Unangika ma titi hokokia abe ko itedekanokaua de kiani idadioka. De gea o Yesusu Kristusoli wihidingoto ai malaekata womatengo abe ngohi to Una ai gilaongino la ai malaekatino gea de ngohi tamake ma himatoko. De gea ihihimatoko ngohino la ahao ngohioli ka idadi tadofanga ma himatoko naa abe to Una ai gogilaongo utuikali.