Yohanese 14:9 - Ma Jou ai Demo-demo o Totobelohoka

⁹ De o Yesusu wipaluhu unangika wato, “Filipusu, naa ma dekanino homakokiniiki de mode ko nohihiorikuahi? Angamoi onagona dika ihimakeoka Ngohi, gea ahi Babaoo iwimakeokau. Ho adodoa ho nogahoko Ngohino hokogea nato, ‘Nomihimatoko Ma Jou o Baba’?

Yohanese 14:9 ပူးပေါင်းရင်းမြစ်များ

Dodadi 26:9

Ho o Abimeleke o Isaka wiahoko de duru witaere unangika wato, “Ho muna gea igoungu, ngoni fekata! Adodoa ho nomieluku nato muna gea ngoni firanga?” De o Isaka wipaluhu wato, “O koano, tomangaku marai hokogea ahi demo de angamoi tohawana. Ngohi tato bote o nau-nauru nenangoka ihitoma ngohi la ka idadi ngohi fekata ihiora.”

Higiriiri 11:1

Ngohi naa ko tohawanua abe tomahitatokokau Ma Jou o Yaweoka. Ho done sarakia de nihihuloko la ngohi toara tomagogono ahi lokuika? Abe hokogea ngini nihihiowa ngohino niato, “Kiani hoka o totaleoli nomadotoko, Abe ka de o totaleo yamao o bodito itigino de o lokuika ihohoka.”

Maruku 9:19

De ahao o Yesusu wataere onangika wato, “Adoo, ngini naa totokia? Ka muruonoka de ahao ngini naga de nia ngongakuoka Ngohino? De hokokiahi ma dekana abe Ngohi de ngini homahidogogere moi la hiadono ngini niakunu nimaaduru hoka to Ngohioli ahi datoro? Ho ibooto. Ai ngofaka gea niwiaoino Ngohino!”

Lukasa 12:56

Masara nagali abe ngini niamakeoka ma dodunguu muruono naga Ma Jouino abe ihidumutu Ngohino. De ngaro niamakeoka ai dodunguu gea masara nioluku niataoko, ho gea ma titi hiadono tinihiromanga tato ngini nimadokangeluku dika. Angamoi ma dodunguu utu nisosawaro nihioriki, masara ma dodunguu abe niamakeoka Ngohino de duru ko niataokua. Abe Ma Jou winihidoakoka ma dodunguu gea nginika ma titi to Ngohi ahi datorino la ka idadi nihioriki to Una ai karajaanga o duniaka ma oraha naa, masara ma dodunguu gea ngini nioluku niataoko.”

Yohanese 1:14

O Demo Una womahidadioka o nyawa la gea ka idadi wogogere ngone o nyawa nanga hidogoronaka. De ngomi abe wiwinii-niiki miamakeokau ai medebini ma dararono. De ka Ma Jou o Babaino dika wamake ai medebini ma dararono gea. Una Ma Jou ai Ngofaka womatengoka ho duru ai hiningaka iwiomangoka o dora ma ngango de mata-mata wodiai gea inahimatoko Ma Jou ai hininga ma gou-goungu.

Yohanese 10:30

De Ngohi naa de o Baba ngomi hoimoi.”

Yohanese 12:45

Abe ka de o nyawa ihimake Ngohi de Una abe wohihidingoto, Unangoo iwimakeoka.

Yohanese 14:20

Ho o wange gea Ngohi towangokali de ahao ngini duru nihioriki Ngohi naga ahi Babaka, de ngini naga Ngohioka, de Ngohi naga nginiokaoo.

Yohanese 14:7

Nako ngini duru nihihiorikoka Ngohi naa, gea ahi Babaoo niwihiorikoka. Gea ho hiadono Ngohi tato ma oraha naa niwihiorikoka de niwimakeoka.”

Yohanese 8:19

De ahao ona iwileha o Yesusika ato, “Ho mode o kiaka ani Baba?” De o Yesusu wapaluholi onangika wato, “Ngini naa ko nihihiorikuahi Ngohi naa ho ahi Babaoo ko niwihiorikuahi. Abe nako nihihiorikoka Ngohi naa, gea ka idadi ahi Babaoo niwihioriki.”

1 Korintusu 15:12

Masara abeika nanga kangela naa. Ngomi miahingahu-ngahu abe o Kristusu, Una womomikoka ai lungunino. Masara naga yamuruono naga nginioka abe bari yotemo-temo ato nako hiadono o nyawa yohonengoka de duru ko idadiokaua yomomikoli manga honengino.

Filiipi 2:6

De ngaro o Yesusu de Ma Jou duru hoimoi de duru yomatoteroino, ma o Yesusu womaputuhu wato to Ma Jou ai medebini ma dararono gea wanoaikahi.

Kolose 1:15

De abe ma titi Ma Jou ai Ngofaka o Kristusu, Una gea ai rupa duru hoimoi de Ma Jou o Baba ai rupa. Ho ngaro Ma Jou duru ko idadiua de ngone himake de nanga lako, ma, o Kristusu wonahimatoko ngoneino Ma Jou ai rupa. De nako Ma Jou ai dulaada mata-mataika de ai dulaada gea hohidotelega de o Kristusu, ka o Kristusohi wokurutiye angamoi duru Una gea hoka Ma Jou ai dulaada ma riaka, abe ma titi Una nagau de ahao ma dulaada mata-mataika itoturuino wotulaada.

Ibarani 1:3

De Una gea abe wonahitararono ngoneino to Ma Jou o Baba ai medebini ma dararono. De Una de o Baba duru hoimoi dika manga rupa, abe ma hohutuloo de ko yomakohowonua. De to Una ai dulaada mata-mataika ka Una dika wohiaturu de wapaliara la ka idadi hokogea dika igila-gila. De gea wohiaturu de wapaliara ka to Una ai uru ma demoino ma kuaha ma amokino. De Una gea abe wakokiofioka ngone to Una ai nyawa nanga howo-howono. De gea ai karajaanga ibooto de ahao Una wogogerukuoka Ma Jou o Baba wokokurutiye ai nirakoka, abe ka o Babahi ai kuaha duru kohaamoko. De genangoka wogogeruku la Unangoo womulaenge wahikoano mata-mataika. Ho genangino de ka idadi ngone hamake abe to Ma Jou ai Ngofaka gea duru de ai medebini ma dararonoka, de to Una ai Ngofakino gea abe Ma Jou wipake la ma oraha naa wonatemo-temo ngoneino.

1 Yohanese 5:20

De hohiorikoo abe Ma Jou o Ngofaka Una woboaka ngoneuku de wonahidoakoka o hiakunu nanga hiningaka la ka idadi hihioriki Ma Jou idodutuika. De ngone homanoaka Ma Jou idodutuoka angamoi ai Ngofaka o Yesusu Kristusokaoo ngone homanoa. De o Yesusu Kristusu Unangoo gea Ma Jou idodutu, de o wowango ka hiado-adonika ma titi naga Unangoka. De gea mata-mata duru tonahigaro la tato ngone duru ka idadi hohioriki de honganono enangika.