Yohanese 12:42 - Ma Jou ai Demo-demo o Totobelohoka

⁴² De ngaro o Yahudi ma nyawa manga balu-baluhu utu ko iwingakua o Yesusika, ma naga manga ngoe utu iwingaku. Masara ona ko yamoroinua yahingahu o nyawaika abe iwingakuoka o Yesusika mangale yamodongo manga dodiawo o Farisi ma nyawa. Angamoi nako yahingahu done yatingakoka hiadono ona ko yahigunoakaua yowohama manga dodotoko ma tauika ma titi o Yesusu iwingakuoka.

Yohanese 12:42 ပူးပေါင်းရင်းမြစ်များ

Sosawaro 29:25

Nako ngone ka ihikaika hohawana abe ma titi o nyawa utu inamake sarakia, gea imakadaene dika hoka ngone homahidilikoka o modoioka. Masara ngone abe homahingano-nganono ka Ma Jou o Yaweika dika, gea Una ahao wonadatoko ho duru ko idadiua o bodito inadaene.

Matiusu 10:32

De o Yesusu wahingahu onangika wato, “De onagona dika o duniaka naa de yomahingahu o nyawa manga hima-himangoka ato, ‘Ngohi naa tingaku o Yesusika,’ de ona gea ahao dokena manga wowango ma bahaika abe ahi Baba o Horogaka ai himangoka de tadafongo onangika. Abe ma oraha gea tadafongo de tatemo tato, ‘Igoungu ngona naa nagau ani gogao de de Ngohi.’

Lukasa 12:8

“De naa moioli tagou-goungu tinihingahu nginika, abe onagona dika o duniaka naa de yomahingahu o nyawa manga hima-himangoka ato, ‘Ngohi naa tingaku o Yesusika,’ de ona gea ahao Ngohioli tomahingahu abe tadafongo ona gea. Abe gea ma oraha Ma Jou ai momalaekata manga himangoka de Ngohi tatemo o nyawaika gea tato, ‘Igoungu ngona naa nagau ani gogao Ngohioka.’

Lukasa 23:13

De ipahaino o Pilatusu wahoko o hidemo ma nyawa manga hohidimono, de o Yahudi ma nyawa manga hohidimono, de o nyawa yowoe-woe la ona mata-mata yomatoomuino.

Lukasa 6:22

“De ngini abe o nyawa inidohata de inioluku de initae nginika, de abe nia roma-romanga iniwea-weara mangale ma titi nihiniiki Ngohi naa o Nyawa ma Ngofaka abe o Horogaka de tauku toboa. Nako hokogea idadi nginika de gea nginioo niamakeoka ma hiowa Ma Jouino abe hiadono ka idadi nimapaa-paata ma titi nia garago ifoloiholi. De gea ka idadi nigogarago angamoi ti ngini nia utumu duru ma hohailoa naga inidodamaa o Horogaka.” “De nako o nyawa iniao itorou, gea ka imakadaene dika hoka ti ngini nia totofora manga datoro abe yodiai itorou Ma Jou ai uru ma dodofangika abe ma dodihiraka.”

Yohanese 11:45

Ho o Yahudi ma nyawa abe yoboaino o ngo Mariaino ma titi yoigo imilaru, ona ka de iwimake gea o Yesusu wodiai de manga ngoe iwingaku Unangika.

Yohanese 16:2

Angamoi ahao naga o nyawa inihihupu nia dodotoko ma tauino de hiadono inioluku ma titi nia ngongaku Ngohino. De igoungu naga ma oraha ahao iboa de ngini o nyawa initoma, ato kiani hokogea la iwihisanangi Ma Jou.

Yohanese 19:38

Ho gea ipaha de o Yusupu, abe o Arimatea ma kapongino, una woiki o Pilatusika de wogahoko la o Yesusu ai honenge wile la ka idadi iwinoaika o ngioka ma rupa o aruku. O Yusupu gea unangoo winii-niiki o Yesusu masara ko womahingahu-ngahua angamoi wamodongo o Yahudi ma nyawa manga balu-baluhu. Ho ka de o Pilatusu wihigunoa wato, “Ka idadi” de o Yusupu wosobo la o Yesusu ai honenge ale.

Yohanese 3:2

Ho o futu-futuoka de o Nikodemusu woboa o Yesusino de wotemo Unangika wato, “Guru, ngomi mihioriki gea Ma Jou wonihidingoto ngomino mangale miamake to Ngona ani dodunguu. Angamoi ko moiua ka idadi yodiai o heheranga abe hoka Ngonali nodiai nako ko Ma Jouokaua de aino.” Hokogea o Nikodemusu ai demo.

Yohanese 7:13

Masara o Yahudi ma nyawa gea ko moiua yamoroini yaamo-amokiye yotemo angamoi duru yamodongo manga balu-baluhika.

Yohanese 7:31

De manga ngoe genangoka iwingaku o Yesusika abe Una Ma Jou ai Behehongo, ato, “Angamoi ko ma iwa utu abe ka idadi yodiai o heheranga hokonaa ma ngoe, ho maraioka Una gea o Mesia!”

Yohanese 9:22

Hokogea dika ai dimono yopaluhu angamoi yamodongo manga hidimonika. Yamodongo onangika angamoi ihioriki o Yahudi ma nyawa manga hidimono gea yoputuhoka ato onagona dika yotemo ato, “O Yesusu Una gea o Mesia,” gea ona ko yahigunoakaua yowohama manga dodotoko ma tauika.

Yohanese 9:34

Ka de worafi-rafi gea wotemo hokogea de ona duru iwitaere ato, “Ou, ngona gea ka de nomahidoboainohi de duru nodadiokau o howo-howono ma nyawa! Mode ngona onaguna hiadono nato nomidotoko ngomino hokonaa?” Hokogea o Farisi ma nyawa iwitaere ibooto de ahao de manga dohata, manga dodotoko ma tauoka worafi-rafi gea iwihihupuoka ma hoanika.

Hidingoto 5:41

Ho o hidingoto ma nyawa yosobo ma hihira manga doomuoka de aino de manga hininga duru aomangoka de o garago, angamoi yomatemo ato, “Ngomi naa imihikangela ma titi o Yesusu ai romanga mianii-niiki, ho bote gea imipoha-poha ma titi Ma Jou duru womisanangi ngomino!” Hokogea manga garago ma titi abe manga hiningaka.

Roma 10:10

Angamoi nako nanga hiningaka de hongaku ma titi abe Ma Jou wihimomiki nanga Baluhu idodutu o Yesusu ai honengoka de aino, de hiadono nanga uruoka de homahingahu o nyawa manga himangoka ma titi nanga ngongaku gea, de genangino ma titi hiadono Ma Jou wonahitotiai de wonaduhunu ngone nanga howo-howonino. Gea dika ma ngekomo haniiki la Ma Jou wonaetongo ngone hototiai. De duru ma hingahu ma demo ena gea abe ngomi miahingahu-ngahu o nyawaika, de gea ko ihuhaua o nyawa yongaku enangika.

1 Yohanese 4:15

Ho onagona dika abe yomahingahu ato yongaku ma titi o Yesusu Una gea Ma Jou o Ngofaka, ona gea Ma Jou womanoa onangoka, de onangoo yomanoa Ma Jouokaoo. De manga demoino gea de yomahitaanoka ma titi manga gogao Ma Jouika.

1 Yohanese 4:2

De hokonaa ngone ka idadi hahikohowono ona abe yomahiromanga hokogea la hahioriki gea onagona abe Ma Jou o Womaha wagou-goungu womanoa onangoka, de abe onagonali ko Ma Jou o Womahua abe wotemo manga uruino. De gea hatailako onangika de hahikohowono ma titi manga demo-demoino abe hokokia ona iwihiromanga o Yesusika. Ho nako womatengo ai demo ma goronaka de womahingahu wato wongaku abe ma dihiraino o Yesusu Kristusu womahihawo de ngone o nyawa nanga roehe de womaboa o duniaka naa. De nako hokogea ai demo, gea ka idadi hohioriki abe una gea Ma Jou o Womaha womanoa unangoka de wipake la wotemo ai uruino.