Yohanese 12:27 - Ma Jou ai Demo-demo o Totobelohoka

²⁷ De o Yesusu wohigila-gila wotemo wato, “Ahi hininga naa duru ihuha! Ho koaho hokokia tomagahoko ahi Babaika? Sarakia, irahai la ahi gogahokino totemo tato, ‘Baba, tomagahoko la nohihihupu ahi kangelaino naa.’ Koua, ko togahokua hokogea mangale duru ma titi Ngohi toboa la toohimanga ahi kangela. De naa ahi kangela ma oraha adonoka.”

Yohanese 12:27 ပူးပေါင်းရင်းမြစ်များ

Yesaya 53:3

De o nyawa iwidohata unangika hiadono ona iwioluku ho duru manga hohedu ma demo ma dorou unangika. Ho to una ai hininga ma huha duru ilamoko hiadono iwidotodiri ai badangika. De o nyawa manga ngoe ko iwigoua ho una wodadi hoka o nyawa manga gemono ma ngi. Ho de ma oraha iwitilakuru ai himangino de yomahiniporika la ufa yomalega unangika. Hokogea ngone o nyawa hiemono unangika de ngone hifetongo hato una duru ko kia-kiaua iwidaene.

Matiusu 11:25

De ipaha de o Yesusu womaniata ai Babaiye wato, “O Baba, o dunia naa de o Horogaoo to Ngona ani giamoka ho Ngona dika to ena ma Baluhu idodutu. De Ngohi totarimakase Ngonaika ma titi ma dodihirainohi de nohikaaturu la ngaro o nyawa abe manga sosawaro ikuranga ma ka idadi yataoko itiai o dodotoko ma gou-goungu ma titi Ngona. Masara abe ona yomahiromanga ato yososawaro de manga tobahioriki ilamoko, ona gea ikuranga yataoko ma gou-goungu angamoi Ngona nagogonoka la nato ufa ona yamake.

Matiusu 11:26

De gea Baba ma dihirainohi de nohikaaturoka angamoi imakiniiki de to Ngona ani mau.”

Matiusu 26:42

De wotemo ibooto de woikokali ai dingiika de womaniatoli wato, “Ahi Baba, nako ko idadiua Ngona nagoraka ahi kangela naa Ngohioka de aino ma kiani tohimanga dika, gea iti to Ngona ani mauoka dika de aino naniiki.”

Matiusu 26:45

De womaniata ibooto de woliokali onangika de ona ka yakiookokali. Ho wataere onangika wato, “Mode ka nimahiainohi hiadono ka inikiookohi? Marai nia giooko ko iniwedonuahi? Abeika, Ngohi o Nyawa ma Ngofaka naa ahi gahe ma oraha adonoka, abe ihihidoakoka o howo-howono ma nyawaika.

Lukasa 22:44

De to Una ai hininga duru ihuhaholi, ho utuohi womaribuutu la womaniatoli de ai hininga ma gahumu. De hokogea ma amoko ai huha hiadono ai gahauku ihupu ai badangino de gea ma rupa o awunu abe itubukuku ai badangoka de dau ma tonakuku.]

Lukasa 22:53

Masara nengokadauinohi o wange-wangeiye Ngohi naga de de ngini Ma Jou ai Tauoka abe totobadotoko, masara gea de ko nihitaokua. Ma gea adodoaua, angamoi ma oraha naa naga idadioka ti ngini nia oraha la ti ngini dika nia hininga ma igo ilaku, abe ma oraha naa o fufutu ma kuaha itagi o duniaka.”

Yohanese 11:41

Hokogea wotemo ho o hakaru gea ma bionoka yaluluika. De o Yesusu womamatagaiye o Horogaiye de wotemo wato, “Tarimakase Baba, Ngona nohihigihenoka.

Yohanese 12:23

Ka de manga gogahoko gea woihene de o Yesusu wahingahu ona mata-mataika wato, “Ma oraha adonoka la Ma Jou wahimatoko o nyawaika abe to Una ai medebini ma dararono itagi Ngohi o Nyawa ma Ngofakino.

Yohanese 13:21

Gea o Yesusu wahingahu ona iwitobaniikika ibooto de ai hininga duru ihuha de wahingahuoli onangika wato, “Naa tagou-goungu tinihingahu, naga womatengo nginioka ahao wohihidoaka ahi musuika.”

Yohanese 18:37

De o Pilatusu wilehali wato, “Ho igoungu, Ngona o koano?” De o Yesusu wihingahu wato, “Ngona nagoungu nohifetongo nato Ngohi o koano. Abe Ngohi naa toboa o duniauku, de hiadono tomaboa naangoka, gea mangale ma titi la o demo ma gou-goungu ka idadi tahingahu-ngahu o nyawaika. De onagona dika yoigo ma gou-goungu, ona gea ihihigihene.”

1 Timotiusu 1:15

De naa o demo moi tonihingahu abe ma demo gea hohioriki duru igou-goungu. Abe o Yesusu Kristusu, Una woboaka o duniauku naa la wato o howo-howono ma nyawa waduhunu manga howonino. Ma demo gea duru igoungu de kiani hodafongo de hangaku enangika. De nako o howo-howono ma nyawa mata-mataika, ma ka ngohiohi ahi howono itorou.

Ibarani 2:14

De igoungu abe ngone Ma Jou ai ngofa-ngofaka naa, ngone o nyawa abe de nanga roehoka de nanga awunoka, de o Yesusoo wodadioka o nyawa la ai rupa duru imaketero hoka ngoneoli, abe ma oraha gea de Unangoo naga de ai roehoka de ai awunoka. De gea ma titi o kia ai hiningaka hiadono wodadi o nyawa? De gea o nyawa wodadi la ka idadi wohonenge, angamoi gea ai hininga ma dumutu la ai hohonengino de o Ibilihi ma haeke ma kuaha wawedere, abe ena gea ikoano o hone-honengoka. De duru hokogea idadioka abe wawederoka o Ibilihi ma haeke ma kuaha,

Ibarani 5:7

De nako ma dihiraino ma oraha o Yesusu nagahi o dunia ma lokuokahi de Una naga de ai roehokahi abe imaketero hoka ngoneoli, de ma oraha gea Una duru womaniata de o duduhunu womatobagahoko ai Babaiye, abe womaniata de ai ilingi ma amokiye de nagali ai koongo itifa. De abe womagahoko o duduhunu ai Babaiye de gea ai Baba tanu ka idadi widuhunu la ngaro ufa dika de ai Ngofaka wohonenge. De mangale ma titi o Yesusu womahitipokouku de wihoromati ai Babaika, ho ai Baba wigihene de wopaluhu ai niniata ma demoika de widuhunu Unangika.