Yohanese 11:47 - Ma Jou ai Demo-demo o Totobelohoka

^47-48 Ho o Farisi ma nyawa yoihene manga ade-ade gea de ahao manga hidemo ma nyawa Ma Jouiye manga hohidimono yomakahoko la yomatoomuino ato yomahikaaturu. Ho gea yomatoomuinoka de yomakokeleha ato, “O kia ahao hodiai? O nauru gea ka ihikaika wodiai o heheranga ma ngoe ho nako hinoaika dika ahao o nyawa mata-mata ka iwingaku. De nako idadi hokogea o Roma ma nyawa ahao yoboaino de to ngone nanga ngi ma debi-debini naa akilianga de nanga tonaka inaora. Ho naa sarakia hodiai o Yesusika?”

Yohanese 11:47 ပူးပေါင်းရင်းမြစ်များ

Matiusu 26:3

De ma wangeoka gea de naga o Yahudi ma nyawa manga hohidimono yomatoomuino o Kayafasa ai tauoka, abe una gea manga hidemo Ma Jouiye ma hibaluhu wokokurutiye. De naga genangoka to ona manga hidemo Ma Jouiye yokokurutiye yamuruono naga de nagali manga hohidimono utuoli yomakokitoomuino.

Matiusu 5:22

De ma demo gea duru igoungu. Masara Ngohi tato ka onangua dika abe yototoma gea abe ahao kiani yamake manga hohowono, masara ngaro ona abe manga howono manga hiningaka dika ipuda de onangoo kiani manga hohowono yadaene.” “Abe hoka o nyawa duru yangamo manga gogianongoruika ma onangoo kiani yamake manga hohowono. De nako ma titi nia ngamoino gea hiadono niahohedu o nyawaika de niato, ‘Ngona naa duru nobodo!’ gea ka idadi iniurusu abe o urusu ma ngioka la yaputuhu nia hohowono.” “Ho hongoli nako ma titi nia ngamoino gea hiadono niadoana o nyawaika niato, ‘Ngona naa toigo la Ma Jou wonihohowono de o hohonenge angamoi ani hiningaka gea ka o bodo dika!’ Ho nako hokogea nia demo, gea ka idadi ngini de ahao inihohowono o Naraka ma ukuoka.”

Maruku 14:1

De ipahaino de ahao naga o wange hinootohi de naga ma oraha abe o Yahudi ma nyawa ihirame-rame manga rame-rame hinooto. Abe moi o Totilakuru ma rame-rame de moioli abe ihiromanga o Roti abe ko Iwa ma Ragi ma rame-rame. De ma rame-rame gea ko imulaenguahi de ona o hidemo ma nyawa Ma Jouiye manga hohidimono de onangoo abe yotobadoto-dotoko o Musa ai Paretaino ona yomakoketemo de gea iwihidee la ato o Yesusu yomatohiki abe iwitaoko de iwitoma.

Lukasa 22:2

Ho ma oraha gea de o hidemo ma nyawa Ma Jouika manga hohidimono de ona yotobadotoko o Musa ai Paretaino, ona gea yomakoketemo la yomalingiri o ngekomo abe o Yesusu ka idadi iwitaoko de iwitoma. Masara yomakoketemo de yomahitiari ato ufa hiadono o Yesusu iwitaoko de genangino o huruhara idadi o kokawaahaka, angamoi duru yamodongo o nyawa yowoe-woeika.

Yohanese 11:57

Masara o Farisi ma nyawa de o hohidemo Ma Jouiye abe yokokurutiye ahao manga kokawaahaika yahibehehongoka ato, “Nako o Yesusu niwimake kiani nimataiti nimihingahu la ka idadi wiwitaoko.” Hokogea o Yahudi ma nyawa duru iwilingiri o Yesusu.

Yohanese 12:19

Ho ka de o Farisi manga doomuino ma nyawa yamake manga ngoe iwibuhuku gea de yomakoketemo, ato, “Abeika! Nako ka ihikaika hokonaa itagi, gea ko idadiokaua ngone holaku. Abeika manga ngoe yomakiniiki gea, ngade-ngade o dunia ma nyawa yomamataka iwiniiki o Yesusu.”

Yohanese 2:11

O heheranga naa o Yesusu wodiai o Galilea ma tonakoka abe o Kana ma kapongoka. Genangoka wohititi ai dodunguu, abe yahiheranga o nyawa, la onangika womahimatoko ai medebini ma dararono. De o Yesusu iwinii-niiki manga ngongaku ikokidogoli o Yesusika.

Yohanese 7:32

Hokogea o nyawa yotemo yomakokuhudu dika ma titi o Yesusu, masara manga demo gea naga yoihene o Farisi manga doomuino ma nyawa. Ho o Farisi ma nyawa gea de o hidemo ma nyawa Ma Jouika yomakoketemohi abe hokokia yodiai la ibootohi o Yesusu wodotoko hokogea. Ho yomakoketemo ibooto de ahao yomakiniiki yoiki onangika abe yogoa-goana Ma Jou ai Tau de yahuloko onangika ato, “Niloiki, o Yesusu gea kiani niwitaokoka!” Ho ona gea yogoa-goana Ma Jou ai Tau yaduhuloko la ato iwitaoko o Yesusu, masara ona ko iwimoroinuahi iwitaoko.

Yohanese 7:45

De ona yogoa-goana Ma Jou ai Tau abe iwiduhuloko la o Yesusu iwitaoko, ngaro onangoo ma ko iwitaokua. Ho ma oraha yolio o Farisi ma nyawaika de manga hidemo Ma Jouika, de manga hidimono utu duru yataere Ma Jou ai Tau ma gogoanika gea ato, “Ei, Una gea ko niwiaoinoua? Adodoa ho ko niwitaokua?”

Hidingoto 5:21

De ai demo gea yoihene de duru yaniiki, ho duru o ngoru-ngorumino de ka de Ma Jou ai Tau ma loaika yowohamika de yomulaengoka yadotoko o nyawaika ma abari gea. De o hidingoto ma nyawa gea yodotoko manga gogiriakahi de doka o Isiraele ma nyawa manga hihira manga doomu ma ngioka de manga hidemo wokokurutiye de ai dodiawo yomatoomuino. De nagali yoboaino o Isiraele manga balu-baluhu. De yomatoomu ibooto de ahao yahuloko manga nyawa la yoiki yale o hidingoto ma nyawa o bui ma tauoka la yoboa de yahimanga onangika la ka idadi yatailako manga datoro de manga demo.

Hidingoto 5:24

De manga hingahu ma demo gea yoihene de una abe yotobagoa-goana Ma Jou ai Tau manga haeke de abe manga hidemo yokokurutiye ona mata-mata duru yolilifanga angamoi ko ihiorikokaua abe ma bahauku de hokokiali o hidingoto ma nyawa manga datoro ma hofoko.