Yohanese 10:33 - Ma Jou ai Demo-demo o Totobelohoka

³³ De ona yopaluhu ato, “Koua, ko ma titiua ani heheranga masara, ma titi ani ngelo angamoi Ngona duru o nyawa biaha dika ma gea ani demo hoka nomahidadi Ma Jou. Hokogea Ngona ningelo Ma Jou ho gea ma titi hiadono kiani nohonenge.” Hokogea ona ihititi la ato o Yesusu iwitoma.

Yohanese 10:33 ပူးပေါင်းရင်းမြစ်များ

1 Kokoano 21:10

De ngini o kota ma dimo-dimono kiani o nauru nialingiri yatobahowo-howono yahinooto abe ko yopusingua yodiai itorou, de ona yahinooto gea niahewa. De niahikarajaanga la o doomu ma goronaka de ona yomaokoino de duru iwitae o Nabotika de yoade-ade abe yoihene una widoana Ma Jouika. De abe ngohioo, nia koano, o Naboto wohidoana o nyawa manga himangoka. De ngini o kota ma dimo-dimono ahao kiani niwiao o Naboto ma hoanika de genangoka ngini o doomuoka ka hiadono niwihakaru ka hiadono una wohonenge.” Hokogea o ngo Isebele ami ngeluku ma hurata ma hingahu abe motulihi mapake o koano ai kuaha.

Higiriiri 82:6

De ahao naga Ma Jou ai putuhu abe wahohowono onangika wato, “Ngohi tato ngini igoungu o jou-jou, abe ngini mata-mata duru de nia kuahaka.

Yohanese 10:24

Ai dodagi ma goronaka de o Yahudi ma nyawa yamuruono naga iwimake ho yoboa de iwihigilolitoka. De ahao iwileha o Yesusika ato, “Adodoa ho naa ma dekanino Ngona nomihipongonohi ma titi ma gou-goungu abe Ngona igoungu o Mesia eko ko o Mesiaua? Kiani de ani demo ma gou-goungu nomihingahu ngomino la ufa hiadono miataoko ani demo ma titi ko itiaiua.”

Yohanese 10:30

De Ngohi naa de o Baba ngomi hoimoi.”

Yohanese 10:32

Masara o Yesusu waleha onangika wato, “Ngohi naa tinihimatokokau o heheranga ma ngoe abe o Babaka de aino, ho ma titi ahi heheranga o kia hiadono niato kiani nihihakaru?”

Yohanese 19:7

Masara o Yahudi ma nyawa manga ngoe gea iwiribuutu o Pilatusika ato, “Masara naga to ngomi mia pareta abe nako o nyawa iwingelo Ma Jouika kiani yohonenge ho kiani haniiki mia pareta gea angamoi Una womafetongokau wato, ‘Ngohi naa Ma Jou ai Ngofaka.’”

Yohanese 5:18

Ho ka de o Yesusu ai demo gea yoihene de o Yahudi ma nyawa manga balu-baluhu gea duru idogo iwidohata hiadono iwihidee ato kiani iwitoma. Ona iwihidee ato iwitoma angamoi ma titi hinooto, moi manga bohono watilakuroka abe ko idadiua yokarajaanga o Hiaini ma wangeoka. De utuohi o Yesusu wifetongo Ma Jou, wato “Ahi Baba” hoka ma titi womahingahu wato yomatoteroino Una de Ma Jou. Gea ma titi hiadono ona yomakoketemo ato, “Kiani hitoma la hiadono wohonenge.”

Roma 13:1

De naa, ahi gogianongoru, ngohi tohigila-gila ahi hitiari ngini mata-mataika. Ngohi tato o nyawa mata-mataika kiani yahigihene o popareta ma nyawaika, angamoi to ona manga kuaha la yahipareta o nyawaika, gea Ma Jouoka de aino wahidoaka onangika. Abe ko iwa o popareta ma kuaha utuinoli, ho o popareta o kiaka dika abe ma oraha naa naga de manga kuahaka, ona gea Ma Jou dika wahikaaturu de wahigogere abe to ona manga kuaha ma gogeroka.

Filiipi 2:6

De ngaro o Yesusu de Ma Jou duru hoimoi de duru yomatoteroino, ma o Yesusu womaputuhu wato to Ma Jou ai medebini ma dararono gea wanoaikahi.