Yesaya 6:8 - Ma Jou ai Demo-demo o Totobelohoka

⁸ De ahao ngohi toihene nanga Baluhu idodutu woleha wato, “Onagona ka idadi Ngohi tohidingoto? De done onagona yodadi to Ngomi mia hidingoto ma nyawa la mia demo yatotaka?” De ai leleha gea toihene ho ngohi topaluhu tato, “Ngohi naga. Ka idadi Ngona nohihidingoto ngohi!”

Yesaya 6:8 ပူးပေါင်းရင်းမြစ်များ

Dodadi 1:26

De Ma Jou wotemoli o wange ma butaanga gea wato, “Naa, Ngone hodiai o nyawa, de hahidadi la ona ngade-ngade hoka Ngoneoli. De ona ahao de manga kuahaka hiadono ka idadi yapareta o dunia ma aewani mata-mataika. Ho ngaro o nawoko mata-mata de o kia dika de ma womahoka o akeroka de o gahioka ma ka idadi yapareta. De o dunia ma amokika o totaleo de o aewani mata-mataika o nyawa manga kuahaka, ho ngaro o dofo eko o fuhuku, de ngaro ma ago-agomo eko ma hohumuduru, masara, mata-mataika o nyawa manga kuahaka.”

Dodadi 11:7

De Ma Jou ka womatemohi wato, “Ho naa koaho Ngone haguti onanguku la manga demo hohikapusakoka la imakokohowonoka. Hokogea hodiai la manga demo idadi o demo ma ngoe imaketemomomoi, la ngaro yomakoketemo ma ko yomaketemangaratiiokaua.” Hokogea Ma Jou wotemo.

Dodadi 22:1

De ipahaika Ma Jou o Abarahaama ai ngongaku wataili. De hokonaa ma ade-ade: Ma Jou wiahoko wato, “Abarahaama!” De o Abarahaama wopaluhu wato, “Ngohi naga nenangoka.”

Dodadi 22:11

Masara ka de o Abarahaama ai gakana wagorakiyeoka de itodokanino naga o dihanguku Ma Jou o Yawe ai malaekata womatengo waamokiye wiahoko wato, “Abarahaama, Abarahaama!” De una wopaluhu wato, “Ngohi naga nenangoka.”

Dodadi 3:22

De Ma Jou o Yawe wotemo wato, “Abeika, o nyawa naa ihiorikoka o kia ma owa de o kia ma dorou, ho ona yodadioka hoka Ngoneoli, de ufa hiadono yomadofioli o wowango ma gota ma hofoko de yaolomo done manga wowango ko ihonengua.”

2 Samuele 1:7

De o Saulu womadogilioro de wohimake de wohiahoko ngohi la toboa. De ngohi topaluhu, tato, ‘Ngohi naga nenangoka ahi baluhu!’”

1 Kokoano 22:20

De Ma Jou o Yawe wotemo wato, ‘Onagona ahao ka idadi o Ahaba ai buku ale-leloro hiadono una waparangi o Ramoto-Gileada ma kotaika la ka idadi wohonenge genangoka?’ De naga utu manga doomuino abe manga demo hokonaa de hokonaa.

Hidingoto 20:24

Masara ngohi ahi hininga hokonaa. Abe ahi wowango naa tanu taetongo ko kia-kiaua ma titi, nako ko imakiniikua de nanga Baluhu o Yesusu ai mau ngohino. Ho mangale ma titi gea ho ngohi ko topusingua nako o nyawa ihitoma, iti ko ihitomauahi de ka idadi tabootohi ahi karajaanga abe nanga Baluhu wohihitagongoka ngohino. De ahi tagongo gea la tahingahu-ngahu o nyawaika o Abari ma Rorahai abe ma titi Ma Jou duru wonahiowa de ai hininga ma owa ngoneino.”

Hidingoto 22:21

“Masara ahi Baluhu wotemo ngohino wato, ‘Koua, ma kiani o Yerusaleemoka de nosobo, angamoi Ngohi tonihidingoto abe o tonaka kohagurutika la ona ko o Yahudi ma nyawaikaua nahingahu-ngahu!’ Hokogea ai demo ngohino ma dodihiraino gea.”

Hidingoto 26:19

De o Paulusu wohigila-gilali ai demo wato, “De, ahi koano o Agaripa, ngohi duru ko talawanua ma behehongika abe o Horogaka de auku ihihimatoko ngohiuku, masara duru taniiki enangika.

Hidingoto 9:4

De una worubauku ma tonakuku de ahao woihene o ilingi itemo unangika ato, “Saulusu, Saulusu! Adodoa ho ngona nohihikangela Ngohino ma titi ani datorino?”

Efesusu 3:8

De gea ngohi duru toheranga abe ma tagongo ma hohailoa gea wohihidoaka ngohino, angamoi nako ngohi de o nyawa utu mata-mata iwingaku-ngakuoka, ma ka ngohiohi tanu duru ko kia-kiaua ihidaene. Masara ngaro hokogea ngohi, ma Una wohihitagongo de ma karajaanga ma hohailoa gea la wato ngohi tahingahu-ngahu abe ko o Yahudi ma nyawaikaua ma titi to Kristusu ai owa abe ngone ai nyawaino. De gea ai owa duru ma amoko de duru ka irahaiholi hiadono ko hakunua ngone hatuga, de nanga hiningaka enangoo ko aboaikaua genangika.

1 Samuele 3:4

De itodokanino Ma Jou o Yawe wiahoko unangika wato, “Samuele, Ei, Samuele!”