Yesaya 5:2 - Ma Jou ai Demo-demo o Totobelohoka2 De una ma tonaka gea wohidiaiohi abe ma hakaru waumoika de wobaiti irahai. Wohidiai ibooto de ahao o angguru ma roehe duru ma rorahai womangiriki de wodatomo gea ma tonakuku. De ai redi gea ma goronaka de o gogoana ma tau wodiai de ma digi-digino wodiai o angguru ma hofoko ma duduuku o hakaruino. De ai hidiai wabootoka de wododamaa ma hasili o angguru ma muti-mutiti. Masara ipahaino de ma muti-mutiti ko wamakeua, masara ma suka-suka dika wamake o angguru ma hofokino. De hokogea ahi nyanyianga tonyanyi nginika ma titi ahi olo ai redi. အခန်းကိုကြည့်ပါ။ |
Yesaya 5:2
31 ပူးပေါင်းရင်းမြစ်များ
Abe done sarakia o homoa ma nyawa imihioriki ngomi, abe ngohi de ani nyawa naa, minihisanangi nako Ngona ko nominiikua? Abeika, Ngona nomihidadi to Ngona ani nyawa ho mimakohowono de o dunia ma nyawa utu mata-mataika. Masara nako Ngona ko nominiikua de done hokokia o nyawa imimake de imihikohowono de ona?” Hokogea o Musa waademo ona mata-mataika.
De ai ade-ade ma demo hokogea angamoi ihidumutu ngini Ma Jou o Yawe Wokokurutiye ai nyawaika! Abe ngini naa nidadioka hoka to Una ai angguru ma redi. Ngini o Isiraele ma nyawa de abe nimanoa o Yudea ma tonakoka, duru ngini abe winihiromanga wato ai redi abe duru wodora! Ho Una duru wongano-nganono la wamake o totiai ma hasili nginioka de aino. Masara ai nganganono gea ko idadiuali ho wamake dika o gangamo nginioka. De Una duru wonganono winimake abe ngini nimakao itiai de nia gogianongoru, masara abe wamake gea o nyawa yopoa-poaka ma titi nimahiketehikokangela! Ho ma hasili abe wamake nginioka gea ka ma suka-suka dika de ko iwa ma muti-mutiti!
Masara ma dodihiraino gea de ngini tinietongo hoka o angguru ma roehe duru ma rorahai ho Ngohi tinidatomo ahi tonakoka. Masara ipahaino de ahi datomo gea imaturuuruoka, abe ma titi ngini nidadioka hoka o angguru ma roehe ma fuhuku ho ti ngini nia hofoko duru itorou de iwederoka. Ho ngini done ma titi o kia hiadono nimahitorouoka hokogea?
Abeika tohiketero o Isiraele ma nyawa de o angguru ma roehe moi abe duru ikutufuru de to ena ma hofoko duru ifoloiholi. Abe ahi nyawa gea to ona manga redi ma hasili de manga kiahonanga duru ma ngoe. Masara gea manga boloi hokokia yapake? Gea ka yahidoaka manga popangaoika dika! Abe ma oraha Ma Jou wohiowa la manga redi ma hasili idogo ilamoko, de gea ahao utuohi ilamoko abe ona yomahihuba manga pangao ma hima-himangoka! De nagali abe ona yomadiai manga pangao ma huhuba ma ngi abe utuohi ihohailoa la ka idadi yomahuba-huba enangika dika!
De ma gurutikahi de naga wamake o gogilioro ma gota o utu moi o ngekomo ma datekoka gea. De ma gotaika gea wolegahi la wato wamake ma hofoko, masara ka ma hoka dika naga, ho ko iwa ma gogilioro ma hofoko. Ho gea de Una wohikoboto ma gotaika gea wato, “Ibootohi nohofoko naa de ka hiado-adonika!” De ka de wohikoboto enangika de ma gogilioro ma gota gea imoraaka.
De ahao o Yahudi ma nyawa manga hohidimono gea nagahi o Yesusoka de Una wahingahu o hiketero moioli onangika wato, “De naga womatengo o angguru ma redi wodatomo. Wodatomo ibooto de wohigilolitino wadaduhu ai angguru ma redi gea. Wadaduhoka, de ahao wodiai o baiti moi abe idadi o angguru ma teongo ma ngi. De ahao moi wodiai abe o redi yogoa-goana manga tau. De gea mata-mata wabootoka de o nyawa yamuruono naga ahao wahewa la wato ona yoogoana to una ai redi gea. De o redi ma dutu de yogoa-goana yomahiketehibehehongo la nako adonoka ma oraha abe ahao amake o redi ma hasili, de ahao ma hasilino gea yaregu la ahao ma hononga iwihidoaka o redi ma dutuika. De yomahiketehibehehongo ibooto de ahao o redi ma dutu wosobo de wotagi-tagi o tonaka utuikali.
De ma gurutikahi de naga wamake o gogilioro ma gota o utu moi. De ma gota gea ngaro ma oraha ko adonuahi la ihofoko de o hofoko ma ago-agomo, masara biaha naga to ena ma hofoko ma domoro abe imakiniiki de ma hoka, de ma gota gea naga ihokaka ho ingodumoka ma hoka. Ho ma gotaika gea wolegahi la wato wamake ma hofoko. Masara wolegaika de ma hoka dika naga, masara moioo de ko iwa ma hofoko ma gotaka gea.
De ahao o Yahudi ma nyawa manga hohidimono gea nagahi o Yesusoka de Una womulaenge wodotoko abe wahiketero ona, wato, “De naga womatengo o angguru ma redi wodatomo. Wodatomo ibooto de wohigilolitino wadaduhu ma redi gea. Wadaduhu ibooto de ahao wofaiti o humu moi abe o angguru ma teongo ahao ihahuru genanguku. De ahao moi wodiai abe o redi yogoa-goana manga tau. De gea mata-mata wabootoka de o nyawa yamuruono naga ahao wahewa la wato ona yoogoana to una ai redi gea. De o redi ma dutu de yogoa-goana yomahiketehibehehongo la nako adonoka ma oraha abe ahao amake o redi ma hasili, de ahao ma hasili gea yaregu la ahao ma hononga iwihidoaka o redi ma dutuika. De yomahiketehibehehongo ibooto de ahao o redi ma dutu wosoboka de wotagi-tagi o tonaka utuikali.
De ngohi tagoungu tosanangi taduhunu hokogea ahi gogianongoruika nako hoka Ma Jou wohihigunoa ngohi todiai. De duru ahi hininga ihuha ma titi abe ona iwioluku o Kristusika. De hiokoo abe o Yahudi ma nyawa iwioluku o Kristusika, angamoi o Kristusino de tanu ka idadi yamake Ma Jou ai hiowa abe ka enangohi ikurutiye. De gea toheranga ona iwioluku, angamoi ma dihirainohi de naga yamakeoka to Una ai hiowa ma ngoe. Masara ngaro hokogea wahiowa ma dihiraino ma ka iwiolukohi Unangika. Abe nako ngomi o Yahudi ma nyawa, hokonaa ma hiowa ma ngoe abe ngomi miamakeoka Unangoka de aino. Abe ma hiowa ihira-hira, gea ma dodihirainohi de Ma Jou womiirikoka ngomi la midadi to Una ma hirete ai nyawa. De nagali abe Ma Jou womihidadi to Una ai ngofa-ngofaka. De abe ai medebini ma dararono womahimatoko ngomino. De abe Una ma dodihiraino de ai behehongo ma ngoe womihibehehongo ngomino. De abe ngaro to Una ai Pareta ma enangoo womihidoaka ngomino. De nagali Ma Jou womidotoko ngomi o Yahudi ma nyawaino abe hokokia mimahuba itiai Unangika, De nagali ai behehongo ma owa ma ngoe ngomino abe gea womihiowa ngomi to Una ai nyawaino.
Abeika naa tinileha. Sarakia, nako naga womatengo womahingohama o tentaraika la una de ai dodiawo yaparangi manga musuika, sarakia, una gea kiani to una ma hirete ai tiwi wapake la ai baju de ai inomo womahiija? Ko hokogenangua! Eko hokonaa. Sarakia, naga womatengo wotobaredi-redi abe ai angguru ma redi wodatomoka, de ipaha ahao ai angguru ma hofoko ko idadiua waolomo genangino? Ko iwa moi idadi hokogea! Eko hokonaa. Bote naga o domba ma gogoana abe o wange-wangeiye wogoana ma domba, masara ko idadiua ma domba ma huhu ma teongo waokere? Duru ko iwa hokogea!
ကြော်ငြာတွေ