Yesaya 42:3 - Ma Jou ai Demo-demo o Totobelohoka

³ De ngaro womatengo abe iwihidakadunu de ai hininga ma huha masara ahi Huhuloko gea wibole-bole dika unangika. De ngaro womatengo ai nganganono ka ietekohi imaketero hoka o uku ma dokara ma eteteke, masara ahi Huhuloko ko wahonengua abe una gea ai nganganono, masara ka wihigaro dika unangika la ai nganganono ka ifero. De ona gea ahao yamake to Ngohi ahi totiai ma titi abe ahi Huhuloko ai hininga ma bole-boleino gea.

Yesaya 42:3 ပူးပေါင်းရင်းမြစ်များ

Yesaya 40:11

De Una watobapaliara ai nyawaika gea imaketero hoka o domba ma gogoanoli watobagoana ai domba ma duduono. Abe ma domba ma ngofaka wagorakiye de watotiri ai aluino, de ma domba ma mayo Una wahihira-hira ma ngekomino.’”

Yesaya 42:2

De to Una ai demoino de ko yomaketeribuutua Una de o nyawa, de ko wabobanaratua onangika. De nako o nyawa manga ngoe manga hima-himangoka de Una ko womahagaagaua, angamoi ko hokogenangua to Una ai hininga.

Yesaya 50:10

Ho nginioka onagona naga abe nia horomati itagi nanga Jou o Yaweika, de onagona naga abe niwigihene to Una ai Huhulokika? Abe nako nia hininga hokogea, ngaro niaohana o huha de o kangela nia wowangoka, de niamao o fufutuoka dika nigogere, masara ka idadi nimahinganono nanga Baluhu o Yawe ai romangika dika la Una winiduhunu. De koaho nimahidutuku dika nanga Jouika.

Yesaya 50:4

Ma Jou o Yawe wohihiakunu ngohino la ka idadi ai hingahu ma demo tadofanga o nyawaika, de gea hiadono ngohi ka takunu taduhunu ona abe manga hininga de ma dubuhoka. O ngoru-ngorumiye wohitumomiki de wohiwangoro ngohino. De gea ahi ngauku wohiso la ka idadi duru totoihene to Una ai dodotokika.

Matiusu 11:28

De ahao Una wotemo wato, “Ngini mata-mata abe nia hiningaka de iniboleoka abe imaketero hoka nia pea ihifefele ma titi nia hininga ma gina duru kohadubuho, de gea ngini mata-mata niainohi Ngohino la ka idadi ti ngini nia hininga tohiuwini.

Matiusu 12:20

De ngaro womatengo abe ai ngongaku ko iputurunguahi masara ahi Huhuloko gea wibole-bole dika unangika ho ko waruwaeua ai ngongaku. De ngaro womatengo ai nganganono Ngohino ka ietekohi imaketero hoka o uku ma dokara ma eteteke, masara ahi Huhuloko ko wahonengua abe una gea ai nganganono, masara ka wihigaro dika unangika la ai nganganono ka ifero. De ahi Huhuloko Una gea ka ihikaika wao irahai o nyawaika abe de ai hininga ma dodipokoukuino. De ona gea ahao yamake to Ngohi ahi totiai ma titi abe ahi Huhuloko ai hininga ma bole-boleino gea.

Yohanese 20:27

De ahao witemo o Tomasika wato, “Tomasa, abeika ahi giama naa, nainohi de ani hagaraara natubuku, de ani giama nohidoaka la nohingohama ahi gumurukino. Ufa ka nomahohiningahi nohingaku, kiani nagoungu nohingaku Ngohino.”

Yohanese 5:30

De gea duru ko moiua todiai abe Ngohi tomahohiningaiye dika de todiai. Ho abe ma oraha gea o nyawa manga datoro tatailako, abe tahohowono eko tahidoaka o wowango onangika, gea taniiki duru imakadaene abe toihene ahi Babaino. Ho o nyawa tahohowono itiai angamoi ko to Ngohiua dika ahi mau taniiki masara duru to ahi Baba ai mau dika taniiki angamoi gea Una wohihidingoto Ngohi.” Hokogea o Yesusu womahitararono o Yahudioka manga balu-baluhika gea.

Himatoko 19:11

De ipahaino de ngohi tamake abe o Horoga hoka ifelengaika. De gea ngohi ihitodokana angamoi genangoka ngohi tamake o kuda ma gare-garehe moi, de naga womatengo wobarenuku ma kudaka gea. De Una gea wobare-barenuku ai romanga Watobagou-goungu de Wotobatotiai, de Una ka ihikaika wototiai abe ma titi hokokia wahohowono de waparangi to Una ai musuika.