Yesaya 42:1 - Ma Jou ai Demo-demo o Totobelohoka

¹ De Ma Jou o Yawe wotemo wato, “Abeika naa Una ahi Huhuloko, Una abe Ngohi tihiputurungu. Abe Ngohi tiirikoka Una de duru tidosanangi Unangika gea. De Ngohi tihidoakoka ahi Womaha Unangika la Una duru de ai kuahaka, de Una ahao wahingahu-ngahu o dutu mata-mataika ma titi abe ma ngekomo hokokia la ka idadi ona yamake to Ngohi ahi totiai onangika.

Yesaya 42:1 ပူးပေါင်းရင်းမြစ်များ

Dodadi 49:10

Ko moiua la iwiakunu ai kuaha ma dodunguu iwiora, Ho ai totoforauku onangino ka ihikaika naga abe yodadi o koano, Hiadono una woboa ai romanga o Silo abe o koano ma tutukunu gea to una ma dutu. Gea una abe ahao o nyawa o tonaka mata-mataika iwihingounu.

Yesaya 42:2

De to Una ai demoino de ko yomaketeribuutua Una de o nyawa, de ko wabobanaratua onangika. De nako o nyawa manga ngoe manga hima-himangoka de Una ko womahagaagaua, angamoi ko hokogenangua to Una ai hininga.

Yesaya 50:10

Ho nginioka onagona naga abe nia horomati itagi nanga Jou o Yaweika, de onagona naga abe niwigihene to Una ai Huhulokika? Abe nako nia hininga hokogea, ngaro niaohana o huha de o kangela nia wowangoka, de niamao o fufutuoka dika nigogere, masara ka idadi nimahinganono nanga Baluhu o Yawe ai romangika dika la Una winiduhunu. De koaho nimahidutuku dika nanga Jouika.

Yesaya 52:13

De Ma Jou o Yawe wahingahu ai nyawaika wato, “Abeika ahi Huhuloko Una ahao ai tagongoka wao itiai hiadono wolaku, de gea Una ahao duru iwigorakiye de iwihigiriiri Unangika!

Yesaya 53:11

Ma Jou wihiromanga una gea ai huhuloko duru wototiai hiadono wihigunoa la wokangela. Ka de ai kangela ma huha ipahaka de una wamake ai kangelaino ma hasili ho hiadono duru ai hininga iriidoka de ai sosanangi. De una ka idadi o nyawa wahitiai manga wowangoka angamoi ahao manga howono mata-mata womahitounaka. De mata-mata gea to una ai tobahiorikoka de aino abe una wohiorikokau Ma Jou ai mau abe kiani una wohonenge la ka idadi o nyawa ko manga ngoe wahitotiai Ma Jou ai himangoka.

Yesaya 61:1

Ma Jou o Yawe Wokokurutiye abe mata-mataika naga ai kuahaka, Una gea wohilufungu de ai Womaha ngohino la wohitingakoka ahi karajaangika. Abe Ma Jou o Womaha wohigutiuku ngohiuku de mimahidogogere ka moi de Una. De wohihikarajaanga la ngohi tahingahu-ngahu o abari ma rorahai o huha ma nyawaika, de ona talaruoo manga huha ma goronaka. De Ma Jou ai hingahu moi abe wato kiani ngohi tahingahu gea, “O hiluasa ma oraha adonoka!” Ho gea tahingahu onangika abe ma dihiraino de yahidukusioka abe manga howono ma ngioka. De gea to ngohi ahi karajaanga abe idadi ma titi hiadono Ma Jou o Yawe wohihidingoto ngohi nenangino. Ho ona abe duru yamao manga howono ma dubuho, ngohi naa toboaino la tapaliara de taduhunu onangika. De onangika abe yamao o howono ma kuaha yahidubuioka ahao ngohi tahingahu onangika abe ngohi ka idadi tahihupuoka manga kangelaino gea. De onangoo abe yahidubuioka de o fufutu ma kuaha, ngohi tahingahu onangikaoo abe ka idadi tahihupu o fufutu ma kuahaino.

Sakaria 3:8

Ho naa ngini kiani nihihigihene ahi demoino. Abe ngaro ngona o Yosua abe nodadi ahi hidemo ma nyawa duru nokokurutiye de ngaro ani dodiawo abe onangoo yodadi ahi hidemo ma nyawa, masara ngini mata-mata kiani nitotoihene ahi demoino naa. Abe Ngohi tinihingahu tato ngini nidadi hoka ahi dodunguu moi o nyawaika. De gea ma dodunguu ma titi abe itigioka ma oraha Ngohi tihimatoko o nyawaika to Ngohi ahi Duduhunu abe tihiromanga “o Gota ma Jaga.” Abe ma dihiraino de tahibehehongoka tato ahao ahi Duduhunu gea tihimatoko o nyawaika. De ngini naa nidadi hoka ma dodunguu abe gea ko itedekanokaua de tihimatoko Una gea.’”

Matiusu 17:5

De o Peturusu wotemo ai gogiriaka de o lobi moi ma dararono yakokihawoka. De ahao Ma Jou wotemo de yoihene o lobioka de auku o ilingi abe wotemo wato, “Naa to Ngohi ahi Ngofaka abe duru tidora Unangika de duru tisanangi Unangika, ho kiani ngini niwihigihene Unangika.”

Lukasa 3:22

De ahao Ma Jou o Womaha wouti o Yesusuku abe hoka o namodaara de iwidangi Unanguku. De nagali o ilingi o Horogauku itemo ato, “Ngona naa ahi Ngofaka abe duru tonidora de duru tonidosanangi Ngonaika.” Hokogea idadi abe ma oraha o Yesusu iwiohiki.

Lukasa 4:18

“Ngohi ihilufungu de Ma Jou o Womaha ai kuaha, abe Una wohiiriki de wohihitagongo ngohino la o Abari ma Rorahai tohingahu-ngahu o hu-huha ma nyawaika. De Una wohihidingoto ngohi naa la tohingahu-ngahu abe o nyawa yatao-taokino ahao yahiluasa ma hohailoaika. De abe o nyawa yorafi-rafioka ahao ka idadi yomahioriki. De ona abe duru o kokangela ma goronaka Una wohihidingoto la tahihohe manga papakitino la yohupu ma hohailoaika.

Lukasa 4:19

De Una woigo la ngohi tohingahu-ngahuoo abe ma oraha adonoka la nanga Baluhu idodutu Una duru waduhunu ai nyawaika.”

Lukasa 9:35

De ahao Ma Jou wotemo ho yoihene o lobino ma ilingi itemo ato, “Naa to Ngohi ahi Ngofaka abe tiirikoka de tihitagongoka de o tagongo abe duru ikokurutiye, ho kiani Unangika niwihigihene.”

Yohanese 16:32

Ma naa nitotoihene e? Ahao naga ma oraha, iya, igoungu ma oraha gea adonoka, abe ngini ahao nimahikabarihi hiadono nikokilio nia kokitauika. De Ngohi ahao nihinoaika hiadono duru tomatengoka. Masara gea igoungu, ko tomatengoua angamoi ka ihikaika ahi Baba naga Ngohioka.”

Yohanese 3:34

De mangale o Yesusu gea Ma Jou o Baba wihidingoto, ho to Unangoo ai demo imakadaene de Ma Jou. De Ma Jou ai Womaha woahumu wihidoaka o Yesusika.

Yohanese 6:27

Ufa o roti abe ka iwedere dika nialingiri, ma kiani nialingiri o roti abe ko iwederua la gea inihiwango ka hiado-adonika. De o wowango gea ahao Ngohi o Nyawa ma Ngofaka ka idadi tinihidoaka, angamoi Ma Jou ahi Baba wohihitunguuoka Ngohino de ai kuaha abe duru wohisanangi Ngohino.”

Hidingoto 10:38

Abe o Yesusu Una o Nasaretoka ma nyawa, de Ma Jou wihidoaka Unangika Ma Jou o Womaha de nagali Ma Jou ai kuaha duru kohaamoko wihidoaka Unangika. De gea wihiakunoka de ahao o Yesusu wotagi-tagi abe ai datoro ma rorahai ka ihikaika wotobadiai. De o nyawa mata-mata abe o Ibilihi ma haeke yahikokangela onangika de o Yesusu wakokiduhunu manga kokangelaino gea. De gea mata-mata wakunu wodiai ma titi Ma Jou naga de de Una.”

Hidingoto 11:18

Hokogea o Peturusu ai hitararono ma demo ai gogianongoruika, de abe ma oraha ona yoihene ai demo de ko iwaka manga lawana ma demo ma titi ona ko o Yahudi ma nyawaua. Ho ona duru iwihigiriiri Ma Jouika ma titi gea de yotemo ato, “Igoungu Ma Jou wahidoakoka la ona abe ko o Yahudi ma nyawaua ka idadi yoporete manga howo-howono. De gea ahao ka idadi yamake o wowango ka hiado-adonika Unangoka de aino.”

Hidingoto 28:28

De ahao o Paulusu ka wotemohi onangika wato, “De naa ngohi tinihingahu abe Ma Jou ai Demo-demo gea inidaene nginiukuoo angamoi ti ngini naa nia pea ma dogowini duru nimaketero dika hoka nia totoforali manga pea ma dogowini. Abe ngini niolukoka ai abari abe hokokia Una waduhunu o nyawa manga howo-howonino. Ho mangale ma titi ngini niaolukoka ho Una wohidingoto ai abari gea ona ko o Yahudi ma nyawaikaua, de ona ahao yosanangi yodafongo enangika!”

Hidingoto 9:15

Masara nanga Baluhu wotemo wato, “Noikohi de naniiki dika ahi demo abe tonihulokoka. Angamoi o Saulusu una gea tiirikoka la tato ahi Abari ma Rorahai una wao de wahingahu-ngahu onangika abe ko o Yahudi ma nyawaua de o kokoanoika, de ngaro o Isiraele ma nyawaikaoo ma ahao wahikodoku ahi wowango ma ade-ade ma demo.

Efesusu 1:4

Ho naa tonahihohininga ma titi ai hidoaka ma owa duru ma hohailoa abe Ma Jou wonahidoakoka. De abe ai owa ihira-hira, duru ma dodihiraka abe o dunia naa ko wotulaadauahi de Una wonairikoka ngone abe ahao hingaku Unangika la ahao hodadi to Una ma hirete ai nyawa duru ma hohailoa. Abe Una wonahideeoka wato womadingaka ngone mata-mata la homakohowono de o nyawa utu. De gea ihititi ai hininga ma doraka ngoneino ho hiadono wonahidadi la ngone hotebi-tebini de ko iwaka nanga howono to Una ai himangoka.

Efesusu 1:6

Abe Una wipake ai Ngofaka gea abe duru widora Unangika la ma titi Unangino de duru wonahiowa hiadono ngoneoo hodadioka ai ngofa-ngofaka. Ho mangale ma titi ai hidoaka ma owa duru ihohailoa gea hiadono ngone naa koaho hotarimakase de hihigiriiri Unangika ka hiado-adonika!

Efesusu 3:8

De gea ngohi duru toheranga abe ma tagongo ma hohailoa gea wohihidoaka ngohino, angamoi nako ngohi de o nyawa utu mata-mata iwingaku-ngakuoka, ma ka ngohiohi tanu duru ko kia-kiaua ihidaene. Masara ngaro hokogea ngohi, ma Una wohihitagongo de ma karajaanga ma hohailoa gea la wato ngohi tahingahu-ngahu abe ko o Yahudi ma nyawaikaua ma titi to Kristusu ai owa abe ngone ai nyawaino. De gea ai owa duru ma amoko de duru ka irahaiholi hiadono ko hakunua ngone hatuga, de nanga hiningaka enangoo ko aboaikaua genangika.

Filiipi 2:7

Ho ai medebini ma dararono gea wahuputokahi de ahao o huhuloko manga hapa womahinoauku, abe o nyawa manga hapa de to Yesusu ai hapa, duru hoimoi manga hapa.

Kolose 1:13

Abe igoungu Ma Jou wonahitingakoka nanga boditoino abe iboa o fufutu ma kuahaino, de ahao wonaturuuru ngone de wonahidogogere de to Una ai Ngofaka ai kuahaka, abe ai Ngofaka gea duru Ma Jou widora Unangika.

1 Peturusu 2:4

De naa ngohi tinihigaro nginika la nimahitigi o Kristusika ka hiadono nimahidutuku Unangika. De gea tonahiketero abe ngone hingaku-ngakuoka ngone naa hodadi hoka o tau ma kiahonanga abe Ma Jou wonapake ma oraha womaatau abe to Una ma hirete ai Tau. De gea ma titi to Una ai hininga la ngone de Una hodadioka hoka o tau ma debi-debini moi la nanga borigogao Unangika duru ikekete abe imaketero hoka o tau ma dadaduhu duru ikekete ma dudukurika. Ho nako Ma Jou ai Tauoka de gea tato o Kristusu Una gea hoka ma tau ma lifunu abe duru ihira yakelengauku dau ma tonakuku. De igoungu o nyawa utu iwiolukoka Unangika masara nako Ma Jou, Una gea duru wisanangi de widora o Kristusika ho hiadono wiiriki la wihidadi Una ai tau ma lifunu abe ka Unangohi de ma titioka. De abe ngohi tihiromanga o Kristusika tato Una o tau ma lifunu, gea ko ma titiua abe Una ko wowangoua hoka o hakaru enangoo ko iwangoua, masara Una gea duru wotobawango. De ngini naa abe nimahitigi Unangika, nginioli tinihiketero abe hoka o tau ma kiahonanga nitobawango. De gea Ma Jou woigo winipake ai Tauoka. De hokogea tinihiketero abe ma oraha Ma Jou womaatau de winihikodofanga ngini la ngone mata-mata homahikeketoka nanga gogao Una de ngone to Una ai Tauoka. De gea ngini nidadioka ai Tau ma kiahonanga ho Una ma hirete womanoa ti ngini nia hidogoronaka. De tanu o hiketero moioli ka idadi todiai, abe ngini tinihiketero hoka o hidemo ma nyawali abe duru nitebi-tebini Ma Jouika. Angamoi ngini imaketero hoka o hidemo abe ona ka ihikaika yomahihuba Ma Jouiye abe ai Tauoka, ho nginioo ka ihikaika nimahihuba Unangiye. Masara nako ti ngini nia huhuba gea ko imakadaenua de hoka o hidemo utuoli to ona manga huhuba, angamoi ti ngini nia huhuba gea nia higiriiri de nia hingounu Ma Jouika. De nia huhuba gea mata-mata ihititi o Yesusu Kristusino, ho nia huhuba duru iwihisanangi Ma Jouika. De hokogea ngini ka idadi niwileleani Unangika. Ho igoungu abe ngini niwingaku Unangika, ngini nidadioka hoka to Una ai Tau ma kiahonanga, de nagali nidadioka hoka ai hidemo ma nyawa abe ka ihikaika nimahuba-huba Unangika.

1 Peturusu 2:6

De abeika nanga utumu duru ma hohailoa gea abe hodadioka to Una ma hirete ai nyawa ho hodadioka hoka to Una ma hirete ai Tau ma kiahonanga. De gea duru imakiniiki de Ma Jou ai Demo-demo moi abe genangino de Ma Jou wonahingahu hokokia ai Tau wodiai. Angamoi ma dodihiraino ihitulihukuoka abe to Ma Jou ai demo ihidumutu o Kristusika. De gea wotemo wato, “Abeika nimafikirohi ahi demo naa. Naga womatengo Ngohi tiirikoka abe Una duru wokurutiye de iwihoromati. De Una gea tihigogere o Yerusaleeme ma kotaka la Una wodadi hoka ahi tau ma lifunu abe duru ihira yakelengauku dau ma tonakuku. De onagona dika abe iwingaku Unangika, ona gea ahao duru ko yahimalekua ma titi Una.” Hokogea itemo ma dodihiraino, de gea igoungu abe onagona dika iwingaku Unangika de manga hininga duru ko ietekua angamoi ahao Ma Jou wahidoaka onangika ma utumu mata-mata abe ma dihirainohi de wahibehehongoka ai nyawaika.